នារសៀលថ្ងៃទី១១ ខែកុម្ភៈ ឆ្នាំ២០២៦ លោក សន ប៊ុនមាន នាយករងខុទ្ទកាល័យនៃក្រសួងរៀបចំដែនដី នគរូបនីយកម្ម និងសំណង់ បានដឹកនាំមន្ត្រីជំនាញ និងអ្នកពាក់ព័ន្ធ បន្តប្រជុំពិភាក្សា និងពិនិត្យទីតាំងតាមបណ្ដាភូមិទាំង១០ ក្នុងសង្កាត់ទឹកវិល ក្រុងសៀមរាប ខេត្តសៀមរាប ដើម្បីផ្ទៀងផ្ទាត់ទិន្នន័យចុងក្រោយ មុននឹងធ្វើការសម្រេចរៀបចំផែនការនៃការប្រើប្រាស់ដីភូមិក្នុងសង្កាត់ទឹកវិល។
លោក សន ប៊ុនមាន បានឱ្យដឹងថា សម្រាប់ការចុះពិនិត្យទីតាំងជាក់ស្ដែងក្នុងគោលបំណងធ្វើការកំណត់ បែងចែកតំបន់ និងលក្ខខណ្ឌនៃការប្រើប្រាស់ដីឱ្យបានច្បាស់លាស់ និងត្រឹមត្រូវស្របទៅតាមបទដ្ឋានដែលបានកំណត់ដោយច្បាប់ដែលបានចែង ដោយក្នុងនោះរួមមាន តំបន់អភិរក្ស តំបន់លំនៅឋាន តំបន់កសិកម្ម តំបន់វប្បធម៌ តំបន់ឧស្សាហកម្ម និងតំបន់ទេសចរជាដើម។
លោកបន្តថា សម្រាប់កិច្ចការនេះពិតជាមានសារៈសំខាន់ និងចាំបាច់ណាស់ សម្រាប់ភូមិដែលស្ថិតក្នុងតំបន់រមណីយដ្ឋានអង្គរ ដែលសម្រេចទៅបានត្រូវមានការចូលរួមសហការពីក្រសួង ស្ថាប័ន អាជ្ញាធរពាក់ព័ន្ធ ព្រមទាំងបងប្អូនប្រជាពលរដ្ឋនៅក្នុងតំបន់រមណីយដ្ឋានបេតិកភណ្ឌពិភពលោកទាំងអស់។ លោកបានសំណូមពរដល់អាជ្ញាធរមូលដ្ឋាន មន្ទីរជំនាញពាក់ព័ន្ធ និងមេភូមិ រួមសហការគ្នា ក្នុងការចុះកំណត់ទីតាំងឱ្យបានច្បាស់លាស់ និងត្រឹមត្រូវ ដើម្បីធ្វើជារបាយការណ៍ដាក់ជូនថ្នាក់ដឹកនាំក្រសួងរៀបចំដែនដី ដើម្បីធ្វើការពិនិត្យ និងសម្រេច សម្រាប់ការដាក់ចេញផែនការប្រើប្រាស់ដីក្នុងភូមិទាំង១០ ក្នុងសង្កាត់ទឹកវិល ឱ្យបានឆាប់រហ័ស និងទាន់ពេលវេលា៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
