នារសៀលថ្ងៃទី១២ ខែកុម្ភៈ ឆ្នាំ២០២៦ លោក អ៉ឹង សុភ័ណ អភិបាលក្រុងរុនតាឯកតេជោសែន ខេត្តសៀមរាប បានដឹកនាំមន្ត្រីរដ្ឋបាលក្រុងសង្កាត់ កងកម្លាំងនគរបាល លោកគ្រូអ្នកគ្រូ សិស្សានុសិស្ស យុវជនកាកបាទក្រហមកម្ពុជា យុវជនកាយរិទ្ធិ និងយុវជនគណបក្សប្រជាជនកម្ពុជា ធ្វើយុទ្ធនាការទ្រង់ទ្រាយធំមួយ ក្នុងការសម្អាតអនាម័យ បរិស្ថាន និងប្រមូលសំណល់សំរាមតាមបណ្ដោយផ្លូវជាតិលេខ៦៧ ចាប់ពីព្រំប្រទល់ស្រុកប្រាសាទបាគង រហូតដល់ព្រំប្រទល់ស្រុកបន្ទាយស្រី។
លោក អ៉ឹង សុភ័ណ បានឱ្យដឹងថា គោលបំណងសំខាន់នៃយុទ្ធនាការ គឺដើម្បីបណ្ដុះស្មារតីស្រឡាញ់បរិស្ថាន បំផុសគំនិតឱ្យប្រជាពលរដ្ឋ និងយុវជនចេះស្រឡាញ់ និងថែរក្សាអនាម័យក្នុងមូលដ្ឋាន។ ជំរុញការកាត់បន្ថយប្លាស្ទិក បន្តផ្សព្វផ្សាយយុទ្ធនាការ «ថ្ងៃនេះ ខ្ញុំមិនប្រើប្រាស់ថង់ប្លាស្ទិក» ឱ្យកាន់តែរីកសុសសាយ។ ជាពិសេសជាការលើកកម្ពស់សោភ័ណភាព តានរយៈការរៀបចំដងផ្លូវសាធារណៈឱ្យមានរបៀបរៀបរយ ដើម្បីទាក់ទាញភ្ញៀវទេសចរ និងផាសុកភាពរស់នៅ។
ក្នុងឱកាសនោះដែរ លោកអភិបាលក្រុង ក៏បានមានប្រសាសន៍ផ្ដាំផ្ញើ និងអំពាវនាវយ៉ាងទទូចដល់បងប្អូនប្រជាពលរដ្ឋ ក៏ដូចជាអ្នកធ្វើដំណើរទាំងអស់ សូមបញ្ឈប់ការបោះចោលសំរាមពាសវាលពាសកាលតាមដងផ្លូវ និងទីសាធារណៈ។ ការចូលរួមរបស់បងប្អូន គឺជាគំរូដ៏ល្អសម្រាប់សង្គមជាតិ ព្រោះបរិស្ថានស្អាត នាំមកនូវសុខភាពល្អ និងសុភមង្គលក្នុងគ្រួសារ។
លោកបន្តថា យុទ្ធនាការនេះមិនត្រឹមតែជាការសម្អាតប៉ុណ្ណោះទេ ប៉ុន្តែគឺជាសារដាស់តឿនដល់គ្រប់មជ្ឈដ្ឋាន ឱ្យងាកមកចាប់អារម្មណ៍លើការគ្រប់គ្រងសំណល់ និងរួមគ្នាធ្វើឱ្យក្រុងរុនតាឯកតេជោសែន ក្លាយជាក្រុងដែលស្អាត និងមានបរិស្ថានបៃតងជានិរន្តរ៍៕
អត្ថបទ៖ លោក អ៊ុន ណារាជ្យ
