ប្រធានមន្ទីរវប្បធម៌ និងវិចិត្រសិល្បៈខេត្តសៀមរាប បានធ្វើការអំពាវនាវយ៉ាងទទូចដល់ប្រជាពលរដ្ឋ ជាពិសេសយុវជន សូមប្រើប្រាស់ទិវានៃក្ដីស្រឡាញ់មួយនេះឱ្យត្រឹមត្រូវ កុំប្រាសចាកពីសេចក្ដីថ្លៃថ្នូរ ជាពិសេសប៉ះពាល់ជាអវិជ្ជមានដល់ខ្លួនឯង និងដល់តម្លៃប្រពៃណី ទំនៀមទម្លាប់ និងអត្តសញ្ញាណជាតិ។
លោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្តសៀមរាប បានណែនាំឱ្យយុវជនត្រូវយកថ្ងៃបុណ្យនៃក្ដីស្រឡាញ់ ទៅប្រើក្នុងការបង្ហាញអារម្មណ៍មនោសញ្ចេតនា រួមទាំងចែករំលែកនូវក្ដីស្រលាញ់ ប្រកបដោយភាពថ្លៃថ្នូរ ស្មោះសរបរិសុទ្ធ ចំពោះមនុស្សជុំវិញខ្លួនដូចជា ក្រុមគ្រួសារ ឳពុកម្ដាយ បងប្អូន សាច់ញាតិ រួមទាំងកាយវិការចែករំលែកដល់ក្ដីស្រលាញ់ទៅដល់ជនពិការ និងក្មេងកំព្រា ក្រោមរូបភាពផ្សេងៗ។
លោកប្រធានមន្ទីរ បានបញ្ជាក់ថា ការសិក្សាស្វែងយល់ឱ្យបានច្បាស់លាស់អំពីឬសគល់ទិវានៃក្ដីស្រលាញ់ គឺពិតជាមានសារៈសំខាន់ និងចាំបាច់ដល់ប្រជាពលរដ្ឋ ជាពិសេសយុវជន ដើម្បីចៀសវាងនូវការប្រព្រឹត្តខុសឆ្គង គន្លងប្រពៃណី ដែលខុសពីប្រពៃណីទំនៀមទម្លាប់ខ្មែរ ដែលធ្វើឱ្យប៉ះពាល់ដល់សណ្ដាប់ធ្នាប់សាធារណៈ សីលធម៌សង្គម កិត្តិយស និងសេចក្ដីថ្លៃថ្នូរដល់ខ្លួនឯង និងអ្នកដទៃ និងធ្វើឱ្យប៉ះពាល់ដល់អនាគតវែងឆ្ងាយ នៅពេលដែលយើងប្រព្រឹត្តិខុសឆ្គង ប្រាសចាកប្រពៃណី។
ជាមួយគ្នានេះ ដោយមានការយកចិត្តទុកដាក់ និងការគិតគូខ្ពស់ពីបញ្ហានេះ កាលពីថ្ងៃទី១២ ខែកុម្ភៈ ឆ្នាំ២០២៦ ក្រសួងវប្បធម៌ និងវិចិត្រសិល្បៈ ក៏បានចេញលិខិតអំពាវនាវ មាតាបិតា អាណាព្យាបាល សមត្ថកិច្ចពាក់ព័ន្ធគ្រប់លំដាប់ថ្នាក់ ជាពិសេសយុវជន ចូលរួមផ្សព្វផ្សាយឱ្យបានទូលំទូលាយ អប់រំណែនាំ ដល់កូនចៅទាំងអស់ឱ្យប្រើប្រាស់ទិវានៃក្នុងស្រលាញ់នេះប្រកបដោយមនោសញ្ចេតនា និងសេចក្ដីថ្លៃថ្នូរ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
