យោងតាមគេហទំព័រព័ត៌មាន Thaiger នាព្រឹកថ្ងៃព្រហស្បតិ៍ ទី១០ ខែកុម្ភៈ ឆ្នាំ២០២២នេះបានឱ្យដឹងថា មន្ត្រីសុខាភិបាលក្នុងប្រទេសថៃកំពុងជំរុញឱ្យសាធារណជនមានការប្រុងប្រយ័ត្នចំពោះបញ្ហាមូសខាំ ដែលបណ្តាលឱ្យមានជំងឺគ្រុនឈាម ហើយទំនងជានឹងកាន់តែរីករាលដាលនៅឆ្នាំនេះ។ លោកវេជ្ជបណ្ឌិត Opart Karnkawinpong មកពីនាយកដ្ឋានគ្រប់គ្រងជំងឺប្រទេសថៃ លើកឡើងថា ចំនួននៃការឆ្លងជំងឺគ្រុនឈាមបានថយចុះក្នុងរយៈពេល២ឆ្នាំចុងក្រោយ ជាលទ្ធផលនៃការស្នាក់នៅផ្ទះក្នុងកំលុងពេលជំងឺរាតត្បាត។ ទោះជាយ៉ាងណាក៏ដោយ ជំងឺដែលឆ្លងពីមូសខ្លាត្រូវបានគេរំពឹងថានឹងមានការរីករាលដាលកាន់តែខ្លាំងឡើងវិញនៅឆ្នាំនេះ។
ចាប់តាំងពីថ្ងៃទី១ ខែមករាមក មនុស្សចំនួន១៩៣នាក់ បានឆ្លងជំងឺគ្រុនឈាម ដោយមានអ្នកជំងឺ២នាក់ អាយុ៣៧ឆ្នាំ និងម្នាក់អាយុ៤០ឆ្នាំ បានស្លាប់ដោយសារជំងឺនេះ។ យោងតាមរបាយការណ៍របស់ Thai PBS World អ្នកជំងឺត្រូវបានគេគិតថា មិនបានដឹងខ្លួនថាមានជំងឺគ្រុនឈាម និងប្រើប្រាស់ថ្នាំដោយគ្មានវេជ្ជបញ្ជា។ លោក Opart ព្រមានថា ថ្នាំប្រឆាំងនឹងការរលាកដែលមិនមែនជាស្តេរ៉ូអ៊ីត ដូចជាអាស្ពីរីន (Aspirin) ឬឌីក្លហ្វេណាក (Diclofenac) ជារឿយៗត្រូវបានគេប្រើជំនួសប៉ារ៉ាសេតាមុល ដើម្បីបន្ថយគ្រុនក្តៅ។ ទោះជាយ៉ាងណាក៏ដោយ ការប្រើប្រាស់ខុសអាចនាំឱ្យមានការហូរឈាមខាងក្នុង និងបណ្តាលឱ្យបាត់បង់ជីវិត។
រោគសញ្ញានៃជំងឺគ្រុនឈាម រួមមានគ្រុនក្តៅខ្លាំង ដែលអាចមានរយៈពេលពី២ ទៅ៧ថ្ងៃ ឈឺក្បាល និងឈឺសាច់ដុំ ឡើងកន្ទួលក្រហមនៅលើដៃ ជើង និងផ្នែកផ្សេងទៀតនៃរាងកាយ ឈឺពោះ ចង្អោរ រួមទាំងបាត់បង់ចំណង់អាហារ។ អ្នកជំងឺខ្លះអាចបន្តមានរោគសញ្ញាធ្ងន់ធ្ងរជាងមុន ហើយអាចដួល ឬអាចស្លាប់បាន។ ដូច្នេះវេជ្ជបណ្ឌិតរូបនេះ ណែនាំសមាជិកគ្រួសារឱ្យតាមដានស្ថានភាពអ្នកជំងឺគ្រុនឈាមឱ្យបានដិតដល់ និងស្វែងរកការព្យាបាល ប្រសិនបើគ្រុនក្តៅមិនចាប់ផ្តើមថយចុះក្នុងរយៈពេល២ថ្ងៃជាមួយនឹងថ្នាំបន្ថយសីតុណ្ហភាព ឬតាមរយៈការជូតខ្លួនជាមួយទឹកត្រជាក់។
ប្រធាននាយកដ្ឋានគ្រប់គ្រងជំងឺប្រទេសនេះ ក៏បានលើកឡើងដែរថា ប្រជាពលរដ្ឋគួរតែពិនិត្យមើលជម្រកសត្វមូស និងលុបបំបាត់ដង្កូវចេញពីធុងទឹក ឬស្រះ ដោយប្រើប្រាស់ផលិតផលដូចជាថ្នាំអាបេត (Abate) ឬចិញ្ចឹមត្រីឱ្យស៊ីដង្កូវទឹក។ យោងតាមសារព័ត៌មានដដែល ក្នុងចំណោមអ្នកជំងឺគ្រុនឈាម១៩៣នាក់ ដែលត្រូវបានគេធ្វើរោគវិនិច្ឆ័យនៅឆ្នាំនេះ ភាគច្រើនត្រូវបានរកឃើញនៅតំបន់កណ្តាលនៃប្រទេសថៃ រួមទាំងទីក្រុងបាងកក ខេត្តណាខនផាថម និងសាមុតប្រាកាន៕
