នាព្រឹកថ្ងៃទី២៨ ខែតុលា ឆ្នាំ២០២៤នេះ មន្ត្រីជាន់ខ្ពស់ក្រសួងបរិស្ថាន បានបង្ហាញក្តីរំពឹងថា ក្រុងសៀមរាប នឹងក្លាយជាក្រុងបៃតងក្នុងពេលឆាប់ៗខាងមុខនេះ ហើយភាពបៃតងនេះ នឹងរួមចំណែកក្នុងការទាក់ទាញអ្នកទេសចរឲ្យមកកម្សាន្តនៅក្នុងទឹកដីប្រាង្គប្រាសាទបុរាណកាន់តែច្រើនថែមទៀត។
ឯកឧត្តម សាម អ៊ីន រដ្ឋលេខាធិការក្រសួងបរិស្ថាន បានមានប្រសាសន៍ ក្នុងពិធីដាំកូនឈើចំនួន៤០០ដើម ជាប្រភេទដើមត្របែកព្រៃ ក្នុងក្រុងសៀមរាប បានកោតសរសើរចំពោះអាជ្ញាធរគ្រប់ជាន់ថ្នាក់នៅក្នុងខេត្តសៀមរាប ដែលបានខិតខំដាំកូនឈើទាំងប្រភេទឈើព្រៃ ឈើលម្អគ្រប់ប្រភេទ នៅទូទាំងខេត្ត។ ឯកឧត្តមបន្តថា ដោយឡែកសម្រាប់ក្រុងសៀមរាប កូនឈើល្អ ជាច្រើនប្រភេទ ទាំងតូចទាំងធំក៏ត្រូវបានអាជ្ញាធរខេត្ត និងក្រុង បានខិតខំសហការជាមួយគ្រប់អង្គភាព ស្ថាប័ន និងអង្គការដៃគូ រួមជាមួយវិស័យឯកជនផងធ្វើការដាំដុះឡើងវិញនៅតាមបណ្តាដងផ្លូវសាធារណៈនានា ដែលសកម្មភាពនេះ បង្ហាញថា នៅពេលខាងមុខ ក្រុងសៀមរាប នឹងក្លាយជាក្រុងបៃតង ដែលជាផ្នែកមួយនៅក្នុងការទាក់ទាញអ្នកទេសចរមកកម្សាន្តផងដែរ។
ឯកឧត្តម សាម អ៊ីន បន្តថា សកម្មភាពដាំដុះកូនឈើឡើងវិញនេះ ក្រសួងបរិស្ថាន ដែលជាសេនាធិការ បានដើរតួនាទីយ៉ាងសំខាន់ ក្នុងការគាំទ្រដល់គោលនយោបាយរបស់រាជដ្ឋាភិបាល ជាពិសេសនៅក្នុងយុទ្ធសាស្ត្រនយោបាយបញ្ចកោណដំណាក់កាលទី១ របស់រាជរដ្ឋាភិបាលអណត្តិទី៧ ដែលដឹកនាំដោយសម្តេចធិបតី ហ៊ុន ម៉ាណែត ។ ក្រសួងបរិស្ថាន បានដាក់ចេញនូវយុទ្ធសាស្ត្រនានា ដូចជាយុទ្ធសាស្ត្រចក្រាបរិស្ថាន យុទ្ធនាការដាំដើមឈើមួយលានដើមក្នុងមួយឆ្នាំ យុទ្ធនាការបញ្ឈប់ការប្រើប្រាស់ថង់ប្លាស្ទីក ជាដើម សុទ្ធតែទទយលបាននូវការចូលរួមគាំទ្រពីប្រជាពលរដ្ឋគ្រប់ទិសទី ។
ជាមួយគ្នានេះដែរ អភិបាលរងខេត្តសៀមរាប លោក ឌី រ៉ាដូ បានលើកឡើងថា ការដាំកូនឈើនេះក្រៅពីជួយស្តារគម្របបៃតងនៅក្នុងក្រុងសៀមរាប ក៏ជាផ្នែកមួយនៃការធ្វើឲ្យប្រសើរឡើងនូវផ្នែកបរិស្ថាន ផងដែរ ។ លោកថា ដើមឈើបានដើរតួនាទីសំខាន់នៅក្នុងការកាត់បន្ថយការបំពុលក្នុងបរិយាកាស កាត់បន្ថយការកើនឡើងកម្តៅផែនដី និងជួយកាត់បន្ថយការហូរច្រោះដីជាដើម។
លោកអភិបាលរងខេត្តសៀមរាប បន្តថា ចំពោះការដាំដើមឈើនាពេលនេះ ក៏ជាសកម្មភាពមួយឆ្លើយតបទៅនឹងយុទ្ធសាស្ត្រចក្រារបស់ក្រសួងបរិស្ថាន ហើយក៏បានជួយបង្កើនសោភ័ណភាពក្រុងឲ្យកាន់តែស្រស់បំព្រងថែមមួយកម្រិតទៀត។ ជាមួយគ្នានេះលោកក៏បានអំពាវនាវដល់ប្រជាពលរដ្ឋដែលមានលំនៅដ្ឋានតាមបណ្តាផ្លូវដែលមានដើម ឈើសូមជួយថែរក្សាទាំងអស់គ្នា ដើម្បីជាប្រយោជន៍របស់យើងទាំងអស់គ្នា៕
សូមជម្រាបថា ការដាំដុះដើមឈើឡើងវិញនេះ រដ្ឋបាលខេត្តសៀមរាប បានដាក់ចេញនូវផែនការដាំកូនឈើនៅតាមផ្លូវសាធារណៈក្នុងក្រុងសៀមរាប ចំនួន២ម៉ឺនដើម ក្នុងរយៈពេល២ឆ្នាំ ដែលរហូតមកដល់ពេលនេះ ដោយមានការសហការជាមួយដៃគូនានា ការដាំកូនឈើនេះ សម្រេចបានជាងមួយម៉ឺនដើមរួចមកហើយ។
អត្ថបទ និងរូបភាព៖ ជា ស្រស់
កែសម្រួល៖ ហាំ ម៉េងហួត
