សាខាកាកបាទក្រហមកម្ពុជា ខេត្តសៀមរាប នាំយកអំណោយផ្ដល់ជូនក្រុមគ្រួសារយុទ្ធជនពលី នៅស្រុកប្រាសាទបាគង
នៅថ្ងៃទី២៩ ខែវិច្ឆិកា ឆ្នាំ២០២៥ ឯកឧត្ដម គុជ លីណា អនុប្រធានអចិន្រ្តៃយ៍គណៈកម្មាធិការសាខាកាកបាទក្រហមកម្ពុជា ខេត្តសៀមរាប បានដឹកនាំក្រុមការងារ ចុះសួរសុខទុក្ខ និងនាំយកអំណោយផ្ដល់ជូនក្រុមគ្រួសារ ប្អូនស្រី ចន ស្រីម៉ុច អាយុ២៨ឆ្នាំ មានសមាជិកគ្រួសារ ៦នាក់ រស់នៅភូមិស្រិតកើត ឃុំកន្ទ្រាំង ស្រុកប្រាសាទបាគង ខេត្តសៀមរាប ដែលត្រូវជាកូនរបស់យុទ្ធជនពលី លោកព្រិន្ទបាល ផាត ចន ដែលបានជួបគ្រោះថ្នាក់ចរាចរណ៍ស្លាប់អំឡុងពេលបំពេញភារកិច្ច កាលពីពេលថ្មីៗនេះ។
មានប្រសាសន៍ក្នុងឱកាសនោះ ឯកឧត្ដម គុជ លីណា បានលើកទឹកចិត្តដល់ប្អូនស្រី ចន ស្រីម៉ុច ដែលបានបោះបង់ការសិក្សាកាលពីថ្នាក់ទី៦ ឱ្យបន្តការសិក្សាឡើងវិញ យ៉ាងហោចណាស់ត្រឹមថ្នាក់ទី៩ ហើយបន្តការសិក្សាជំនាញវិជ្ជាជីវៈបន្ថែម ដើម្បីងាយស្រួលនៅក្នុងការស្វែងរកការងារធ្វើ។ ឯកឧត្ដម ក៏បានសំណូមពរឱ្យអាជ្ញាធរមូលដ្ឋាន ជួយរៀបចំធ្វើបណ្ណសមធម៌ជូនគ្រួសាររបស់គាត់ ដើម្បីទទួលបានការឧបត្ថម្ភនានារបស់សាលា និងទទួលបានអត្ថប្រយោជន៍ពីសង្គម និងសូមថ្លែងអំណរគុណដល់អាជ្ញាធរមូលដ្ឋានដែលបានជួយរកដំណោះស្រាយ និងជួយរៀបចំសម្រួលជូនក្រុមគ្រួសាររបស់ប្អូនកន្លងមកផងដែរ។
សូមជម្រាបថា អំណោយដែលបានផ្ដល់ជូននាឱកាសនោះដែរ រួមមាន៖
សម្ភារផ្ដល់ជូនរួមមាន៖ កង់ ១គ្រឿង, ទឹកដោះគោ ១កេស, កាតាប ២, សៀវភៅ ២០ក្បាល, ប៊ិក ២ដើម, ខ្មៅដៃ ២ដើម, ជ័រលុប ២, ប្រដាប់ខួងខ្មៅដៃ ២ និងស្ករស ១០គីឡូក្រាមផងដែរ៕
ប្រភព៖ សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
