ឯកអគ្គរាជទូតកម្ពុជា ប្រចាំសាធារណរដ្ឋប៊ុលហ្គារី ទទួលបានពានកាក់មាសពី Conncil of Europe’s Scien Tificand cultural Community
នាទីក្រុងសូហ្វីយ៉ា សាធារណរដ្ឋប៊ុលហ្គារី កាលពីសប្តាហ៍កន្លងទៅនេះ ឯកឧត្តមបណ្ឌិត ជា ច័ន្ទបរិបូរណ៍ ឯកអគ្គរាជទូតកម្ពុជា ប្រចាំសាធារណរដ្ឋប៊ុលហ្គារី បានទទួលពានកាក់មាស ក្នុងព្រឹត្តិការណ៍អន្តរជាតិមួយ ដែលរៀបចំដោយ Conncil of Europe’s Scien Tificand cultural Community ដែលមានការចូលរួមរបស់អ្នកសម្ដែង និងតំណាងអន្តរជាតិជាច្រើន។
កាក់មាសនេះត្រូវបានផ្ដល់ឱ្យឯកអគ្គរាជទូត ដើម្បីបង្ហាញអំពីការរួមចំណែកដ៏សំខាន់ក្នុងការលើកកម្ពស់វិស័យវប្បធម៌ និងវិទ្យាសាស្ត្រ និងការចូលរួមក្នុងកម្មវិធីសហប្រតិបត្តិការពហុប្រទេស។
ព្រឹត្តិការណ៍នេះបានរំលឹកឱ្យដឹងពីសមត្ថភាពវិជ្ជាជីវៈ និងការប្រឹងប្រែងយ៉ាងខ្លាំងរបស់ ឯកឧត្តមបណ្ឌិត ជា ច័ន្ទបរិបូរណ៍ ដែលកាន់តំណែងជា ឯកអគ្គរដ្ឋទូតវិសាមញ្ញ និងពេញសមត្ថភាពព្រះរាជាណាចក្រកម្ពុជា ប្រចាំសាធារណរដ្ឋប៊ុលហ្គារី។ ឯកឧត្តមបណ្ឌិត ជា ច័ន្ទបរិបូរណ៍ បានចូលរួមយ៉ាងសកម្មក្នុងកម្មវិធីបឋកថា ទៅកាន់និស្សិត និងសិស្សានុសិស្សមហាវិទ្យាល័យ និងវិទ្យាស្ថានមួយចំនួន នៅសាធារណរដ្ឋប៊ុលហ្គារី។ ការធ្វើបឋកថានេះមិនត្រឹមតែផ្តល់ចំណេះដឹង និងបទពិសោធន៍ដល់និស្សិតតែប៉ុណ្ណោះទេ ប៉ុន្តែថែមទាំងជំរុញការយល់ដឹងអំពីទំនាក់ទំនងវប្បធម៌ និងកិច្ចសហប្រតិបត្តិការអន្តរជាតិ។
ក្នុងសាររបស់ឯកឧត្តមបណ្ឌិត ជា ច័ន្ទបរិបូរណ៍ បានអះអាងថា ការចូលរួមក្នុងកម្មវិធីបឋកថា និងការចែករំលែកចំណេះដឹងជាមួយនិស្សិត គឺជាការផ្តល់ឱកាសដ៏មានតម្លៃសម្រាប់ការលើកកម្ពស់សមត្ថភាពវិជ្ជាជីវៈ និងការយល់ដឹងពិភពលោក។ នេះជាការសម្គាល់ពីសកម្មភាពសំខាន់របស់កម្ពុជាក្រោមការដឹកនាំរបស់ឯកឧត្តមបណ្ឌិត ជា ច័ន្ទបរិបូរណ៍ ក្នុងការលើកកម្ពស់វប្បធម៌ និងវិទ្យាសាស្ត្រនៅកម្រិតអន្តរជាតិ។
កាក់មាស និងការចូលរួមក្នុងកម្មវិធីបឋកថានេះបង្ហាញថា ស្ថានឯកអគ្គរាជទូតកម្ពុជាក្រោមការដឹកនាំរបស់ ឯកឧត្តមបណ្ឌិត ជា ច័ន្ទបរិបូរណ៍ មិនត្រឹមតែជាអ្នកតំណាងរដ្ឋទូតជាទូទៅទេ ប៉ុន្តែថែមទាំងជាអ្នកឯកទេសដែលមានសមត្ថភាព និងចូលរួមយ៉ាងសកម្មក្នុងការលើកកម្ពស់ការអប់រំ ការវិទ្យាសាស្ត្រ និងវប្បធម៌ដល់សហគមន៍អន្តរជាតិ៕
