នៅវេលាម៉ោង១២ នឹង១០នាទី ថ្ងៃទី ១៦ ខែ ធ្នូ ឆ្នាំ២០១៩នេះ កំលាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តសៀមរាប បានចុះបង្ក្រាបបទរក្សាទុកជួញដូរ នឹងប្រើប្រាស់ដោយខុសច្បាប់នូវសារធាតុញៀន នៅចំនុចស្ថិតក្នុងភូមិទ្រាំង សង្កាត់ស្លក្រាម ក្រុង/ខេត្តសៀមរាប ដោយបានធ្វើការឃាត់ខ្លួនជនសង្ស័យចំនួន០៤នាក់ ។
ជនសង្ស័យទាំង ០៤នាក់រួមមាន ទី១ ឈ្មោះ ម៉ៅ ប៊ុនហ៉ីម ភេទប្រុស ឆ្នាំកំណើត១៩៩៨ មុខរបរគ្មាន មានទីលំនៅភូមិបន្ទាយចាស់ សង្កាត់ស្លក្រាម ក្រុង/ខេត្តសៀមរាប ជាប់ពាក់ព័ន្ធករណីរក្សាទុកជួញដូរ នឹងប្រើប្រាស់ហើយមានសារធាតុញៀនក្នុងខ្លួន ,ទី២ ឈ្មោះ សួន សំរេត ភេទប្រុស ឆ្នាំកំណើត១៩៩៨ មុខរបរគ្មាន មានទីលំនៅភូមិអញ្ចាញ សង្កាត់នគរធំ ក្រុង/ខេត្តសៀមរាប ជាប់ពាក់ព័ន្ធករណីរក្សាទុកជួញដូរ នឹងប្រើប្រាស់ ហើយមានសារធាតុញៀនក្នុងខ្លួន ,ទី៣ ឈ្មោះ អៀង កក្កដា ភេទប្រុស ឆ្នាំកំណើត២០០០ មុខរបរគ្មាន មានទីលំនៅភូមិមណ្ឌល៣ សង្កាត់ស្លក្រាម ក្រុង/ខេត្តសៀមរាប ជាប់ពាក់ព័ន្ធករណីរក្សាទុកជួញដូរ នឹងប្រើប្រាស់ហើយមានសារធាតុញៀនក្នុងខ្លួន និងទី៤ ឈ្មោះ សំ ប្រាថ្នា ហៅយ៉ា ភេទប្រុស ឆ្នាំកំណើត២០០០ មុខរបរ គ្មានមានទីលំនៅភូមិបន្ទាយចាស់ សង្កាត់ស្លក្រាម ក្រុង/ខេត្តសៀមរាប ជាប់ពាក់ព័ន្ធករណីរក្សាទុកជួញដូរ នឹងប្រើប្រាស់ហើយមានសារធាតុញៀនក្នុងខ្លួន ។
សមត្ថកិច្ច បានឲ្យដឹងទៀតថា ក្នុងប្រតិបត្តិការនេះដែរកម្លាំនគរបាលជំនាញ បានធ្វើការដកហូតវត្ថុតាងបានមួយចំនួន រួមមាន ម្សៅមេតំហ្វេតាមីនប្រភេទទឹកកកចំនួន ២៩កញ្ចប់ ស្មើនឹងទម្ងន់១០៩,៨ក្រាម ទំងន់សុទ្ធ, ថ្នាំគ្រាប់យ៉ាម៉ាសញ្ញាWY ចំនួន០៩គ្រាប់កន្លះ ស្មើនឹងទម្ងន់០១ក្រាម ទំងន់សុទ្ធ, ថ្នាំគ្រាប់អ៉ិចស្តាស៉ីចំនួន ២៤គ្រាប់ ស្មើនឹងទម្ងន់៤,៩ក្រាម ទំងន់សុទ្ធ, ម្សៅកេតាមីនចំនួន១០កញ្ចប់ ស្មើនឹងទម្ងន់៧,១ក្រាម ទាំងសំបក និងសំភារះវេចខ្ចប់គ្រឿងញៀននឹងឧបករណ៏ប្រើប្រាស់គ្រឿងញៀនមួយចំនួន, ទូរស័ព្ទដៃចំនួន០៥គ្រឿង ហើយបានបញ្ចូនខ្លួនជនសង្ស័យទៅសាលាដំបូងខេត្តសៀមរាប នៅថ្ងៃទី១៧ ខែធ្នូ ឆ្នាំ២០១៩នេះ ៕
អត្ថបទ និង រូបភាព៖ ថាច់ ពិសុទ្ធ
កែសម្រួល៖ អ៊ុន ណារាជ្យ
