នៅព្រឹកថ្ងៃទី ១៧ ខែធ្នូ ឆ្នាំ២០១៩នេះ សិក្ខាកាមកាកបាទក្រហមចំនួន ២២នាក់ មកពី៦រាជធានី ខេត្ត រួមមាន រាជធានីភ្នំពេញ សៀមរាប ពោធិសាត់ បាត់ដំបង បន្ទាយមានជ័យ និងឧត្តរមានជ័យ បានចូលរួមក្នុងវគ្គបណ្ដុះបណ្ដាលមិត្តអប់រំមិត្ត ថ្នាក់ជាតិលើកទី២ ស្ដីពី “យុវជនជាភ្នាក់ងារនៃការផ្លាស់ប្ដូរឥរិយាបទ” នៅសណ្ឋាគារ ហាន គង់ ក្នុងក្រុងសៀមរាប ហើយវគ្គបណ្ដុះបណ្ដាលនេះមានរយៈពេល៦ថ្ងៃ ដោយចាប់ពីថ្ងៃទី ១៧ ដល់២២ ខែធ្នូ ឆ្នាំ២០១៩ ដោយមានការគាំទ្រពីសហព័ន្ធអន្តរជាតិកាកបាទក្រហម អឌ្ឍចន្ទក្រហម តាមរយៈកាកបាទក្រហមកម្ពុជា ។
មានវត្តមានជាគណៈអធិបតិក្នុងឱកាសនោះ លោក លី ប៊ុនណា លេខាធិការសាខាកាកបាទក្រហមកម្ពុជា ខេត្តសៀមរាប
បានមានប្រសាសន៍ពាំនូវការផ្ញើសួរសុខទុក្ខពីឯកឧត្តម ទៀ សីហា ប្រធានគណៈកម្មាធិការសាខា និងសូមស្វាគមន៍យ៉ាងកក់ក្ដៅដល់ លោក លោកស្រី ប្រតិភូ លោកគ្រូ អ្នកគ្រូ មន្ត្រីប្រតិបត្តិ និងប្អូនៗដែលអញ្ជើញមកទឹកដីខេត្តសៀមរាប។
លោកបានបន្តថា ចំពោះការបើកវគ្គបណ្ដុះបណ្ដាលលើកទី២ ស្ដីពី “យុវជនជាភ្នាក់ងារនៃការផ្លាស់ប្ដូរឥរិយាបថវិជ្ជមាន” ក្នុងពេលនេះដែរ គឺដោយសារតែកាកបាទក្រហមកម្ពុជាបានយល់ឃើញថា បច្ចុប្បន្ននេះ ក៏ដូចជាអនាគតប្រទេសជាតិនៅតែត្រូវការយុវវ័យដែលជាទំពាំងស្នងឫស្សី ដែលប្រកបទៅដោយចំណេះដឹង ទាំងបច្ចេកវិទ្យា ក៏ដូចជាត្រូវមានក្រមសីលធម៌ល្អ ដើម្បីរួមចំណែកអភិវឌ្ឍន៍ប្រទេសជាតិស្របតាមសកលភាវូបនីយកម្ម ដែលក្នុងនោះមានយុវជនកម្ពុជាយើង ដែលជាសមាជិកយុវជនក្នុងតំបន់អាស៊ានផងដែរ ។ ដូចនេះ យុវជនកម្ពុជា ត្រូវបន្តខិតខំប្រឹងប្រែងបង្កើនសមត្ថភាពបន្ថែមទៀត ព្រោះថាការរៀនសូត្រ ស្រាវជ្រាវ ជាក្រុម ជាបុគ្គល ពិតជាមានតម្លៃសម្រាប់អភិវឌ្ឍន៍ខ្លួនយើង និងសង្គមជាតិ ៕
ព័ត៌មានជាតិ ថ្មីៗ
អត្ថបទ និង រូបភាព៖ គឿនវេត
