រសៀលថ្ងៃទី៨ ខែមេសា ឆ្នាំ២០២៤ គណៈប្រតិភូរដ្ឋបាលខេត្តសៀមរាប បានបន្តចុះសួរសុខទុក្ខកងទ័ពប្រចាំសមរភូមិមុខ យោធភូមិភាគទី៤ ប្រចាំទិសទី២ និង អង្គភាពវរៈសេនាតូចលេខ១ ចំណុះតំបន់ប្រតិបត្តិការសឹករងសៀមរាប ឈរជើងតំបន់អូរកូនតឹង ស្ថិតភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប តំបន់ព្រៃស្អាក ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរយើងខាងមុខ។
ក្នុងនាម ឯកឧត្តម ប្រាក់ សោភ័ណ អភិបាលខេត្តសៀមរាប លោក សំកុល សុចិត្រា អភិបាលរងខេត្ត មានប្រសាសន៍ថា គិតមកដល់ពេលនេះ រដ្ឋបាលខេត្តសៀមរាប បានបង្កើតអនុស្សរណៈស្តីពីការចងសម្ព័ន្ធមេត្រីជាមួយអង្គភាពជួរមុខចំនួន២ គឺកងពលតូចអន្តរាគមន៍លេខ៥ ចំណុះឱ្យកងពលធំអន្តរាគមន៍លេខ២ និងវរៈសេនាតូចលេខ១ អូរកូនតឹង ចំណុះតំបន់ប្រតិបត្តិការសឹករងសៀមរាប ក្នុងន័យបង្កើនភាពស្និទ្ធស្នាលរវាងសមរភូមិមុខ និងសមរភូមិក្រោយ ឱ្យកាន់តែកៀកជិតជីវភាពរស់នៅរបស់បងប្អូនកងទ័ព។ តាមរយៈចំណងសម្ព័ន្ធមេត្រីភាពនេះ រដ្ឋបាលខេត្ត និងរដ្ឋបាលក្រុង-ស្រុកទាំង១២ និងមន្ទីរ-អង្គភាព តែងតែបានចងភ្ជាប់មនោសញ្ចេតនាឧបត្ថម្ភគាំទ្រ និងចុះជួបសាកសួរសុខទុក្ខ ១ដងក្នុងមួយឆ្នាំ ដោយបាននាំយកនូវអំណោយជាគ្រឿងឧបភោគបរិភោគ និងសម្ភារប្រើប្រាស់ ព្រមទាំងថវិកាឧបត្ថម្ភមួយចំនួនជូនចំពោះកងកម្លាំងប្រដាប់អាវុធ និងក្រុមគ្រួសារ ដើម្បីចូលរួមចែករំលែក គាំទ្រអង្គភាពជួរមុខ និងសម្រាលការលំបាកក្នុងជីវភាពរស់នៅបានមួយកម្រិត ដែលនេះគឺជាផ្លែផ្កានៃចំណងសម្ព័ន្ធមេត្រី រវាងអង្គភាពជួរមុខ និងអង្គភាពជួរក្រោយ ស្របតាមអនុសាសន៍ដឹកនាំដ៏ខ្ពង់ខ្ពស់ របស់សម្តេចតេជោ និងសម្តេចធិបតី ហ៊ុន ម៉ាណែត នាយករដ្ឋមន្ត្រី។
លោកអភិបាលរងខេត្ត ក៏បានលើកទឹកចិត្តឱ្យបងប្អូននាយទាហាន នាយទាហារង និងពលទាហានទាំងអស់ ត្រូវយកចិត្តទុកដាក់ខ្ពស់ទៅលើបញ្ហាសុខភាព អនាម័យ និងត្រូវធ្វើការកសាងជម្រកក្នុងអង្គភាព ព្រមទាំងធ្វើការដាំដុះដំណាំបន្លែ និងចិញ្ចឹមសត្វ ដើម្បីផ្គត់ផ្គង់ជីវភាពកងទ័ពក្នុងអង្គភាព និងគ្រួសារកងទ័ព សំខាន់លើការគ្រប់គ្រង និងថែរក្សានូវគ្រឿងបំពាក់សម្ភារកងទ័ពឱ្យបានល្អក្នុងការទ្រទ្រង់នៅពេលមានសភាពការណ៍ណាមួយកើតឡើង។ លោកក៏បានក្រើនរម្លឹកដល់កងកម្លាំងការពារព្រំដែនទាំងអស់ ត្រូវខិតខំបង្កើនសាមគ្គីភាពផ្ទៃក្នុង ខិតខំបន្តសហការជាមួយកងកម្លាំងជួរមុខ តាមខ្សែបន្ទាត់ព្រំដែនឱ្យបានល្អ ពិសេសជាមួយភាគីថៃ ឱ្យក្លាយជាតំបន់មានសន្តិភាព មិត្តភាព កិច្ចសហប្រតិបត្តិការល្អ និងការអភិវឌ្ឍលើគ្រប់វិស័យ។ មួយវិញទៀត កងកម្លាំងការពារព្រំដែន ក៏ត្រូវចូលរួមក្នុងការបង្ការ ទប់ស្កាត់អំពើរភេរវកម្ម ឧក្រិដ្ឋកម្មឆ្លងដែនខុសច្បាប់ផ្សេងៗ ដូចជាការចរាចរណ៍គ្រឿងញៀនជាដើម។
សូមជម្រាបថា អំណោយជាគ្រឿងឧបភោគបរិភោគដែលបាននាំយកមកប្រគល់ជូននាពេលនេះ សម្រាប់ទីបញ្ជាការប្រចាំទិសទី២ នៃយោធភូមិភាគទី៤ ទទួលបាន៖ ភេសជ្ជ ៥០កេស ,មី៤០កេស ,គោ១ក្បាល និងថវិកា ៥លានរៀល។ ចំណែកអង្គភាពវរៈសេនាតូចលេខ១ មាន៖ ភេសជ្្ជ ៥០កេស ,ប្រេងម៉ាស៊ូត ៥០០លីត្រ ,ពុយដាក់ប្រេង៥ពុយ និងតង់១ ,គោ១ក្បាល ,ជ្រូក៣ក្បាល និងថវិកា១២លានរៀល និងបានចែកជូនយោធិនក្នុងម្នាក់ៗ ៤ម៉ឺនរៀលផងដែរ.
អត្ថបទ និងរូបភាព៖ លោក យូ វង្ស , ជា ស្រស់
កែសម្រួល៖ លោក អ៊ុន ណារាជ្យ
