ប្រធានមន្ទីរវប្បធម៌ និងវិចិត្រសិល្បៈខេត្តសៀមរាប លោក មួន សុភាព បានបង្ហាញថា តាមរយៈផ្ទាំងទស្សនិយភាពល្ខោននិយាយរឿង “ផ្កាស្រពោន” ដែលនឹងសម្ដែងជូនសាធារណជនទស្សនា នាចុងខែកញ្ញា នឹងធ្វើឱ្យសាធារណជនទូទៅ ពិសេសយុវជនជំនាន់ក្រោយ បានស្គាល់ការតែច្បាស់ពីសិល្បៈមួយនេះ ដែលជាសិល្បៈមួយកំពុងប្រឈមនឹងការបាត់បង់ ព្រោះមិនសូវមានក្រុមសម្ដែង និងមិនសូវមានអ្នកគាំទ្រ។
លោក មួន សុភាព នៅថ្ងៃទី២៥ ខែកញ្ញានេះ បានបញ្ជាក់ថា ដើម្បីការជំរុញ និងផ្សព្វផ្សាយពីសិល្បៈខ្មែរមួយនេះ មន្ទីរវប្បធម៌ខេត្តសៀមរាប បានសហការនឹងនាយកដ្ឋានសិល្បៈទស្សនីយភាព និងសិល្បករល្ខោនមហាជនខេត្តសៀមរាប នឹងរៀបចំទស្សនីយភាពខ្មែរទម្រង់សិល្បៈល្ខោននិយាយ រឿង “ផ្កាស្រពោន” ដែលនឹងសម្ដែងជូននាថ្ងៃទី២៨-២៩ ខែកញ្ញា ឆ្នាំ២០២៤ ចាប់ពីម៉ោង៥ល្ងាចតទៅ នៅផ្សារហេរីថេកវ៉ក ក្រុងសៀមរាប ជាមួយនឹងការទស្សនាដោយសេរី។
លោកបន្ថែមថា នេះជាលើកទី១ នៃការរៀបចំផ្ទាំងទស្សនិយភាពមួយនេះ ទោះបីជាមានពេលវេលាខ្លី ប៉ុន្តែពួកគាត់មានការលះបង់ខ្ពស់ក្នុងការហ្វឹកហាត់ ហើយតាមរយៈការហ្វឹកហាត់នេះ ឃើញថាក្រុមសិល្បៈយើងមានភាពល្អប្រសើរក្នុងការសម្ដែងផងដែរ។ ក្នុងនោះលោកក៏រំពឹងថា ផ្ទាំងទស្សនិយភាពមួយនេះ នឹងធ្វើឱ្យសាធារណជនទូទៅស្គាល់កាន់តែច្បាស់ពីសិល្បៈខ្មែរមួយនេះ។ ហើយបើសិនជាការសម្ដែងលើកនេះទទួលបានជោគជ័យ មន្ទីរនឹងបន្តរៀបចំផ្ទាំងទស្សនិយភាពមួយនេះបន្តទៀត ជាពិសេសនោះគឺការត្រៀមបង្កើតនូវសាច់រឿងផ្សេងៗ នឹងដាក់ជាផែនការនៃផ្ទាំងទស្សនិយភាពប្រចាំឆ្នាំផងដែរ។
ព័ត៌មានជាតិ ថ្មីៗ
លោកប្រធានមន្ទីរក៏សូមអំពាវនាវដល់សាធារណជនទូទៅ សូមចូលរួមគាំទ្រ និងផ្សព្វផ្សាយពីសិល្បៈល្ខោននិយាយនេះ ខ្មែរឱ្យបានផុសផុល ព្រោះវាជាចំណែកមួយក្នុងការផ្សព្វផ្សាយអំពីវប្បធម៌ខ្មែរដែលមានតាំងពីដូនតា ហើយក៏ជាការលើកទឹកចិត្តដល់ក្រុមសិល្បករយើងដែលមានឆន្ទៈខ្ពស់ក្នុងការខិតខំហ្វឹកហាត់ និងជាផ្នែកមួយក្នុងការទាក់ទាញភ្ញៀវទេសចរ បានស្វែងយល់ពីវប្បធម៌ខ្មែរថែមទៀតផង៕
អត្ថបទ៖ លោក អ៊ុន ណារាជ្យ
