សម្រាប់បិណ្ឌទី៩ នៃពិធីបុណ្យភ្ជុំបិណ្ឌ នៅថ្ងៃទី២៦ ខែកញ្ញា ឆ្នាំ២០២៤នេះ ឯកឧត្តម លោកជំទាវក្រុមប្រឹក្សា គណៈអភិបាល ថ្នាក់ដឹកនាំខេត្តសៀមរាប រួមជាមួយថ្នាក់ដឹកនាំមន្ទីរអង្គភាព មន្រ្តីរាជការ បាននាំយកនូវគ្រឿងឧបភោគបរិភោគ និងបច្ច័យមួយចំនួន ចូលរួមកាន់បិណ្ឌនៅវត្តប្រាសាទគោកចក ក្រុងសៀមរាប ដើម្បីឧទ្ទិសកុសលជូនដល់បុព្វការីជន មានជីដូនជីតា ញាតិការទាំងប្រាំពីរសន្ដាន រួមនឹងយុទ្ធជនយុទ្ធនារី ដែលបានលះបង់អាយុជីវិត ដើម្បីការពារជាតិមាតុភូមិ និងបានចែកឋានទៅកាន់សុគតិភព។
ព្រះគ្រូវិចិត្រវង្សា ហែម គឹមសាន ញាតិធម្មោ ព្រះចៅអធិការវត្ត បានថ្លែងអំណរគុណ និងកោតសរសើរនូវសទ្ធាជ្រះថ្លារបស់ថ្នាក់ដឹកនាំខេត្ត និងប្រជាពុទ្ធបរិស័ទក្នុងខេត្តសៀមរាប ដែលតែងតែជួយឧបត្ថម្ភគាំទ្រដល់វិស័យពុទ្ធសាសនាជាបន្តបន្ទាប់ មិនថាតែពិធីកាន់បិណ្ឌ ភ្ជុំបិណ្ឌឬពិធីបុណ្យដទៃៗទៀតនោះទេ ដែលនេះបានបង្ហាញឱ្យឃើញពីស្មារតីគោរពព្រះពុទ្ធសាសនាដែលជាសាសនារបស់រដ្ឋ ដែលញ៉ាំងឱ្យវិស័យពុទ្ធចក្រនៅកម្ពុជា កាន់តែរឹងមាំ និងរីកចម្រើនឡើងផងដែរ។
ព្រះអង្គមានថេរៈដីកាថា វិស័យព្រះពុទ្ធសាសនានៅកម្ពុជា អាចរីកចម្រើនទៅបានគឺអាស្រ័យ ដោយប្រទេសជាតិមានសុខសន្តិភាពពេញលេញ ហើយដោយសារសុខសន្តិភាពនេះហើយ ទើបប្រជាពុទ្ធបរិស័ទមានឱកាសប្រកបកិច្ចការរកស៊ីជួញដូរដោយមិនមានការភ័យខ្លាច ដែលញ៉ាំងឱ្យកម្រិតសេដ្ឋកិច្ច និងជីវភាពក្នុងគ្រួសារចេះតែរីកលូតលាស់ ហើយពួកគាត់រីករាយនិងជ្រះថ្លាក្នុងការមកធ្វើបុណ្យទានផ្សេងៗ មានសុខសន្តិភាពទើបយើងមានឱកាសបានបំពេញបុណ្យតាមទៅកាលវេលា តាមគន្លងប្រពៃណីពីជីដូនជីតាបានពេញលេញដោយគ្មានក្តីបារម្ភ។
ព័ត៌មានជាតិ ថ្មីៗ
លោក លី សារី អភិបាលរងខេត្តសៀមរាប មានប្រសាសន៍ថា ក្នុងនាមជាពុទ្ធសាសនិកជន និងគោរពជឿជាក់យ៉ាងមុតមាំក្នុងព្រះពុទ្ធសាសនា ជាពិសេសដើម្បីថែរក្សានូវវប្បធម៌ ប្រពៃណីសាសនាខ្មែរ ឱ្យគង់វង្សឋិតថេរយូរអង្វែងតរៀងទៅ ក្នុងឱកាសនៃពិធីដ៏ធំនេះជារៀងរាល់ឆ្នាំ ថ្នាក់ដឹកនាំ រដ្ឋបាលខេត្តសៀមរាប ព្រមទាំងថ្នាក់ដឹកនាំមន្ដ្រីរាជការជុំវិញខេត្ត តែងតែចូលរួមពិធីបុណ្យកាន់បិណ្ឌនៅតាមវត្តអារាមនានាយ៉ាងខ្ជាប់ខ្ជួន តាមគន្លងប្រពៃណីព្រះពុទ្ធសាសនា មិនដែលអាក់ខានឡើយ ដើរតាមមាគា៌ព្រះពុទ្ធសាសនា ជាសាសនារបស់រដ្ឋ៕
អត្ថបទ និងរូបភាព៖ លោក យូ វង្ស, ទ្រា ពន្លឺ
កែសម្រួល៖ លោក អ៊ុន ណារាជ្យ
