គម្រោងជួសជុលផ្លូវដីស ក្រាលក្រួសក្រហមចំនួន ៦ខ្សែ ដែលជាគម្រោងមូលនិធិឃុំពង្រលើ និងឃុំពង្រក្រោម ស្រុកជីក្រែង ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី០១ ខែវិច្ឆិកា ឆ្នាំ២០២៣នេះ ដោយមានការចូលរួមពីមន្រ្តីបច្ចេកទេសសាលាខេត្ត អាជ្ញាធរស្រុក គណៈកម្មការលទ្ធកម្មឃុំទាំងពីរ រួមទាំងតំណាងក្រុមហ៊ុនដែលបានចូលរួមដេញថ្លៃ។
បើតាមលោក ខៀវ ប៊ុនឈឿន ប្រធានគណៈកម្មការលទ្ធកម្មឃុំពង្រលើ បានឲ្យដឹងថា សម្រាប់គម្រោងមូលនិធិឃុំឆ្នាំ២០២៣ ឃុំពង្រលើ បានដាក់ដេញថ្លៃគម្រោងជួសជុលផ្លូវដីសក្រាលក្រួសក្រហមចំនួន ៣ខ្សែ ប្រវែង ១.២៩៩ម៉ែត្រ ទទឹង ៥ម៉ែត្រ ជើងទេផ្លូវ M=១,៥ម៉ែត្រ កម្រាស់ក្រួសក្រហម ០.១៥ម៉ែត្រ សាងសង់លូមូលកាត់ផ្លូវមានប្រវែង ៧ម៉ែត្រ ទំហំមុខកាត់០.៨ ចំនួន៣កន្លែង មានចំនួន ៤កង់ និងស្លាកសញ្ញាគម្រោងចំនួន១ ។ គម្រោងនេះមានតម្លៃប៉ាន់ស្មាន ១១៣.៨៤៥.៩១៦រៀល ដោយមានក្រុមហ៊ុនម៉ៅការដាក់សំណើរចំនួន ៤ក្រុមហ៊ុន។ ជាលទ្ធផលបានទៅលើក្រុម ង៉ោ ឈុត ក្នុងតម្លៃ ១១២.៣០០.០០០រៀល។
ចំណែកឯប្រធានគណៈកម្មការលទ្ធកម្មឃុំពង្រក្រោម ក៏បានឲ្យដឹងដែរថា សម្រាប់គម្រោងមូលនិធិឃុំឆ្នាំ២០២៣ ឃុំពង្រក្រោម បានដាក់ដេញថ្លៃគម្រោងជួសជុលផ្លូវដីសក្រាលក្រួសក្រហមចំនួន ៣ខ្សែ មានប្រវែង ៦៨២ម៉ែត្រ ទទឹងផ្លូវ៥ម៉ែត្រ កម្រាស់០,១៥ម៉ែត្រ ជើងផ្លូវ M=០.១៥ម៉ែត្រ សាងសង់លូកាត់ផ្លូវចំនួន ៤កន្លែង លូមូលភ្លោះទំហំមុខកាត់ ១ម៉ែត្រ ប្រវែង ៧ម៉ែត្រ ២កន្លែង លូមូលទោលទំហំមុខកាត់ ១ម៉ែត្រ ប្រវែង ៧ម៉ែត្រ ១កន្លែង និង លូមូលទោលទំហំមុខកាត់ ០.៨ម៉ែត្រ ប្រវែង ៧ម៉ែត្រ ១កន្លែងផងដែរ រួមនិងស្លាកគម្រោងចំនួន១ ។ គម្រោងនេះមានតម្លៃប៉ាន់ស្មាន ១០៩.៩៩៩.១៣៤រៀល ដោយមានក្រុមហ៊ុនម៉ៅការដាក់សំណើរចំនួន ៤ក្រុមហ៊ុន។ ជាលទ្ធផលបានទៅលើក្រុម ធីធី អេសបៀល ក្នុងតម្លៃ ១០៨.៩០០.០០០រៀល។
ក្រោយពីបញ្ចប់ការដេញថ្លៃ តំណាងក្រុមហ៊ុនដែលទទួលបានការម៉ៅការទាបជាងគេចំពោះគម្រោងជួសជុលផ្លូវខាងលើ បានធ្វើការប្ដេជ្ញាចិត្តដោយសន្យាថា នឹងធ្វើឲ្យបានទាន់ពេលវេលា ត្រឹមត្រូវ ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ ពិសេសគោរពទៅតាមលក្ខណ្ឌដូចមានចែងនៅក្នុងកិច្ចសន្យាផងដែរ៕
អត្ថបទ និងរូបភាព៖ លោក ស៊ុន គីន
កែសម្រួល៖ លោក អ៊ុន ណារាជ្យ
