នារសៀលថ្ងៃទី១ ខែវិច្ឆិកា ឆ្នាំ២០២៣ ឯកឧត្តម ឃុន សាវឿន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ឯកឧត្តម Justin Whyatt ឯកអគ្គរដ្ឋទូតអូស្ត្រាលី ប្រចាំនៅកម្ពុជា និងលោក ពិន ប្រាកដ អភិបាលរងខេត្តសៀមរាប បានអញ្ជើញសម្ពោធឱ្យប្រើប្រាស់ជាផ្លូវការនូវ ជណ្កើរត្រី ដែលមានតម្លៃជិត ១០ម៉ឺនដុល្លារអាមេរិក ស្ថិតនៅភូមិស្លែង ឃុំស្រណាល ស្រុកក្រឡាញ់ ខេត្តសៀមរាប។
ជណ្ដើរត្រី គឺជាសំណង់ដាក់ទៅក្នុងទឹក ដែលជួយសម្រួលដល់ការបំលាស់ទីរបស់ត្រីទៅតាមរដូវរបស់វា។ ឧបសគ្គ ដែលរារាំងក្នុងការធ្វើបំលាស់ទីរបស់ត្រី រួមមាន ទំនប់ និងទំបន់ធារាសាស្ត្រ បើគ្មានជណ្ដើត្រីទេ វាហាក់ដូចជាត្រីគ្មានផ្លូវធ្វើចរាចរណ៍ចុះឡើងដូច្នេះដែរ។ ដូចនេះ ជណ្ដើរត្រី វាមានអត្ថប្រយោជន៍ជួយស្តារការផ្លាស់ទីរបស់ត្រី និងតភ្ជាប់ឡើងវិញនូវផ្លូវទឹកដែលល្អ រវាងបឹងទន្លេសាប និងសហគមន៍មូលដ្ឋាននៅតាមដងទន្លេ ព្រមទាំងផ្លូវនេសាទ ដែលផ្តល់អត្ថប្រយោជន៍ដល់ប្រជាពលរដ្ឋទាំងផ្នែកសង្គម និងសេដ្ឋកិច្ច។ ជណ្តើរត្រីនេះផងដែរ នឹងជួយកាត់បន្ថយផលប៉ះពាល់បណ្តាលមកពីការអភិវឌ្ឍប្រព័ន្ធធារាសាស្រ្ត ដូចជានិយតករ ទំនប់ទឹក ទៅលើការផ្លាស់ទីរបស់ត្រី៕
ព័ត៌មានជាតិ ថ្មីៗ
ក្នុងអាជ្ញាធរខេត្ត លោក ពិន ប្រាកដ បានថ្លែងអំណរគុណដល់រាជរដ្ឋាភិបាលអូស្រ្តាលី តាមរយៈក្រសួងកសិកម្ម រុក្ខាប្រមាញ់ និងនេសាទ ក្រសួង ស្ថាប័នពាក់ព័ន្ធ ព្រមទាំងអាជ្ញាធរមានសមត្ថកិច្ចពាក់ព័ន្ធ ដែលតែងតែបង្កលក្ខណៈងាយស្រួល សម្រាប់កិច្ចដំណើការប្រព្រឹត្តិទៅនៃការសាងសង់ជណ្តើរត្រីបង្ហាញទំនប់ស្លែង ក្នុងភូមិសាស្រ្តខេត្តសៀមរាប។
លោកអភិបាលរងខេត្ត ក៏បានសំណូមពរដល់ អាជ្ញាធរមូលដ្ឋាន និងប្រជាពលរដ្ឋទូទាំងខេត្ត សូមចូលរួមថែរក្សាធនធានក្នុងទឹក ជាពិសេសត្រូវចូលរួមការពារទីតាំង “ជណ្តើរត្រីនៅទំនប់ស្លែង” ដែលជាផ្លូវសុវត្ថិភាពសម្រាប់ត្រីបំលាស់ទីប្រកបដោយប្រសិទ្ធភាព។ មួយវិញទៀត សូមប្រជាពលរដ្ឋ ធ្វើការនេសាទត្រី ឱ្យបានឆ្ងាយពីទីតាំងជណ្តើរត្រីដើម្បីជៀសវាងផលប៉ះពាល់ដល់ការបំលាស់ទី របស់ត្រីឆ្លងកាត់តាមជណ្តើរត្រី។
ឯកឧត្តម ឃុន សាវឿន បានគូសបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ បានកំណត់គោលដៅអាទិភាពសម្រាប់សាងសង់ជណ្តើរត្រីបង្ហាញនៅទំនប់ស្លែងនេះ គឺដើម្បីជួយស្ដារទិន្នផលត្រីនៅក្នុងស្ទឹងផ្លោង និងវារីសត្វផ្សេងៗទៀត ដែលជាគុណប្រយោជន៍បម្រើរ ជូនតម្រូវការម្ហូមអារហាររបស់ប្រជាពលរដ្ឋនៅក្នុងតំបន់។ តាមរយៈការស្រាវជ្រាវនិងផ្តល់ជំនួយរបស់ Australian Aid មជ្ឈមណ្ឌលអូស្ត្រាលីសម្រាប់ការ ស្រាវជ្រាវកសិកម្មអន្តរជាតិ (ACIAR) និងក្រោមកិច្ចសហការជាមួយរាជរដ្ឋាភិបាលកម្ពុជា ជណ្តើរត្រីមានសក្តានុពល ធានានូវប្រសិទ្ធិភាពបំលាស់ទីរបស់ត្រីក្នុងអាងទឹកធម្មជាតិ ជួយបង្កើនផលិតភាពធនធានជលផល និងជួយគាំទ្រការអភិរក្សត្រីធម្មជាតិរបស់ប្រទេសកម្ពុជា ហើយគុណប្រយោជន៍នៃជណ្តើរត្រីត្រូវបានទទួលស្គាល់ដោយរាជរដ្ឋាភិបាលកម្ពុជាក្នុងបរិបទនៃការងារ គ្រប់គ្រង និងធានាបាននិរន្តរភាពនៃការគ្រប់គ្រងធនធានជលផល។ ជាមួយនោះ ការគិតគួរបញ្ចូលផែនការសាងសង់ ជណ្តើរត្រីផែនការសង់ទំនប់គឺបានឆ្លើយតបទៅនឹង អនុសាសន៍ សម្តេចធិបតី នាយករដ្ឋមន្ត្រីនៃព្រះរាជាណាចក្រកម្ពុជា ពាក់ព័ន្ធទៅនឹងការគ្រប់គ្រង និង អភិវឌ្ឍន៍វិស័យជលផលជាពិសេសនៅតំបន់បឹងទន្លេសាប។
បន្ថែមលើសពីននោះ ឯកឧត្តម ក៏បានបញ្ជាក់ផងដែរថា ក្រសួងកសិកម្ម រុក្ខា ប្រមាញ់ និងនេសាទ បានស្នើសុំជំនួយបច្ចេកទេសអន្តរជាតិ ពីមជ្ឈមណ្ឌលអូស្ត្រាលី សម្រាប់ការស្រាវជ្រាវកសិកម្មអន្តរជាតិ ដើម្បីពង្រឹងសមត្ថភាព មន្ត្រីនៃរដ្ឋបាលជលផល និស្សិតជំនាញជលផល ជំនាញបរិស្ថាន និងជំនាញធារាសាស្ត្រ ព្រមទាំងក្រុមជំនាញការវិស្វកម្មសាងសង់នៃក្រសួង ធនធានទឹក និងឧតុនិយម ដើម្បីបង្កើនចំណេះដឹង និងជំនាញក្នុងការវាយតម្លៃទំនប់បញ្ចូលផែនការ សាងសង់ និងការរចនាប្លង់ជណ្តើរត្រី តាមរយៈ គម្រោងបច្ចេកវិទ្យាសាងសង់ជណ្ដើរត្រីនៅតំបន់អាស៊ីអាគ្នេយ៏ (FishTech)ផងដែរ។
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក សេង ផល្លី
