នៅថ្ងៃទី២០ ខែវិច្ឆិកា ឆ្នាំ២០២៥នេះ រដ្ឋបាលខេត្តសៀមរាប បានបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៤ ឆ្នាំ២០២៥ សម្រាប់គោលដៅទី១ ស្រុកស្រីស្នំ ក្នុងគោលបំណងជំរុញយន្តការពិគ្រោះយោបល់ ដើម្បីស្វែងរកដំណោះស្រាយរួមចំពោះបញ្ហាប្រឈមនានា ពង្រឹងគុណភាពអភិបាលកិច្ចមូលដ្ឋាន និងធានាឱ្យរាល់កិច្ចខិតខំប្រឹងប្រែងអភិវឌ្ឍន៍របស់ខេត្ត ស្របតាមទិសដៅយុទ្ធសាស្ត្រជាតិ សំដៅកាត់បន្ថយភាពក្រីក្រ និងធានាចីរភាពនៃការអភិវឌ្ឍសេដ្ឋកិច្ចសង្គម ក្រោមការដឹកនាំដោយ ឯកឧត្តម លី សំរិទ្ធ ប្រធានក្រុមប្រឹក្សាខេត្តសៀមរាប និង លោក អ៊ឹង គឹមលាង អភិបាលរងខេត្ត។
លោក អ៊ឹង គឹមលាង មានប្រសាសន៍ថា វេទិកានាពេលនេះ ជាការបើកចំហរក្នុងការទទួលយកមតិយោបល់របស់បងប្អូនប្រជាពលរដ្ឋក្នុងមូលដ្ឋាន។ ជាមួយគ្នានេះ ក្រុមការងារបានបង្ហាញការប្ដេជ្ញាចិត្តខ្ពស់ក្នុងការកែទម្រង់ និងធ្វើទំនើបកម្មស្ថាប័នរដ្ឋ ដើម្បីប្រែក្លាយរដ្ឋបាលសាធារណៈឱ្យក្លាយជា សេវាសាធារណៈមួយដែលមានគុណភាព និងការទទួលខុសត្រូវខ្ពស់។
ការចូលរួមពីគ្រប់មជ្ឈដ្ឋានក្នុងវេទិកានេះ នឹងក្លាយជាកម្លាំងចលករដ៏មានប្រសិទ្ធភាពក្នុងការអនុវត្តនូវយុទ្ធសាស្ត្រអភិវឌ្ឍន៍ មនុស្ស ផ្លូវ ទឹក ភ្លើង និងបច្ចេកវិទ្យា ដែលជាអាទិភាពគន្លឹះរបស់ខេត្ត។
ឯកឧត្តម លី សំរិទ្ធ ប្រធានក្រុមប្រឹក្សាខេត្ត បានគូសបញ្ជាក់ថា វេទិកាផ្សព្វផ្សាយ និងពិគ្រោះយោបល់នេះ គឺជាការអនុវត្តន៍ជាក់ស្ដែងនៃការពង្រឹងសមត្ថភាពអភិបាលកិច្ច និងលើកកម្ពស់គុណភាពស្ថាប័ន ដូចមានចែងក្នុងយុទ្ធសាស្ត្រអាទិភាពទាំង៥ របស់ខេត្ត។ វេទិកានេះបង្ហាញពីភាពជិតស្និតរវាងថ្នាក់រដ្ឋបាលខេត្ត ក្រុងស្រុក ឃុំសង្កាត់ កងកម្លាំងប្រដាប់អាវុធ សិស្សានុសិស្ស ប្រជាពលរដ្ឋ និងអង្គការសង្គមស៊ីវិល។
ឯកឧត្តមក៏បានសម្ដែងនូវក្ដីសង្ឃឹមយ៉ាងមុតមាំថា លទ្ធផលនៃកិច្ចពិគ្រោះយោបល់នេះ នឹងជួយធានាឱ្យបាននូវចីរភាពនៃការអភិវឌ្ឍសង្គម សេដ្ឋកិច្ច តាមរយៈការសម្រេចបាននូវកំណើនសេដ្ឋកិច្ច ការបង្កើតការងារ និងការលើកកម្ពស់ជីវភាពប្រជាពលរដ្ឋ។
សូមជម្រាបថា វេទិកានាពេលនេះដែរ ក្រុមការងារទទួលបាននូវសំណួរ សំណូមពរចំនួន២៥ ក្នុងនោះសំណួរសំណូមពរផ្ទាល់មាត់ចំនួន៤ ត្រូវបានមន្ត្រីជំនាញធ្វើការស្រាយបំភ្លឺ និងសំណួរសំណូមពរជាលាយលក្ខអក្សរចំនួន២១ ត្រូវបានក្រុមការងារប្រមូលទុកដើម្បីដោះស្រាយ និងបំភ្លឺជូននាពេលក្រោយនៅតាមមូលដ្ឋានបងប្អូនប្រជាពលរដ្ឋផ្ទាល់៕
អត្ថបទ និងរូបភាព៖ លោក ឡៃ បញ្ញា
កែសម្រួល៖ លោក អ៊ុន ណារាជ្យ
