នៅព្រឹកថ្ងៃទី៨ ខែធ្នូ ឆ្នាំ២០២៥នេះ ក្រុមការងាររាជរដ្ឋាភិបាលចុះមូលដ្ឋានឃុំរំចេក ស្រុកបន្ទាយស្រី ខេត្តសៀមរាប រៀបចំវេទិកាសាធារណៈ ដើម្បីប្រមូលក្ដីកង្វល់ប្រជាពលរដ្ឋមកដោះស្រាយ ជំរុញការអភិវឌ្ឍគ្រប់វិស័យក្នុងមូលដ្ឋាន ក្រោមការដឹកនាំដោយ លោកជំទាវ ទិត្យ ច័ន្ទតារីន អនុប្រធានក្រុមការងាររាជរដ្ឋាភិបាលចុះមូលដ្ឋានឃុំរំចេក នឹងមានការចូលរួមពីលោកប្រធានក្រុមប្រឹក្សាស្រុក អភិបាលស្រុក ក្រុមការងារ មន្ត្រីពាក់ព័ន្ធ និងប្រជាពលរដ្ឋជាច្រើនរូប។
លោកជំទាវ ទិត្យ ច័ន្ទតារីន មានប្រសាសន៍ថា វេទិកានាពេលនេះ ជាការបើកចំហក្នុងការទទួលយកមតិយោបល់ពីបងប្អូនប្រជាពលរដ្ឋក្នុងមូលដ្ឋាន។ ក្នុងន័យនេះ សូមស្នើដល់បងប្អូនប្រជាពលរដ្ឋលើកឡើងជាសំណួរ សំណូមពរមកក្រុមការងារ ដើម្បីក្រុមការងារទទួលបានព័ត៌មាននានា ដែលជាសមិទ្ធផល បញ្ហាប្រឈម និងសំណូមពរ ដែលជាតម្រូវការរបស់បងប្អូន ដើម្បីក្រុមការងារធ្វើការពិនិត្យពិភាក្សា ឆ្លើយបំភ្លឺ និងដោះស្រាយ ព្រោះវាជាគន្លឹះសម្រាប់ស្រុក ឃុំ យកទៅធ្វើការអភិវឌ្ឍនៅក្នុងមូលដ្ឋាន ដើម្បីផលប្រយោជន៍របស់ប្រជាពលរដ្ឋ។
សូមជម្រាបថា វេទិកានាពេលនេះ ក្រុមការងារបានទទួលសំណួរ សំណូមពរសរុប៧ ពីប្រជាពលរដ្ឋ ពាក់ព័ន្ធទៅនឹងបញ្ហាដីធ្លី, ការស្នើសុំជួសជុលផ្ទះក្នុងតំបន់អាជ្ញាធរជាតិអប្សរា, បញ្ហាប្រព័ន្ធធារាសាស្ត្រ, ការគ្រប់គ្រងស្ទឹង បឹង ត្រពាំង, បញ្ហាកសិដ្ឋានចិញ្ចឹមជ្រូកមានក្លិនប៉ះពាល់ប្រជាពលរដ្ឋជាដើម ដែលបញ្ហាទាំងនេះត្រូវបានមន្ត្រីជំនាញបកស្រាយ និងឆ្លើយបំភ្លឺជូនភ្លាមៗផងដែរ។
ថ្លែងបិទវេទិកា លោកជំទាវអនុប្រធានក្រុមការងារ បានជំរុញដល់មន្ត្រីពាក់ព័ន្ធ និងអាជ្ញាធរមូលដ្ឋាន បន្តយកចិត្តទុលដាក់ក្នុងការផ្ដល់សេវាសាធារណៈជូនប្រជាពលរដ្ឋ បន្តអនុវត្តគោលនយោបាយភូមិឃុំសង្កាត់ មានសុវត្ថិភាព ដើម្បីធានាបាននូវភាពសុខដុមរមនា និងសុខសាន្តរបស់ប្រជាពលរដ្ឋ។ ជាពិសេស សូមឱ្យអាជ្ញាធរទាំងអស់ ចូលរួមផ្ដល់កិច្ចសហការជូនប្រជាពលរដ្ឋលើតម្រូវការនានាជាមួយអាជ្ញាធរជាតិអប្សរា ដូចជាការងារដីធ្លី ការសាងសង់ ឬជួសជុលលំនៅឋាន ព្រោះយើងដឹងហើយថា តំបន់ជាប់អាជ្ញាធរអប្សរាជាតំបន់បុរាណដ្ឋាន ដែលជាការងារស្មុគស្មាញ ទាមទារឱ្យមានការផ្ដល់កិច្ចសហការពីគ្រប់អ្នកពាក់ព័ន្ធដោះស្រាយ៕
អត្ថបទ និងរូបភាព៖ លោក អ៊ុន ណារាជ្យ
