នៅថ្ងៃទី១០ ខែធ្នូ ឆ្នាំ២០២៥ ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និងលោកជំទាវ ព្រមទាំងក្រុមការងារ និងសប្បុរសជន បានប្រគល់អំណោយជាគ្រឿងឧបភោគបរិភោគ និងថវិកាមួយចំនួនជូនដល់អង្គភាពវរសេនាតូចលេខ៤៤១ ចំណុះតំបន់ប្រតិបត្តិការសឹករងសៀមរាប ដើម្បីចូលរួមចែករំលែក ជួយសម្រួលការលំបាកដល់អង្គភាពទ័ព ហើយក្នុងនាមអ្នកសមរភូមិក្រោយតែងតែគាំទ្រអង្គភាពជួរមុខជានិច្ច និងជួយសម្រាលការលំបាកក្នុងជីវភាពប្រចាំថ្ងៃបានមួយកម្រិត។
លោកវរសេនីយ៍ឯក មឿង សាវន់ មេបញ្ជាការរងតំបន់ប្រតិបត្តិការសឹករងសៀមរាប បានសម្ដែងនូវអំណរគុណយ៉ាងជ្រាលជ្រៅ ចំពោះទឹកចិត្តដ៏ស្មោះសរ នៃក្រុមការងារនិងសប្បុរសជន និងកោតសរសើរនូវសកម្មភាព អ្នកឧកញ៉ា សៀង ណាំ និងសប្បុរសជន ដែលតែងតែបានផ្សាភ្ជាប់មនោសញ្ចេតនា រួមសុខរួមទុក្ខជាមួយសមរភូមិមុខក្នុងគ្រប់កាលៈទេសៈ ជាពិសេសលើការឧបត្ថម្ភស្បៀងអាហារ ថវិកា សម្ភារប្រើប្រាស់ប្រចាំថ្ងៃ ទាំងពេលនេះ និងពេលកន្លងមក។
លោកបញ្ជាក់ថា នៅចំពោះមុខសភាពការកំពុងតែក្ដៅគគុកនៅតាមបណ្ដោយព្រំដែនកម្ពុជា-ថៃ អង្គភាពវរសេនាតូច៤៤១ បានត្រៀមលក្ខណៈ និងប្ដេជ្ញាចិត្តតស៊ូការពារឱ្យខាងតែបាននូវបូរណភាពទឹកដីក្នុងភូមិសាស្រ្តរបស់ខ្លួន និងស្ដាប់អនុវត្តជានិច្ចនូវរាល់បទបញ្ជារបស់ប្រមុខរាជរដ្ឋាភិបាល។
ឯកឧត្តម ឧកញ៉ា សៀង ណាំ បានថ្លែងកោតសរសើរនូវស្មារតី និងទឹកចិត្តប្រុងប្រយ័ត្នគ្រប់ពេលវេលារបស់អង្គភាពទ័ពជួរមុខ និងប្រសិទ្ធពរជ័យមហាប្រសើរ ជូនចំពោះនាយទាហាន និងពលទាហានចំណុះតំបន់ប្រតិបត្តិការសឹករងសៀមរាប ទាំងអស់។ ឯកឧត្តមថា ក្នុងនាមជាអ្នកនៅសមរភូមិក្រោយមិនដែលភ្លេចសោះឡើយអ្នកនៅសមរភូមិមុខ និងសូមកោតសរសើរដោយស្មោះនូវពលិកម្ម និងស្មារតីអង់អាចក្លាហានរបស់បងប្អូនកងទ័ពទាំងអស់ដែលកំពុងប្រយុទ្ធការពារទឹកដីរបស់យើង ហើយតាមរយៈពលិកម្មនេះ សូមបន្តរួមគ្នារក្សាសាមគ្គីភាពឯកភាពរឹងមាំនិងជ្រោងខ្ពស់ស្មារតីស្នេហាជាតិក្នុងការបំពេញភារកិច្ចការពារបូរណៈភាពទឹកដីពីសត្រូវឈ្លានពាន។
ឯកឧត្តម ក៏បានសំដែងនូវការដឹងគុណជាទីបំផុត ចំពោះទឹកចិត្តមោះមុតក្លាហានរបស់វីរយុទ្ធជន ដែលកំពុងឈរជើងនៅសមរភូមិតាមព្រំដែន ក្នុងការការពារបូរណភាពទឹកដីប្រឆាំងនឹងការឈ្លានពានរបស់កងទ័ពថៃ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
