នៅថ្ងៃទី១០ ខែធ្នូ ឆ្នាំ២០២៥ ក្រុមប្រឹក្សាខេត្តសៀមរាប បានបន្ដបើកវេទិកាផ្សព្វផ្សាយ និងពិគ្រោះយោបល់របស់ខ្លួន ដើម្បីប្រមូលបញ្ហាប្រឈម រួមនឹងក្ដីកង្វល់ប្រជាពលរដ្ឋមកដោះស្រាយ សម្រាប់គោលដៅស្រុកសូទ្រនិគម ក្រោមការដឹកនាំរបស់ ឯកឧត្ដម លី សំរិទ្ធ ប្រធានក្រុមប្រឹក្សាខេត្ត និង លោក អ៊ឹង គឹមលាង អភិបាលរងខេត្ត ដោយមានការចូលរួមពីក្រុមការងារ តំណាងមន្ទីរអង្គភាព សិស្សានុសិស្ស និងប្រជាពលរដ្ឋជាច្រើនរូប។
លោក អ៊ឹង គឹមលាង អភិបាលរងខេត្ត មានប្រសាសន៍ថា វេទិកានាពេលនេះ រៀបចំឡើងដើម្បីផ្ដល់ឱកាសឱ្យបងប្អូនប្រជាពលរដ្ឋ បានលើកឡើងពីក្ដីកង្វល់ និងបញ្ហាប្រឈមក្នុងមូលដ្ឋាន ឱ្យមន្រ្ដីជំនាញធ្វើការបំភ្លឺ និងដោះស្រាយ តាមតួនាទី និងវិស័យនីមួយៗ ក្នុងន័យអភិវឌ្ឍមូលដ្ឋានឱ្យបានកាន់តែល្អប្រសើរ និងឆាប់រហ័ស។ លោកក៏បានជំរុញដល់មន្ត្រីជំនាញទាំងអស់ ដែលជាប់ពាក់ព័ន្ធនឹងក្ដីកង្វល់ប្រជាពលរដ្ឋ បន្ដយកចិត្តទុកដាក់ខ្ពស់ ខិតខំ ប្រឹងប្រែងដោះស្រាយ និងអនុវត្តតាមសំណូមពររបស់ពួកគាត់ឱ្យបានឆាប់ ជាពិសេសបញ្ហាពាក់ព័ន្ធទៅនឹងការអភិវឌ្ឍហេដ្ឋារចនាសម្ព័ន្ធ និងសេវាសាធារណៈជាដើម។
លោកអភិបាលរងខេត្ត ក៏បានណែនាំដល់អាជ្ញាធរមូលដ្ឋាន យកចិត្ដទុកដាក់ និងអន្តរាគមន៍ចំពោះការងារសកម្មភាពណាដែលយឺតយ៉ាវ ជូនពលរដ្ឋឲ្យបានទាន់ពេលវេលា ត្រូវពង្រឹងសុវត្ថិភាព សន្ដិសុខ សណ្ដាប់ធ្នាប់សាធារណៈឱ្យបានល្អ ជាពិសេសសេវាច្រកចេញចូលតែមួយ ត្រូវផ្ដល់សេវាឱ្យបានល្អប្រសើរ និងទាន់ពេលវេលាជូនពលរដ្ឋ រួមទាំងជំរុញដល់លោកគ្រូ អ្នកគ្រូ បណ្ដុះស្មារតីសិស្សានុសិស្ស ឱ្យមានស្មារតីស្នេហាជាតិមាតុភូមិរបស់យើង។
សូមជម្រាបថា ក្នុងវេទិកានេះ ក្រុមការងារទទួលបានសំណួរ សំណូមពរផ្ទាល់មាត់ និងជាលាយលក្ខណ៍អក្សរចំនួន១៥។ ក្នុងនោះសំណួរ សំណូមពរផ្ទាល់មាត់ ត្រូវបានមន្រ្ដីជំនាញធ្វើការបំភ្លឺ ដោះស្រាយភ្លាមៗ។ ដោយឡែកសំណួរជាលាយល័ក្ខអក្សរ ក្រុមការងារនឹងធ្វើការពិនិត្យ និងដោះស្រាយជូនពលរដ្ឋ។
ថ្លែងក្នុងឱកាសនោះ ឯកឧត្តម លី សំរិទ្ធ ប្រធានក្រុមប្រឹក្សាខេត្ត បានមានប្រសាសន៍ថា វេទិកានេះពិតជាមានសារៈសំខាន់ណាស់ ក្នុងការជំរុញអភិបាលកិច្ចល្អនៅក្នុងមូលដ្ឋាន ការគ្រប់គ្រងតាមបែបប្រជាធិបតេយ្យនៅថ្នាក់ក្រោមជាតិ និងជំរុញការអភិវឌ្ឍមូលដ្ឋាន បានឆាប់រហ័ស និងទាន់ពេលវេលាជូនប្រជាពលរដ្ឋ។
ឯកឧត្តមប្រធានក្រុមប្រឹក្សា បានណែនាំដល់អាជ្ញាធរមានសមត្ថកិច្ចត្រូវបន្តពង្រឹងវិធានការគ្រប់គ្រង និងការបង្ការទប់ស្កាត់មូលដ្ឋាន ទាក់ទងនឹងបញ្ហាក្មេងទំនើង បញ្ហាគ្រឿងញៀន និងបារីអេឡិចត្រូនិច អំពីហិង្សាទៅលើស្រ្តី និងក្មេងស្រី បញ្ហាទំនាក់ទំនងអនឡាញ ទាក់ទងយេនឌ័រគ្រប់ទំរង់គ្រប់រូបភាព ដែលកំពុងកើតមាននៅក្នុងសហគមន៍ ដែលជាកត្តាចម្បងរបស់ប្រជាពលរដ្ឋក្នុងសន្តិសុខមូលដ្ឋានរបស់ខ្លួន៕
អត្ថបទ និងរូបភាព ៖ លោក អោត រត់
កែសម្រួល៖ លោក អ៊ុន ណារាជ្យ
