នៅថ្ងៃទី២១ ខែធ្នូ ឆ្នាំ២០២៥ ឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប បានអញ្ជើញចុះជួបសួរសុខទុក្ខ និងនាំយកនូវស្បៀងអាហារ និងសម្ភារប្រើប្រាស់សម្រាប់តម្រូវការចាំបាច់របស់សម្ព័ន្ធក្រុមហ៊ុនសុខហេង និង មូលនិធិយើងជាខ្មែរ ដើម្បីចែកជូនដល់បងប្អូនជនភៀសសឹកដែលកំពុងស្នាក់ក្នុងវត្តបូទុមមោង ស្ថិតក្នុងឃុំមោង ស្រុកស្រីស្នំខេត្តសៀមរាប ចំនួន ១ ០០០គ្រួសារ។
លោក សុខ វណ្ណសេង អគ្គនាយកបន្តវេន សម្ព័ន្ធក្រុមហ៊ុន សុខ ហេង បានឱ្យដឹងថា អំណោយដែលបានចែកជូនក្នុងមួយគ្រួសារទទួលបាន អង្ករ១០គីឡូក្រាម ទឹកសុទ្ធ ឃីដមួយកញ្ចប់ មានមី ត្រីខ ទឹកស៊ីអ៊ី សៀង ឆៃប៉ូវ សាច់ក្រក និងបន្លែ១គីឡូក្រាម។ បន្ថែមពីនេះបានផ្តល់ជូនដល់រដ្ឋបាលស្រុក សម្រាប់បែងចែកនិងប្រើប្រាស់ មានចានបង្គន់អនាម័យចំនួន២០ ថ្នាំពេទ្យ២០កេសធំ អំពូលសូឡា០២គ្រឿង កៅស៊ូតង់ចំនួន២០ សម្លៀកបំពាក់ និងភួយមួយចំនួនទៀត។
ឯកឧត្តម អ្នកឧកញ៉ា សៀង ណាំ បានមានប្រសាសន៍ថា អំណោយទាំងនេះ គឺជាការឆ្លើយតបចំពោះការលំបាក និងជួយសម្រួលដល់ការខ្វះខាតជាក់ស្ដែងជាច្រើនឆ្លើយតបទៅនឹងតម្រូវការចាំបាច់របស់បងប្អូនភៀសសឹកជម្លៀសពីតំបន់ប្រយុទ្ធមកនៅតាមគោលដៅសុវត្ថិភាពនានា គេចចេញពីការឈ្លានពានដោយការបាញ់ប្រហារនិងទម្លាក់គ្រាប់ពីយោធាថៃ។ តាមរយៈការគិតគូរចំពោះទុក្ខលំបាករបស់បងប្អូនជនភៀសសឹកនេះ គឺស្របតាមការអំពាវនាវរបស់ថ្នាក់ដឹកនាំប្រទេស និងប្រជាពលរដ្ឋខ្មែរ ដើម្បីរួមគ្នាបន្ធូរបន្ថយបន្ទុកនៃការរស់នៅប្រចាំថ្ងៃរបស់បងប្អូនជនភៀសសឹក។
ឯកឧត្តម សៀង ណាំ បន្តថា គ្មាននរណាម្នាក់ចង់ឃើញសង្គ្រាម ឬការបាត់បង់ជីវិតនោះទេ ប៉ុន្តែប្រទេសកម្ពុជាមានកាតព្វកិច្ច ការពារអធិបតេយ្យភាពរបស់ខ្លួន បន្ទាប់ពីមានការរំលោភបំពានពីសំណាក់ភាគីថៃ។ ឯកឧត្តម ក៏បានមានប្រសាសន៍ដាស់តឿននិងក្រើនរំលឹកសូមឱ្យបងប្អូនភៀសសឹកទាំងអស់ សូមយកចិត្តទុកដាក់ខ្ពស់ក្នុងការថែរក្សាសុខភាពផ្ទាល់ខ្លួន បន្ថែមពីលើអ្វីដែលរាជរដ្ឋាភិបាលបានយកចិត្តទុកដាក់ចំពោះបងប្អូនហើយនោះ សូមកុំមានការភិតភ័យ និងព្រួយបារម្ភពេលមកស្នាក់នៅក្នុងមូលដ្ឋានបណ្ដោះអាសន្ននេះ និងសូមបន្តជឿជាក់លើប្រមុខរាជរដ្ឋាភិបាលរបស់យើង ជាពិសេសជឿជាក់លើវីរកងទ័ពដ៏អង់អាចក្លាហានរបស់យើង។
តំណាងសម្ព័ន្ធក្រុមហ៊ុន សុខ ហេង បានថ្លែងថា ក្នុងស្មារតីខ្មែរតែមួយរួមគ្នា ខ្មែរស្រឡាញ់ខ្មែរជួយគ្នាទៅវិញទៅមកទាំងសម្ភារ និងស្មារតី និងក្នុង កាលៈទេសៈដែលប្រទេសជាតិកំពុងទទួលរងនូវការរំលោភបំពាន និងការគំរាមកំហែងយ៉ាងធ្ងន់ធ្ងរ លើបូរណភាពទឹកដីពីសំណាក់យោធាថៃ សូមឱ្យបងប្អូនប្រជាពលរដ្ឋខ្មែរទាំងអស់ ត្រូវរួបរួមសាមគ្គីជួយគ្នាក្នុងគ្រាលំបាក មានទុក្ខរួមទុក្ខ មានសុខរួមសុខ គ្មានអ្វីដែលល្អប្រសើរជាងពេលបានឃើញប្រទេសជាតិមានសន្តិភាពនោះទេ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
