នាថ្ងៃទី២១ ខែធ្នូ ឆ្នាំ២០២៥ លោកជំទាវ ទៀង អេង ទៀ សីហា និង លោកជំទាវ ខៀវ សរស៊ីលៀប អគ្គនាយិកាក្រុមហ៊ុនហនុមាន ប៊ែវើរីជីស និងសប្បុរសជន បានដឹកនាំក្រុមការងារចុះសួរសុខទុក្ខ និងផ្ដល់អំណោយជាអង្ករ និងគ្រឿងឧបភោគបរិភោគ ដល់បងប្អូនពលរដ្ឋជនភៀសសឹកជាង ៥០០គ្រួសារ ស្នាក់នៅក្នុងស្រុកបន្ទាយស្រី ដោយមានការចូលរួមពី ឯកឧត្ដម សោម សារ៉ូ សមាជិកក្រុមប្រឹក្សាខេត្ត និង លោក សុខ ថុល អភិបាលរងខេត្ត។
ក្នុងឱកាសនោះ លោកជំទាវ ទៀង អេង ទៀ សីហា បាននាំនូវប្រសាសន៍ផ្ដាំផ្ញើសួរសុខទុក្ខប្រកបដោយក្តីនឹករលឹកពីសំណាក់ សម្ដេចធិបតី ហ៊ុន ម៉ាណែត នាយករដ្ឋមន្ត្រី ជាពិសេស ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដែលជានិច្ចកាលថ្នាក់ដឹកនាំទាំងអស់ លោកតែងតែយកចិត្តទុកដាក់ខ្ពស់ ចំពោះសុខទុក្ខ និងការលំបាករបស់បងប្អូនប្រជាពលរដ្ឋគ្រប់រូបនៅគ្រប់កាលៈទេសៈទោះស្ថិតនៅក្នុងស្ថានភាពណាក៏ដោយ។
លោកជំទាវ ក៏បានជំរុញដល់បងប្អូនជាជនភៀសសឹកទាំងអស់ថែរក្សាសុខភាព ទាំងផ្លូវកាយនិងផ្លូវចិត្តឱ្យបានរឹងមាំជាពិសេស ភរិយាដែលមានស្វាមីជាកងទ័ពជួរមុខដែលកំពុងប្រយុទ្ធយ៉ាងស្វាហាប់ជាមួយសៀមក្នុងការការពារជាតិមាតុភូមិ។ ជាពិសេសសូមសំណូមពរដល់បងប្អូនទាំងអស់រួបរួមសាមគ្គីគ្នាក្នុងគ្រាលំបាក និងត្រូវដឹងគុណដល់វីរកងទ័ពដែលបានពលីក្នុងសមរភូមិ បើយើងគ្មានភាពសាមគ្គីគ្មានភាពរួបរួមនោះទេយើងនិងចាញ់គេ សូមឱ្យភាពសាមគ្គីនេះជានិរន្តរមិនមែនតែពេលសង្គ្រាម។ លោកជំទាវក៏បានណែនាំដល់បងប្អូនជាអាណាព្យាបាលទាំងអស់ដែលមានកូនអត់បានទៅសាលារៀនសូមបញ្ជូនកូនៗឱ្យបានសិក្សារៀនសូត្រកុំឱ្យមានការភិតភ័យ អ្វីដែលត្រូវធ្វើគឺខិតខំរៀនសូត្រដើម្បីជាធនធានទៅថ្ងៃអនាគតនិងតបស្នងសងគុណជាតិយើង។
លោកជំទាវ បានថ្លែងអំណរគុណដល់លោកជំទាវខៀវ សរស៊ីលៀប អគ្គនាយិកាក្រុមហ៊ុនហនុមាន ប៊ែវើរីជីស និងសប្បុរសជន ដែលបានជួយជាស្បៀងនិងគ្រឿងឧបភោគបរិភោគដល់បងប្អូនជនភៀសសឹក អាជ្ញាធរខេត្តសៀមរាប អាជ្ញាធរស្រុក និងអាជ្ញាធរមូលដ្ឋាន ដែលបានគិតគូ និងយកចិត្តទុកដាក់ខ្ពស់ចំពោះបងប្អូនប្រជាពលរដ្ឋភៀសសឹក ដោយសម្របសម្រួលកន្លែងស្នាក់នៅ ការប្រើប្រាស់ទឹកបានគ្រប់គ្រាន់ សម្រាប់ការស្នាក់នៅបណ្ដោះអាសន្ននេះ។
សូមជម្រាបថា អំណោយដែលបានចែកជូនក្នុងមួយគ្រួសារទទួលបាន អង្ករ ១០គីឡូក្រាម សាច់ក្រក១គីឡូក្រាម ត្រីងៀត១គីឡូក្រាម ឆៃពៅ១គីឡូក្រាម អំបុក១កញ្ចប់ ធូបមូស១ដុំ ម៉ុង១ ភួយ១ ខោអាវ១កំប្លេ ថ្នាំពេទ្យ១កញ្ចប់ និងថវិកា ៤ម៉ឺនរៀល។ ក្នុងនោះដែលស្ត្រីមានផ្ទៃពោះចំនួន ២០នាក់ ទទួលបានសម្ភារសម្រាប់ទារកម្នាក់ ១កញ្ចប់៕
អត្ថបទ និងរូបភាព៖ លោក ឡៃ បញ្ញា
កែសម្រួល៖ លោក អ៊ុន ណារាជ្យ
