បញ្ជាការដ្ឋានកាំភ្លើងធំប្រចាំទិសទី៣ និងកងពលតូចថ្មើរជើងលេខ៤២ រដ្ឋបាលខេត្តបន្ទាយមានជ័យ និងជនភៀសសឹកចំនួន ២០០គ្រួសារ កំពុងស្នាក់នៅក្នុងភូមិសាស្ត្រស្រុកបន្ទាយស្រី នារសៀលថ្ងៃទី២១ ខែធ្នូ ឆ្នាំ២០២៥ បានទទួលអំណោយគ្រឿងឧបភោគបរិភោគ និងសម្ភារប្រើប្រាស់មួយចំនួនពីសមាគមសហគ្រិនបញ្ញវន្តកម្ពុជា។
ឯកឧត្តមបណ្ឌិត ឈៀង ច័ន្ទតារា ប្រធានសមាគមសហគ្រិនបញ្ញវន្តកម្ពុជា មានប្រសាសន៍ថា អំណោយដែលយកមកប្រគល់ជូននាពេលនេះ គឺជាការចូលរួមរបស់ ឯកឧត្តម សុខ ពុទ្ធិវុធ និងលោកជំទាវ ព្រមទាំង ឯកឧត្តម បណ្ឌិត អោម សេងបូរ៉ា និងលោកជំទាវ ដែលបានគាំទ្រ និងចូលរួមចំណែកក្នុងការឧបត្ថម្ភមួយចំនួនដល់សមាគម ព្រមទាំងមានការចូលរួមពីថ្នាក់ដឹកនាំ និងក្រុមការងាររបស់សមាគម និងរបស់បណ្ដាសប្បុរសជនផ្សេងៗទៀត យកមកប្រគល់ជូននេះ សម្រាប់អង្គភាព និងអាជ្ញាធរប្រើប្រាស់ និងបែងចែកជូនជនភៀសសឹកជនភៀសសឹកដែលមកស្នាក់នៅក្នុងភូមិសាស្ត្ររបស់ខ្លួន។
ឯកឧត្តមបណ្ឌិត បន្តថា ក្នុងស្មារតីខ្មែរតែមួយរួមគ្នា ខ្មែរស្រឡាញ់ខ្មែរជួយគ្នាទៅវិញទៅមកទាំងសម្ភារ និងស្មារតី និងក្នុង កាលៈទេសៈដែលប្រទេសជាតិកំពុងទទួលរងនូវការរំលោភបំពាន និងការគំរាមកំហែងយ៉ាងធ្ងន់ធ្ងរ លើបូរណភាពទឹកដីពីសំណាក់យោធាថៃ សូមឱ្យបងប្អូនប្រជាពលរដ្ឋខ្មែរទាំងអស់ ត្រូវរួបរួមសាមគ្គីជួយគ្នាក្នុងគ្រាលំបាក មានទុក្ខរួមទុក្ខ មានសុខរួមសុខ គ្មានអ្វីដែលល្អប្រសើរជាងពេលបានឃើញប្រទេសជាតិមានសន្តិភាពនោះទេ។
ឯកឧត្តម បានកើតសរសើរនូវវីរៈភាពអង់អាចក្លាហានរបស់វីរៈកងទ័ព និងកងកម្លាំងប្រដាប់អាវុធ និងអាជ្ញាធរគ្រប់ជាន់ថ្នាក់ដែលបានតស៊ូប្ដូរផ្ដាច់ លះបង់អាយុជីវិត កម្លាំងកាយចិត្ត ក្នុងការប្រយុទ្ធការពារជាតិមាតុភូមិពីការរំលោភបំពានរបស់ខ្មាំងសត្រូវ។ ហេតុនេះក្នុងនាមអ្នកនៅសមរភូមិក្រោយ មិនដែលភ្លេចឡើយនូវគំរូពលីកម្មរបស់អ្នកនៅសមរភូមិមុខ ហើយសមរភូមិក្រោយនឹងបន្តស្មារតីសាមគ្គីជាធ្លុងមួយជួយជាកម្លាំងចិត្ត ដល់កម្លាំងជួរមុខតាមរយៈការសហការកៀរគរស្បៀងអាហារសំភារៈក្នុងស្មារតីខ្មែរជួយខ្មែរ ខ្មែរស្រឡាញ់ខ្មែរដើម្បីប្រទេសជាតិមាតុភូមិយើងទាំងអស់គ្នា។
សូមជម្រាបថា អំណោយជាស្បៀងអាហារ និងសម្ភារចាំបាច់ ដែលបានបែងចែកប្រគល់ជូននាថ្ងៃដដែលនេះដែរ មានចំនួន ៦គោលដៅ រួមមាន៖ ប្រគល់ជូនដល់មេបញ្ជាការបញ្ជាការដ្ឋានកាំភ្លើងធំប្រចាំទិសទី៣ បញ្ជាការកងពលតូចថ្មើរជើងលេខ៤២ រដ្ឋបាលខេត្តបន្ទាយមានជ័យ រដ្ឋបាលស្រុកបន្ទាយស្រី ខេត្តសៀមរាប ប្រគេនដល់ព្រះសង្ឃគង់នៅវត្តបាលីដំរីក្រាប និងចែកជូនដល់ជូនជនភៀសសឹកចំនួន ២០០គ្រួសារ ដែលមកស្នាក់ក្នុងខេត្តសៀមរាបផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
