នៅព្រឹកថ្ងៃទី២៣ ខែធ្នូ ឆ្នាំ២០២៥ លោក យឿន ចាន់ អនុប្រធានទទួលបន្ទុករួម មន្ទីរព័ត៌មានខេត្តសៀមរាប បាននាំយកអំណោយរបស់ ឯកឧត្តមរដ្ឋមន្ត្រី នេត្រ ភក្ដ្រា ប្រគល់ជូនដល់រដ្ឋបាលខេត្តសៀមរាប ក្រោមវត្តមានទទួលដោយ លោក សុខ ថុល អភិបាលរងខេត្ត ដើម្បីចែកជូនបន្តដល់បងប្អូនជាជនភៀសសឹក និងវីរកងទ័ព ដែលអំណោយរួមមាន ទឹកសុទ្ធ ១០០កេស និងភេសជ្ជ V-Cola ចំនួន ២០០កេស។
ក្នុងនាមរដ្ឋបាលខេត្តសៀមរាប លោក សុខ ថុល បានថ្លែងនូវការអរគុណយ៉ាងជ្រាលជ្រៅបំផុត ចំពោះមន្ទីរព័ត៌មានខេត្តសៀមរាប ជាពិសេស ឯកឧត្តមរដ្ឋមន្ត្រី នេត្រ ភក្ដ្រា រួមនឹងសប្បុរសជនទាំងអស់ ដែលបានចូលរួមចែករំលែកនូវធនធានទៅតាមលទ្ធភាពរៀងៗខ្លួន ដើម្បីឧបត្ថម្ភដល់វីរកងទ័ពជួរមុខ និងក្រុមគ្រួសារពលរដ្ឋភៀសសឹក ដែលបាននិងកំពុងភៀសខ្លួនចេញពីផ្ទះសម្បែងទៅស្នាក់នៅទីកន្លែងសុវត្ថិភាព។
លោកអភិបាលរងខេត្ត មានប្រសាសន៍ថា ពិតណាស់ កាយវិការ សកម្មភាពទាំងនេះពីសំណាក់សប្បុរសជនគ្រប់ទិសទី ទាំងក្នុង និងក្រៅប្រទេស ដែលវាពិតជាបានបង្ហាញឱ្យឃើញពីទឹកចិត្តសប្បុរសធម៌របស់បងប្អូនប្រជាពលរដ្ឋ ក្នុងការសាមគ្គីភាព ជាធ្លុងមួយខ្មែរស្រឡាញ់ខ្មែរ។
លោក យឿន ចាន់ អនុប្រធានទទួលបន្ទុករួម បានលើកឡើងថា គ្រឿងឧបភោគបរិភោគទាំងនេះ ជាការចូលរួមលើកទឹកចិត្តដល់វីរកងទ័ពកម្ពុជាជួរមុខ ដែលបានកំពុងតតាំងប្រយុទ្ធជាមួយសត្រូវឈ្លានពាន ការពារបូរណភាពទឹកដីមាតុភូមិយើង និងចូលរួមចំណែកជាមួយរាជរដ្ឋាភិបាល ក៏ដូចរដ្ឋបាលខេត្តសៀមរាប ក្នុងការផ្គត់ផ្គង់ជីវភាពប្រចាំថ្ងៃដល់បងប្អូនគ្រួសារភៀសសឹក ដែលបានកំពុងស្នាក់នៅតាមមណ្ឌលសុវត្ថិភាព ក្នុងភូមិសាស្ត្រខេត្តសៀមរាប ក្នុងស្មារតីខ្មែរជួយខ្មែរ ខ្មែរស្រឡាញ់ខ្មែរ៕
អត្ថបទ៖ លោក អ៊ុន ណារាជ្យ
រូបភាព៖ ក្រុមការងារ
