នៅថ្ងៃទី២ ខែមករា ឆ្នាំ២០២៦ ឯកឧត្តម ប្រាក់ សោភ័ណ អភិបាលខេត្តសៀមរាប បានអញ្ជើញទទួលអំណោយពី ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ដើម្បីផ្គត់ផ្គង់បន្តដល់បងប្អូនជនភៀសសឹក មានអង្ករ ១០តោន ប្រហុក ២តោ និងថវិកា ១០លានរៀល។
ឯកឧត្តម ថោ ជេដ្ឋា បានគូសបញ្ជាក់ថា ដើម្បីជួយសម្រាលបន្ទុករបស់រាជរដ្ឋាភិបាល ក្នុងពេលដែលប្រទេសជាតិកំពុងរងផលប៉ះពាល់ដោយសារសង្គ្រាម ដែលបានធ្វើឲ្យបងប្អូនប្រជាពលរដ្ឋជាច្រើននាក់រងគ្រោះ ធ្វើការជម្លៀសខ្លួនចាកចេញពីផ្ទះសម្បែង មករកទីកន្លែងមានសុវត្ថិភាព ហើយបានកំពុងស្នាក់នៅបណ្ដោះអាសន្ននៅតាមមណ្ឌលសុវត្ថិភាព។ កន្លងមកក្រៅពីការផ្ដល់អំណោយជូនបងប្អូនជនភៀសសឹក ក្រសួងក៏បានធ្វើការផ្គត់ផ្គង់ជាគ្រឿងឧបភោគបរិភោគ និងសម្ភារប្រើប្រាស់ដល់បងប្អូនវីរៈកងទ័ពជួរមុខ ដែលកំពុងប្រកៀកស្មាគ្នាការពារបូរណភាពទឹកដី និងអធិបតេយ្យភាពជាតិ ប្រកបដោយភាពម្ចាស់ការនៅគ្រប់គោលដៅនៃសមរភូមិប្រយុទ្ធ។
ឯកឧត្តម ប្រាក់ សោភ័ណ អភិបាលខេត្ត បានឱ្យដឹងថា ចាប់ពីមានការផ្ទុះអាវុធដោយការឈ្លានពាន ខេត្តសៀមរាប បានទទួលបងប្អូនភៀសសឹកប្រមាណជា ៤ម៉ឺនគ្រួសារ ដែលបានមកស្នាក់នៅបណ្ដោះអាសន្នចំនួន ១៣១កន្លែង និងតាមផ្ទះបងប្អូនប្រជាពលរដ្ឋក្នុងភូមិសាស្ត្រខេត្តសៀមរាប។ ឯកឧត្តមបន្តថា ក្រោយមានឈប់បាញ់ បងប្អូនប្រជាពលរដ្ឋភៀសសឹក ដែលមានលំនៅដ្ឋាននៅឆ្ងាយពីតំបន់មានសង្គ្រាម ក៏បានធ្វើការចាកចេញទៅភូមិឋានរបស់ខ្លួនវិញ ប្រមាណ ១ម៉ឺនគ្រួសារ។
ឯកឧត្តម ប្រាក់ សោភ័ណ បានបញ្ជាក់ថា អំណោយដែលរដ្ឋបាលខេត្តទទួលបានក្នុងពេលកន្លងមក ត្រូវបានធ្វើការបែងចែកផ្គត់ផ្គង់ដល់កងកម្លាំងជួរមុខ និងបងប្អូនប្រជាពលរដ្ឋភៀសសឹកនៅតាមមណ្ឌល និងផ្ទះបងប្អូន។ ចំពោះស្បៀងអាហារ សម្ភារមួយចំនួន ក៏ត្រូវបានរដ្ឋបាលខេត្ត ត្រៀមបម្រុងទុកក្នុងការផ្គត់ផ្គង់ដល់បងប្អូនភៀសសឹក ដែលមិនអាចទៅកាន់ភូមិឋានរបស់ខ្លួនបាន ដោយរងចាំអាជ្ញាធរមូលដ្ឋានអនុញ្ញាត ក្រោយពេលក្រុមការងារបោសសម្អាតយុទ្ធភ័ណ្ឌមិនទាន់ផ្ទុះ បោសសម្អាតរួចទើបអនុញ្ញាតឱ្យពួកគាត់ត្រឡប់ទៅវិញ។
ឯកឧត្តម ក៏សូមថ្លែងអំណរគុណដល់ ឯកឧត្តមរដ្ឋមន្ត្រី និងសប្បុរសជនទាំងអស់ ដែលបានចូលរួមជាមួយរដ្ឋបាលខេត្ត ក្នុងស្មារតីខ្មែរជួយខ្មែរ ខ្មែរស្រឡាញ់ខ្មែរ។ រដ្ឋបាលខេត្តសៀមរាប គឺនៅតែបន្តទទួលអំណោយរបស់បងប្អូនសប្បុរសជន ដើម្បីផ្គត់ផ្គង់បន្តដល់បងប្អូនជនភៀសសឹក៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
