នៅថ្ងៃទី៤ ខែមករា ឆ្នាំ២០២៥ លោក ឌី រ៉ាដូ អភិបាលរងខេត្តសៀមរាប តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាលខេត្ត បានទទួលអំណោយពី ក្រុមហ៊ុនរួមចិត្តជាមួយប្រជាជនកម្ពុជា និងអនាគតដ៏ល្អប្រសើរជាមួយគ្នា រួមទាំងក្រុមហ៊ុនចិនកម្ពុជាចិត្តតែមួយ មិត្រភាព និងក្ដីស្រលាញ់ ដើម្បីជួយឧបត្ថម្ភបន្តដល់បងប្អូនប្រជាពលរដ្ឋជាជនភៀសសឹក ដែលកំពុងស្នាក់នៅបណ្ដោះអាសន្នក្នុងភូមិសាស្ត្រខេត្តសៀមរាប រួមទាំងកងទ័ពសមរភូមិជួរមុខ និងគ្រួសារកងទ័ព។
លោក ឌី រ៉ាដូ មានប្រសាសន៍ថា ការផ្ដល់ជូននូវអំណោយទាំងនេះ បានបង្ហាញពីការយកចិត្តទុកដាក់ បង្ហាញពីស្មារតី “ខ្មែរស្រឡាញ់ខ្មែរក្នុងគ្រាលំបាក” “ខ្មែររួបរួមសាមគ្គីគ្នា” ក្នុងការជួយសម្រួលដល់ការរស់នៅ របស់បងប្អូនប្រជាពលរដ្ឋភៀសសឹក និងបងប្អូនកងទ័ពនាពេលនេះ។ លោកក៏បានថ្លែងអំណរគុណដល់បងប្អូនប្រជាពលរដ្ឋ ដែលជាសប្បុរសជនក្នុងខេត្ត និងក្រៅខេត្ត ដែលបានចូលរួមឧបត្ថម្ភគាំទ្រដល់ប្រជាជន ដែលបានជម្លៀសពីតំបន់សមរភូមិចូលមកភូមិសាស្ត្រខេត្តសៀមរាប ដោយទឹកចិត្តស្មោះសរ ក្នុងការរួបរួមជាតិខ្មែរជាធ្លុងមួយដោយស្មារតីខ្មែរជួយខ្មែរក្នុងគ្រាលំបាក។
សូមជម្រាបថា អំណោយដែលបានផ្ដល់ជូនរួមមាន៖ អង្ករចំនួន១តោន មីចំនួន៩១កេះ ភួយ១៥០ ទឹកសុទ្ធEDV ៨៨កេស ទឹកសុទ្ធប៉ាហាហា ចំនួន២៦៥កេស ភេសជ្ជៈ៦០កេស សាច់ក្រក ៣០កេស នំ៤០កេស នំក្រៀម២៧កេស នំបារាំង៦គីឡូ សៀវភៅ២០០ក្បាល ប៊ិក១២០ប្រអប់ ជ័រលុប២០ប្រអប់ និងបន្ទាត់១០០ប្រអប់៕
អត្ថបទ និងរូបភាព៖ លោក អោរ រត់
កែសម្រួល៖ លោក អ៊ុន ណារាជ្យ
