ក្នុងឱកាសជួបសំណេះសំណាល និងផ្សព្វផ្សាយអប់រំអំពីគ្រោះថ្នាក់ដោយសារយុទ្ធភណ្ឌគ្រឿងផ្ទុះ ជូនដល់បងប្អូនជនភៀសសឹកនៅក្នុងស្រុកបន្ទាយស្រី ខេត្តសៀមរាប នាថ្ងៃទី៥ ខែមករា ឆ្នាំ២០២៦ ឯកឧត្ដមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ នៃអាជ្ញាធរមីន បានអំពាវនាវយ៉ាងទទូចដល់បងប្អូនប្រជាពលរដ្ឋ ជាពិសេសជនភៀសសឹកដែលត្រៀមវិលត្រឡប់ទៅកាន់លំនៅដ្ឋានវិញ ត្រូវបង្កើនការប្រុងប្រយ័ត្នឱ្យបានខ្ពស់ចំពោះគ្រាប់មីន និងសំណល់យុទ្ធភណ្ឌសង្គ្រាមផ្សេងៗ ដើម្បីធានាសុវត្ថិភាពអាយុជីវិត។
ឯកឧត្ដមបណ្ឌិត លី ធុជ បានណែនាំដល់បងប្អូនទាំងអស់ ប្រសិនបើប្រទះឃើញគ្រាប់មីន គ្រាប់បែកចង្កោម ឬវត្ថុចម្លែកសង្ស័យជាគ្រាប់ សូមកុំប៉ះពាល់ ដំ ឬដុតឱ្យសោះ ដោយត្រូវរាយការណ៍ភ្លាមៗទៅកាន់អាជ្ញាធរមូលដ្ឋាន រួមមាន ប៉ុស្តិ៍នគរបាល មេភូមិ មេឃុំ ឬប្រតិបត្តិករបោសសម្អាតមីនដែលនៅជិតបំផុត។ ជាពិសេសមុននឹងចូលទៅកាន់តំបន់ណាមួយដែលមិនច្បាស់លាស់ ត្រូវសាកសួរអាជ្ញាធរអំពីស្ថានភាពសុវត្ថិភាពក្នុងតំបន់នោះជាមុន។
ឯកឧត្ដមទេសរដ្ឋមន្រ្តី ក៏បានថ្លែងអំណរគុណយ៉ាងជ្រាលជ្រៅចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានប្រើប្រាស់វិធានការនយោបាយ និងការទូតយ៉ាងស្វាហាប់ រហូតសម្រេចបាននូវបទឈប់បាញ់កម្ពុជា-ថៃ ដើម្បីបញ្ចប់សោកនាដកម្ម និងនាំមកនូវសន្តិភាពជូនប្រជាពលរដ្ឋនៅតាមព្រំដែន។ ឯកឧត្ដមបញ្ជាក់ថា ការអប់រំយល់ដឹងពីយុទ្ធភណ្ឌគ្រឿងផ្ទុះ គឺជាកិច្ចការអាទិភាពដែលសម្តេចធិបតីយកចិត្តទុកដាក់ខ្ពស់ ដើម្បីធានាថាប្រជាពលរដ្ឋអាចវិលត្រឡប់ទៅរស់នៅ និងប្រកបរបរចិញ្ចឹមជីវិតវិញដោយសុវត្ថិភាពបំផុត។
លោក Fan Manjiang ភារធារីនៃស្ថានទូតចិនប្រចាំកម្ពុជា បានវាយតម្លៃខ្ពស់ចំពោះទំនាក់ទំនងកម្ពុជា-ចិន និងបានបញ្ជាក់ថា ប្រទេសចិននឹងបន្តឈរជាមួយកម្ពុជាក្នុងការកសាងសន្តិភាព ជាពិសេសគឺការគាំទ្រសកម្មភាពមីនមនុស្សធម៌ គឺជាផ្នែកមួយនៃការយកចិត្តទុកដាក់របស់ចិនមកលើកម្ពុជា ហើយប្រទេសចិននឹងបន្តសកម្មភាពនេះ ដោយចង់ឃើញប្រជាជនកម្ពុជាទទួលបានសុខសុវត្ថិភាព និងរួចចាកផុតពីការគំរាមកំហែងដោយសារយុទ្ធភណ្ឌគ្រឿងផ្ទុះ ទាំងនោះក្រោយសង្គ្រាមបានបញ្ចប់៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
