នៅថ្ងៃទី៥ ខែមករា ឆ្នាំ២០២៦ ក្រុមគ្រួសារកងទ័ព និងបងប្អូនជាជនភៀសសឹកដែលស្នាក់នៅក្នុងឃុំជ្រោយនាងងួន ស្រុកស្រីស្នំ ខេត្តសៀមរាប បានទទួលអំណោយជាស្បៀងអាហារពីក្រុមហ៊ុនភេសជ្ជៈ យ៉ូស ខេមបូឌា (Yeo’s Cambodia) ដើម្បីជួយសម្រួលដល់ជីវភាពរស់នៅប្រចាំថ្ងៃ គ្រាដែលជម្លៀសពីតំបន់មានកើតសង្គ្រាម មកស្នាក់នៅក្នុងខេត្តសៀមរាប។
ក្នុងឱកាសនោះ លោកស្រី ហេង សុទ្ធាវី គឺជាអគ្គនាយិកាក្រុមហ៊ុន Yeo’s Cambodia (វ៉ាយអេចអេស ខេមបូឌា ហ៊្វូដ & បើវើរីច) បានជំរុញដល់បងប្អូនជាជនភៀសសឹក និងគ្រួសារកងទ័ពដែលមានកូនតូចៗ ត្រូវបញ្ជូនកូនៗរបស់ខ្លួនឱ្យបានសិក្សារៀនសូត្រ ទោះជាប្រទេសកំពុងតែជួបបញ្ហាសង្គ្រាមឈ្លានពានក៏ដោយ មិនថានៅទីណាសូមកុំភ្លេចសិក្សារៀនសូត្រ ជាពិសេសថែទាំសុខភាពរបស់ខ្លួនឱ្យបានល្អ។ លោកស្រី ក៏បានថ្លែងអំណរគុណដល់ព្រះគ្រូចៅអធិកាវត្ត ក៏ដូចជាអាជ្ញាធរមូលដ្ឋាន ដែលបានយកចិត្តទុកដាក់ក្នុងការថែរក្សាសុខសុវត្តិភាពរបស់បងប្អូនជនភៀសសឹកទាំងអស់។
លោកស្រី ហេង សុទ្ធាវី ក៏បានអំពាវនាវដល់បងប្អូនប្រជាពលរដ្ឋ សូមកុំជឿលើពួកអគតិ និងបុគ្គលបំពុលសង្គមមួយចំនួន ដែលមិនខ្វល់ខ្វាយពីប្រទេសជាតិ ក្នុងកាលៈទេសៈដែលប្រទេសកំពុងមានបញ្ហាបែបនេះ។ លោកស្រីក៏បានសំណូមពរឲ្យប្រជាពលរដ្ឋមានភាពជឿជាក់លើរាជរដ្ឋាភិបាលកម្ពុជា ក្នុងការអនុវត្តលើគោលការណ៍ផ្សេងៗ ដើម្បីស្វែងរកសុខសន្តិភាពសម្រាប់ប្រជាជន និងប្រទេសកម្ពុជាយើងទាំងមូល។
សូមជម្រាបថា អំណោយដែលផ្ដល់ជូននាពេលនោះ រួមមាន ទឹកផ្លែឈើ Yeo’s ១កេស, កាហ្វេ Yeo’s ១០កញ្ចប់តូច, អង្ករ ១០គីឡូក្រាម, អំបិល ១គីឡូក្រាម, ស្ករស១គីឡូក្រាម, មី១០កញ្ចប់, ទឹកស៊ីអ៊ីវ១យួរ, ទឹកត្រី១យួរ និងកញ្ចប់កុមារ រួមមាន ទឹកសណ្ដែក Yeo’s ៤ប្រអប់, ទឹកដោះគោជូរ Yeo’s ៤ដប, នំស្រួលលីលី២កញ្ចប់, នំទឹកដោះគោ២កញ្ចប់, នំមឹកលីលី២កញ្ចប់ និងដំណាប់ផ្លែឈើ៥គ្រាប់៕
អត្ថបទ និងរូបភាព៖ លោក ឡៃ បញ្ញា
កែសម្រួល៖ លោក អ៊ុន ណារាជ្យ
