នាថ្ងៃទី៥ ខែមករា ឆ្នាំ២០២៦ លោក សុខ ណារ៉េត អភិបាលស្រុកក្រឡាញ់ បានអញ្ជើញចូលរួមក្នុងពិធីប្រគល់ និងទទួលគ្រាប់ពូជបន្លែ រួមនឹងសម្ភារកសិកម្ម ពីអង្គការទស្សនៈពិភពលោកអន្តរជាតិ (World Vision International) ប្រចាំកម្ពុជា កម្មវិធីតំបន់ស្រុកក្រឡាញ់ សម្ភារទាំងនេះត្រូវបានប្រគល់ជូនដល់ការិយាល័យកសិកម្មស្រុក រដ្ឋបាលឃុំ និងគណៈកម្មការគ្រប់គ្រងមណ្ឌលសុវត្ថិភាពចំនួន ១០ ទីតាំង ក្នុងភូមិសាស្ត្រស្រុកក្រឡាញ់។
បើតាមតំណាងអង្គការ សកម្មភាពមនុស្សធម៌នេះ រៀបចំឡើងក្នុងគោលបំណងរួមចំណែកជាមួយរាជរដ្ឋាភិបាល លើកកម្ពស់ការដាំដុះបន្លែចម្រុះនៅតាមមណ្ឌលសុវត្ថិភាព ដើម្បីធានាបាននូវការផ្គត់ផ្គង់ស្បៀងអាហារដែលមានអាហារូបត្ថម្ភខ្ពស់ក្នុងរយៈពេលវែង សម្រាប់ឆ្លើយតបក្នុងគ្រាមានអាសន្ន ជូនដល់បងប្អូនជនភៀសសឹក ជាពិសេសកុមារដែលរងផលប៉ះពាល់ពីស្ថានភាពសង្គ្រាមនៅតាមព្រំដែនកម្ពុជា-ថៃ។
សម្រាប់មណ្ឌលសុវត្ថិភាពទាំង ១០ទីតាំង ទទួលបាននូវសម្ភារបែងចែកតាមតម្រូវការជាក់ស្ដែង រួមមាន៖ គ្រាប់ពូជស្ពៃតឿ ១០០ កញ្ចប់, ស្ពៃក្រញាញ់ ១១៧ កញ្ចប់, ត្រកួន ២០ គីឡូក្រាម, ផ្ទី ២៣ កញ្ចប់, ធុងស្រោចដំណាំ ៤០ ធុង, ស្បៃការពារកម្ដៅ ១០ ដុំ ប្រវែង ១០០ ម៉ែត្រក្នុងមួយដុំ, កៅស៊ូថ្លាសម្រាប់ស្ដុកទឹក ៥០ គីឡូក្រាម និងអំពូលសូឡា ២០ ផ្ទាំង ដើម្បីប្រើប្រាស់តាមតម្រូវការក្នុងមណ្ឌល។
លោក សុខ ណារ៉េត អភិបាលស្រុក បានបង្ហាញថា ពិតណាស់សកម្មភាពនេះត្រូវបានអនុវត្តតាមការណែនាំដ៏ខ្ពង់ខ្ពស់របស់ ឯកឧត្តម ប្រាក់ សោភ័ណ អភិបាលខេត្តសៀមរាប និងក្រោមគំនិតផ្ដួចផ្ដើមដ៏ឈ្លាសវៃរបស់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត តាមរយៈចលនា «យើងរួមគ្នាដើម្បីជាតិ!»។ ចលនានេះមានគោលដៅបំផុសស្មារតីសាមគ្គីភាពដល់បងប្អូនខ្មែរឱ្យចូលរួមដាំដុះបន្លែ ដើម្បីផ្គត់ផ្គង់ជីវភាពប្រចាំថ្ងៃជូនដល់គ្រួសារកងទ័ព និងបងប្អូនភៀសសឹក។
ក្នុងឱកាសនោះ លោកអភិបាលស្រុក ក្នុងនាមរដ្ឋបាលខេត្ត រដ្ឋបាលស្រុក និងបងប្អូនជនភៀសសឹកទាំងអស់ បានសម្ដែងនូវការដឹងគុណយ៉ាងជ្រាលជ្រៅចំពោះអង្គការទស្សនៈពិភពលោកអន្តរជាតិ ប្រចាំកម្ពុជា ដែលតែងតែផ្តល់កិច្ចសហការ និងគាំទ្រយ៉ាងសកម្ម ទាំងផ្នែកសម្ភារ និងបច្ចេកទេស ដើម្បីជួយឱ្យការដាំដុះបន្លែនៅតាមមណ្ឌលសុវត្ថិភាពទទួលបានលទ្ធផលល្អប្រសើរ និងមាននិរន្តរភាព៕
អត្ថបទ និងរូបភាព៖ លោក អ៊ុន ណារាជ្យ
