អាជ្ញាធរខេត្តសៀមរាប បានជំរុញឱ្យអាជ្ញាធរក្រុង-ស្រុក និងមន្ទីរជំនាញពាក់ព័ន្ធ ត្រូវសហការគ្នាឱ្យបានស្អិតរមួតជាមួយសេវាករឯកជន និងសហគមន៍ ដើម្បីពន្លឿនការតបណ្តាញទឹកស្អាតជូនប្រជាពលរដ្ឋឱ្យបានទូលំទូលាយ និងប្រកបដោយគុណភាពបំផុត ដើម្បីឆ្លើយតបទៅនឹងយុទ្ធសាស្ត្របញ្ចកោណរបស់រាជរដ្ឋាភិបាល ក្នុងការធានាឱ្យប្រជាពលរដ្ឋទទួលបានសេវាទឹកស្អាតប្រើប្រាស់គ្រប់គ្រាន់។
ថ្លែងក្នុងកិច្ចប្រជុំផ្សព្វផ្សាយស្តីពីការជំរុញលើកកម្ពស់ និងបង្កើនលទ្ធភាពទទួលបានសេវាទឹកស្អាតនៅរដ្ឋបាលថ្នាក់ក្រោមជាតិ នៅថ្ងៃទី៦ ខែមករា ឆ្នាំ២០២៦ លោក អ៊ឹង គឹមលាង អភិបាលរងខេត្ត បានបញ្ជាក់ថា ការពង្រឹងសេវាទឹកស្អាតនេះ គឺជាការកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ និងឆ្លើយតបទៅនឹងគោលដៅអភិវឌ្ឍន៍ប្រកបដោយចីរភាព (SDGs) ដែលរាជរដ្ឋាភិបាលបានកំណត់ថា «ប្រជាពលរដ្ឋគ្រប់រូបត្រូវមានទឹកស្អាតប្រើប្រាស់ទាំងអស់គ្នានៅត្រឹមឆ្នាំ២០៣០»។
លោក អ៊ឹង គឹមលាង បានបញ្ជាក់ថា កិច្ចប្រជុំនាពេលនេះរៀបចំឡើងក្នុងគោលបំណងដើម្បីផ្សព្វផ្សាយពីលិខិតលេខ ៣៣១១ សជណ ចុះថ្ងៃទី១៤ ខែតុលា ឆ្នាំ២០២៥ របស់ក្រសួងមហាផ្ទៃ និងពិនិត្យ និងវាយតម្លៃលើស្ថានភាពជាក់ស្ដែងនៃការតបណ្ដាញទឹកស្អាតនៅតាមទីជនបទ ដើម្បីស្វែងរកដំណោះស្រាយលើបញ្ហាដែលសហគមន៍ និងសេវាករកំពុងជួបប្រទះក្នុងភូមិសាស្ត្រខេត្តសៀមរាប។
លោកបន្តថា កិច្ចប្រជុំនេះដែរ ក៏ដើម្បីជជែកពិភាក្សាឱ្យបានផុសផុលលើការណែនាំរបស់ក្រសួងមហាផ្ទៃ ដើម្បីធានាឱ្យការផ្គត់ផ្គង់ទឹកស្អាតមានប្រសិទ្ធភាព និងចីរភាព។ ការងារនេះគឺជាផ្នែកមួយយ៉ាងសំខាន់នៃ យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា អាណត្តិទី៧ ដែលបានកំណត់យកអាទិភាពគន្លឹះចំនួន ៥ គឺ៖ «មនុស្ស ផ្លូវ ទឹក ភ្លើង និងបច្ចេកវិទ្យា»៕
អត្ថបទ និងរូបភាព៖ លោក អ៊ុន ណារាជ្យ
