នាព្រឹកថ្ងៃទី៦ ខែមករា ឆ្នាំ២០២៦ ឯកឧត្តម ហុក វ៉ាន់ធីណា ប្រធានសាលាដំបូងខេត្តសៀមរាប និង ឯកឧត្តម សៀង សុខ ព្រះរាជអាជ្ញានៃអយ្យការអមសាលាដំបូងខេត្ត បាននាំយកអំណោយជាគ្រឿងឧបភោគបរិភោគ និងថវិកា ប្រគល់ជូនយោធភូមិភាគទី៤ កងពលធំអន្តរាគមន៍លេខ២ និងរដ្ឋបាលខេត្តសៀមរាប ដើម្បីគាំទ្រដល់សមរភូមិមុខ និងជួយសម្រាលទុក្ខលំបាករបស់ប្រជាពលរដ្ឋភៀសសឹក។
ក្នុងឱកាសនោះ ឯកឧត្តម ឧត្តមសេនីយ៍ឯក ពៅ ហេង អគ្គមេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ បានជម្រាបជូនអំពីស្ថានភាពនៅតាមខ្សែបន្ទាត់ព្រំដែនកម្ពុជា-ថៃ ដែលបច្ចុប្បន្ននៅតែមានភាពផុយស្រួយ ។ ឯកឧត្តម បានបញ្ជាក់ថា ភាគីសត្រូវមិនបានគោរពតាមកិច្ចព្រមព្រៀងឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥ នោះឡើយ ដោយបានបំពានច្បាប់អន្តរជាតិ បំផ្លិចបំផ្លាញផ្ទះសម្បែង និងលួចប្លន់ទ្រព្យសម្បត្តិប្រជាពលរដ្ឋ។ ឯកឧត្តមបានថ្លែងអំណរគុណយ៉ាងជ្រាលជ្រៅចំពោះសាលាដំបូងខេត្ត ដែលបានផ្ដល់ការលើកទឹកចិត្តដល់កងកម្លាំងជួរមុខដែលកំពុងឈរជើងការពារបូរណភាពទឹកដី។
ឯកឧត្តម ហុក វ៉ាន់ធីណា ប្រធានសាលាដំបូងខេត្ត បានមានប្រសាសន៍កោតសរសើរយ៉ាងស្មោះអស់ពីដួងចិត្តចំពោះវីរភាពដ៏ឆ្នើម និងការលះបង់សាច់ស្រស់ឈាមស្រស់របស់កងទ័ពខ្មែរគ្រប់រូប។ ឯកឧត្តមបានបញ្ជាក់ថា៖ «អំណោយទាំងនេះគឺជាទឹកចិត្តរបស់មន្ត្រីសាលាដំបូង និងសប្បុរសជន ដើម្បីជួយសម្រាលបន្ទុករបស់រាជរដ្ឋាភិបាល និងបង្កើនស្មារតីរឹងមាំដល់កងទ័ពជួរមុខ ឱ្យពួកគាត់អាចផ្ដោតលើភារកិច្ចការពារជាតិ ដោយមិនមានការព្រួយបារម្ភពីជីវភាពគ្រួសារនៅខាងក្រោយ»។
លោក ង៉ូវ សេងកាក់ អភិបាលរងខេត្ត បានឱ្យដឹងថា ប្រជាពលរដ្ឋភៀសសឹកដែលមកពីខេត្តឧត្តរមានជ័យ បន្ទាយមានជ័យ និងព្រះវិហារ ស្នាក់នៅតាមមណ្ឌលសុវត្ថិភាពចំនួន ១៣១កន្លែង ក្នុងខេត្តសៀមរាប មានចំនួន ៤២ ២២៦ គ្រួសារ ស្មើនឹង ១៣២ ៨៧៦ នាក់ ក្នុងនោះមានប្រជាពលរដ្ឋចំនួន ៥ ២៤២ គ្រួសារ បានវិលត្រឡប់ទៅលំនៅដ្ឋានវិញ។ ចំពោះអ្នកដែលនៅសេសសល់ គឺដោយសារផ្ទះសម្បែងត្រូវបានបំផ្លាញ និងតំបន់ខ្លះមិនទាន់សុវត្ថិភាព ដោយសារក្រុមការងារស៊ីម៉ាក់ (CMAC) កំពុងបន្តបោសសម្អាតយុទ្ធភ័ណ្ឌមិនទាន់ផ្ទុះ។
សូមជម្រាបថា អំណោយដែលបានប្រគល់ជូនរួមមាន៖ អង្ករសរុប ១៥តោន, ថវិកា ៤៥លានរៀល និងសម្ភារប្រើប្រាស់មួយចំនួនទៀត។ ក្នុងនោះ អង្គភាពទាំង៣ គឺយោធភូមិភាគទី៤ កងពលធំលេខ២ និងរដ្ឋបាលខេត្ត ទទួលបានក្នុងមួយអង្គភាព៖ អង្ករ ៥តោន, ថវិកា ១៥លានរៀល ព្រមទាំងគ្រឿងឧបភោគបរិភោគ និងសម្ភារប្រើប្រាស់មួយចំនួន៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
