អនុវត្តតាមការណែនាំដ៏ខ្ពង់ខ្ពស់របស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប នាថ្ងៃទី១០ ខែមករា ឆ្នាំ២០២៦ កន្លងទៅថ្មីៗនេះ ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប រួមជាមួយឯកឧត្តមអគ្គលេខាធិការរង បានដឹកនាំក្រុមការងារបច្ចេកទេស ចុះពិនិត្យដោយផ្ទាល់នៅទីតាំងដីព្រៃលិចទឹកក្នុងតំបន់៣ ដែលរងការទន្ទ្រានកន្លងមក ស្ថិតក្នុងភូមិសាស្ត្រឃុំសង្វើយ និងឃុំគោកធ្លកក្រោម ស្រុកជីក្រែង ខេត្តសៀមរាប។
ជាលទ្ធផលនៃការចុះពិនិត្យជាក់ស្ដែង ក្រុមការងារបានវាយតម្លៃខ្ពស់ចំពោះកិច្ចសហការរវាងអាជ្ញាធរមូលដ្ឋាន និងផ្នែកជំនាញពាក់ព័ន្ធ ដែលបានរួមគ្នាទប់ស្កាត់បទល្មើសយ៉ាងមានប្រសិទ្ធភាព។ ក្នុងនោះ ក្រុមការងារសង្កេតឃើញថា ពុំមានការបន្តចូលទន្ទ្រាន លើទីតាំងចាស់ដែលធ្លាប់រងការរំលោភបំពានឡើយ និងពុំមានសកម្មភាពកាប់ឈូសឆាយថ្មី ក្នុងតំបន់ព្រៃលិចទឹកការពារនោះទេ។
គួរបញ្ជាក់ថា អាជ្ញាធរទន្លេសាប បន្តបំពេញបេសកកម្មយ៉ាងសកម្មលើការងារគ្រប់គ្រង ការពារ និងអភិរក្សធនធានធម្មជាតិ ជាពិសេសគឺការការពារដីព្រៃលិចទឹកក្នុងតំបន់៣ នៃខេត្តទាំង៦ ជុំវិញបឹងទន្លេសាប ដើម្បីធានាបាននូវនិរន្តរភាពប្រព័ន្ធអេកូឡូស៊ី និងជម្រកមច្ឆជាតិសម្រាប់ជាប្រយោជន៍ដល់ប្រជាជាតិទាំងមូល៕
អត្ថបទ និងរូបភាព៖ លោក អ៊ុន ណារាជ្យ
