នៅថ្ងៃទី១២ ខែមករា ឆ្នាំ២០២៥ លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ រួមជាមួយផលិតកម្មបារមី ក្រុមហ៊ុនសប្បាយតារា (បារាំង) និងសិល្បករ-សិល្បការិនីជាច្រើនរូប ដោយមានការចូលរួមពី លោក សំកុល សុចិត្រា អភិបាលរងខេត្ត បានចុះសួរសុខទុក្ខ និងនាំយកស្បៀងអាហារ សម្ភារប្រើប្រាស់ ដែលបានពីព្រឹត្តិការណ៍ប្រគំតន្ត្រី “Rise For Khmer” ចែកជូនបងប្អូនជនភៀសសឹក ក្រុមគ្រួសារកងទ័ព និងវីរកងទ័ព ចំនួន ១ ៨០០គ្រួសារ ក្នុងភូមិសាស្ត្រស្រុកស្រីស្នំ ខេត្តសៀមរាប។
លោកជំទាវអ្នកឧកញ៉ា ម៉ៅ ចំណាន គិតម៉េង បានបញ្ជាក់ថា Rise For Khmer គឺជាព្រឹត្តិការណ៍ប្រគំតន្ត្រី ដែលរៀបចំឡើងក្នុងគោលបំណងនាំយកសិល្បៈវប្បធម៌ដ៏ល្អផូរផង់កម្ពុជាទៅបង្ហាញ និងផ្សព្វផ្សាយនៅលើឆាកអន្តរជាតិ។ ព្រឹត្តិការណ៍នេះ ក៏ជាស្មារតីរួមនៃការងារមនុស្សធម៌ដ៏អស្ចារ្យ ក្នុងការកៀរគរថវិកាជួយដល់ប្រជាជនកម្ពុជា នៅតាមព្រំដែនកម្ពុជា-ថៃ ដែលទទួលរងផលប៉ះពាល់ពីការឈ្លានពាន, បាញ់ប្រហារយ៉ាងព្រៃផ្សៃពីកម្លាំងយោធាប្រទេសថៃ។ Rise For Khmer ក៏ជាការនាំសារដ៏សំខាន់ពីកម្ពុជាទៅប្រាប់ពិភពលោកឱ្យច្បាស់ថា ប្រទេសថៃ គឺជាអ្នកបង្កសង្គ្រាម ជាអ្នកឈ្លានពាន តែប្រទេសថៃតែងបំភ្លៃ និងសម្តែងថា ខ្លួនជាប្រទេសរងគ្រោះដោយគ្មានភាពអៀនខ្មាស។
ក្នុងឱកាសនោះ លោកជំទាវ បានសម្តែងនូវការសោកស្តាយ និងក្តុកក្តួលជាខ្លាំងចំពោះទុក្ខលំបាករបស់ជនភៀសសឹក លោកជំទាវបានសង្កត់ធ្ងន់ថា ភាពឈឺចាប់របស់បងប្អូន គឺជាការឈឺចាប់របស់ប្រជាជនកម្ពុជាទាំង ១៧លាននាក់។ សូមបងប្អូនកុំមានភាពឯកា យើងត្រូវតែសាមគ្គីគ្នាទប់ទល់នឹងការឈ្លានពាន។ ប្រវត្តិសាស្ត្រសបញ្ជាក់ថា យើងជាម្ចាស់ទឹកដី ជាកូនចៅបុព្វបុរសអង្គរ យើងនឹងឈ្នះ ហើយអ្នកបង្កសង្គ្រាមនឹងទទួលផលកម្ម។ ព្រឹត្តិការណ៍ Rise For Khmer ក៏ជាការផ្ញើសារទៅកាន់ពិភពលោក ដើម្បីបង្ហាញពីការពិតនៃស្ថានភាពព្រំដែន និងច្រានចោលរាល់ការបំភ្លៃព័ត៌មានពីសំណាក់ភាគីបង្កជម្លោះ ដែលតែងតែសម្តែងធ្វើជាជនរងគ្រោះ។
លោក សំកុល សុចិត្រា អភិបាលរងខេត្ត បានថ្លែងអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌របស់លោកជំទាវអ្នកឧកញ៉ា និងក្រុមការងារទាំងអស់ ដែលការផ្ដល់ជូននូវអំណោយទាំងនេះ បានបង្ហាញពីការយកចិត្តទុកដាក់ បង្ហាញពីស្មារតី “ខ្មែរស្រឡាញ់ខ្មែរក្នុងគ្រាលំបាក” “ខ្មែររួបរួមសាមគ្គីគ្នា” ក្នុងការជួយសម្រួលដល់ការរស់នៅរបស់បងប្អូនប្រជាពលរដ្ឋភៀសសឹក និងក្រុមគ្រួសារកងទ័ពពេលប្រទេសកំពុងមានការឈ្លានពាន។ លោកក៏បានថ្លែងអំណរគុណដល់បងប្អូនប្រជាពលរដ្ឋដែលជាសប្បុរសជនក្នុងខេត្ត និងក្រៅខេត្ត ដែលបានចូលរួមឧបត្ថម្ភគាំទ្រដល់ប្រជាជន ដែលបានជម្លៀសពីតំបន់សមរភូមិចូលមកភូមិសាស្ត្រខេត្តសៀមរាប ដោយទឹកចិត្តស្មោះសរ ក្នុងការរួបរួមជាតិខ្មែរជាធ្លុងមួយដោយស្មារតីខ្មែរជួយខ្មែរក្នុងគ្រាលំបាក៕
អត្ថបទ និងរូបភាព៖ លោក អ៊ុន ណារាជ្យ
