ក្រសួងអប់រំ យុវជន និងកីឡា សហការជាមួយមជ្ឈមណ្ឌលស្រាវជ្រាវអន្តរជាតិសម្រាប់កីឡា និងសមភាពយេនឌ័រនៃប្រទេសជប៉ុន បានបើកសិក្ខាសាលាស្តីពី «សកម្មភាពកីឡាអាស៊ាន-ជប៉ុន លើសមភាពយេនឌ័រ» (ASEAN-Japan Action on Sports: Gender Equality) ដើម្បីបង្កើនការចូលរួមរបស់ក្មេងស្រី និងស្ត្រីក្នុងវិស័យកីឡានៅតំបន់អាស៊ាន ដែលសិក្ខាសាលានេះប្រារព្ធឡើងរយៈពេល ៣ថ្ងៃ ចាប់ពីថ្ងៃទី១៣-១៥ ខែមករា ឆ្នាំ២០២៦ នៅខេត្តសៀមរាប។
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា គោលបំណងនៃសិក្ខាសាលានេះផ្តោតសំខាន់លើការរៀបចំពង្រាងគោលនយោបាយ៖ រៀបចំសមាសធាតុឆ្លើយតបនឹងសមភាពយេនឌ័រ ដើម្បីដាក់បញ្ចូលក្នុងគោលនយោបាយកីឡាជាតិរបស់ប្រទេសជាសមាជិកអាស៊ាននីមួយៗ។ បណ្តុះបណ្តាលលើការរៀបចំផែនការថវិកា និងបង្កើតសូចនាករសមភាពយេនឌ័រសម្រាប់ការត្រួតពិនិត្យរួមក្នុងតំបន់ សំដៅជំរុញការចូលរួមរបស់ស្ត្រី និងក្មេងស្រី រួមទាំងអ្នករស់នៅតំបន់ដាច់ស្រយាលឱ្យមានឱកាសក្នុងវិស័យកីឡា។
ឯកឧត្តម វ៉ាត់ ចំរើន បានបញ្ជាក់ថា សិក្ខាសាលានេះមានអត្ថន័យយ៉ាងជ្រាលជ្រៅ ដែលឆ្លុះបញ្ចាំងពីលក្ខណៈចម្រុះរបស់អាស៊ាន និងឆ្លើយតបយ៉ាងចំទៅនឹង «យុទ្ធសាស្ត្របញ្ចកោណ» របស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្ស។ ឯកឧត្តមថា ក្រសួងអប់រំ កំពុងជំរុញផែនការយុទ្ធសាស្ត្របញ្ជ្រាបយេនឌ័រ តាមរយៈការបង្កើនការចូលរៀនរបស់ក្មេងស្រី និងរក្សាគ្រូបង្រៀនស្រ្តី ប្រឆាំងអំពើហិង្សាផ្អែកលើយេនឌ័រក្នុងប្រព័ន្ធអប់រំ និងអនុវត្តស្របតាមផែនការជាតិ «នារីរតនៈទី៦» ដើម្បីការផ្លាស់ប្តូរយេនឌ័រជាវិជ្ជមាន។
ឯកឧត្តមបន្ថែមថា ខ្លឹមសារនៃសិក្ខាសាលានេះ ក៏នឹងក្លាយជាចំណែកមួយយ៉ាងសំខាន់ក្នុងការសម្រេចឱ្យបាននូវ ផែនការការងារអាស៊ានស្តីពីកីឡាឆ្នាំ ២០២៦-២០៣០ ដែលរួមមានសសរស្ដម្ភចំនួន ៧ រួមមាន៖ កីឡាដើម្បីសន្តិភាព, វិទ្យាសាស្ត្រកីឡា, សុចរិតភាពកីឡា, កីឡាបរិយាប័ន្ន, តម្លៃវប្បធម៌សហគមន៍, ឧស្សាហកម្មទេសចរណ៍កីឡា និងការអភិវឌ្ឍកីឡាប្រកបដោយចីរភាព។ តាមរយៈកិច្ចសហប្រតិបត្តិការដ៏រឹងមាំរវាងអាស៊ាន និងជប៉ុន កម្ពុជារំពឹងថាវិស័យអប់រំកាយ និងកីឡានឹងកាន់តែមានបរិយាប័ន្ន ដែលផ្តល់ឱកាសស្មើគ្នាចំពោះគ្រប់ភេទក្នុងតំបន់ទាំងមូល៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
