នៅព្រឹកថ្ងៃទី១៥ ខែមករា ឆ្នាំ២០២៦នេះ ឯកឧត្តម ម៉ក់ សំភារ សមាជិកក្រុមប្រឹក្សាខេត្តសៀមរាប និង លោក ង៉ូវ សេងកាក់ អភិបាលរងខេត្ត បានដឹកនាំប្រតិភូខេត្ត អញ្ជើញចូលរួមគោរពវិញ្ញាណក្ខន្ធ និងរំលែកទុក្ខ ជាមួយក្រុមគ្រួសារសព លោកវរសេនីយ៍ឯក ប៉ក់ ឡា នាយសេនាធិការរង យោធភូមិភាគទី៤ ដែលបានទទួលមរណៈភាព កាលពីថ្ងៃទី១៣ ខែមករា ឆ្នាំ២០២៦ កន្លងទៅ ក្នុងជន្មាយុ៦១ឆ្នាំ ដោយរោគាពាធ ហើយសពត្រូវបានតម្កល់ធ្វើបុណ្យនៅគេហដ្ឋាននៃសពស្ថិតនៅភូមិតាវៀន សង្កាត់សាលាកំរើក ក្រុងសៀមរាប។
ក្នុងឱកាសដ៏ក្រៀមក្រំនោះ ថ្នាក់ដឹកនាំ និងប្រតិភូខេត្ត បានសម្ដែងការសោកស្ដាយ ចំពោះការបាត់បង់នូវថ្នាក់ដឹកនាំដ៏ឆ្នើមមួយរូប ពោរពេញទៅដោយមនសិការស្នេហាជាតិ ក្នុងការដឹកនាំបំពេញកាតព្វកិច្ចការពារ កសាងជាតិមាតុភូមិក្នុងមួយជីវិត ដែលបានធ្វើពលិកម្មគ្រប់បែបយ៉ាង និងការលះបង់ធំធេង ក្នុងបុព្វហេតុជាតិ សាសនា ព្រះមហាក្សត្រ ក្នុងបុព្វហេតុការពារជាតិ មាតុភូមិ និងការពារបូរណភាពទឹកដី និងនាំមកនូវសេចក្ដីសុខសន្តិភាព សុវត្ថិភាពជូនប្រជាជាតិកម្ពុជាទាំងមូល។
ក្នុងនោះដែរគណៈប្រតិភូក៏បានធ្វើការបូជាទៀនធូប ដើម្បីឧទ្ទិសជូនដល់ដួងវិញ្ញាណក្ខន្ធសព សូមឱ្យ លោកវរសេនីយ៍ឯក ប៉ក់ ឡា បានទៅកាន់សុខគតិភពថ្មី ព្រមទាំងបែរងាកក្រោយឱ្យពរជ័យដល់ក្រុមគ្រួសារ បងប្អូន កូនចៅ និងថ្នាក់ដឹកនាំគ្រប់ជាន់ថ្នាក់ ក្នុងជួរកងកម្លាំងប្រដាប់អាវុធ មន្ត្រីរាជការ ឱ្យទទួលនូវសេចក្ដីសុខ និងឱ្យស្គាល់នូវតែសុខសន្តិភាព សុភមង្គល និងការអភិវឌ្ឍន៍ប្រទេសជាតិលើគ្រប់វិស័យ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
