នារសៀលថ្ងៃទី១៥ ខែមករា ឆ្នាំ២០២៦ សាខាសមាគមអតីតយុទ្ធជន និងនិវត្តជនកម្ពុជា ខេត្តសៀមរាប បាននាំយកថវិការបស់ សម្តេចអគ្គមហាសេនាធិបតីតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជន និងនិវត្តជនកម្ពុជា ប្រគល់ជូនដល់ក្រុមគ្រួសារសពបងប្អូនអតីតយុទ្ធជនចំនួន ១៦គ្រួសារ ក្នុងក្រុងសៀមរាប ដើម្បីសម្រួលដល់ក្រុមគ្រួសារក្នុងការរៀបចំបុណ្យសពឱ្យបានសមរម្យ និងទាន់ពេលវេលា។
លោកឧត្តមសេនីយ៍ទោ ហួត សុធី ប្រធានលេខាធិការដ្ឋានសាខាសមាគមអតីតយុទ្ធជន និងនិវត្តជនកម្ពុជាខេត្ត បានបង្ហាញថា ក្នុងរយៈពេលមួយឆ្នាំ២០២៥ សមាគមបានប្រគល់ថវិកាជូនគ្រួសារសមាជិកសមាគមសរុបចំនួន ១៥១សព ក្នុងនោះថវិកាសម្តេចតេជោ ចំនួន ៥៦សព និងថវិកាបេឡាមរណៈសង្គ្រោះចំនួន ៧៩សព។ បច្ចុប្បន្នខេត្តសៀមរាបមានសមាជិកអតីតយុទ្ធជនចំនួន ៦ ៦៨៧នាក់ ក្នុងនោះមាននិវត្តជន ជនពិការ ជនបាត់បង់សមត្ថភាពពលកម្ម គ្រួសារជនពលី និងគ្រួសារជនមរណៈ និងមាននិវត្តជនដែលមិនទាន់ចូលជាសមាជិកសមាគមចំនួន ២ ៦៨២នាក់ ហើយនិវត្តជនដែលជាមន្ត្រីរាជការស៊ីវិលដែលមិនទាន់ចូលជាសមាជិកមានចំនួន ៣ ៤៣៣នាក់។
លោក នាក់ ណេរ៉ុន អភិបាលរងខេត្ត និងអនុប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្ត តំណាង ឯកឧត្តម ប្រាក់ សោភ័ណ អភិបាលខេត្ត និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្តសៀមរាប បានសម្ដែងនូវមរណៈទុក្ខ និងចូលរួមសោកស្ដាយជាមួយបងប្អូនសាច់ញាតិនៃអតីតយុទ្ធជនទាំង ១៦រូប ដែលបានទទួលមរណកាលកន្លងទៅនេះ និងសូមឧទ្ទិសវិញ្ញាណក្ខន្ធបានសោយសុខក្នុងឋានសុគតិភពកុំបីឃ្លៀងឃ្លាតឡើយ។
លោកនាក់ ណេរ៉ុន មានប្រសាសន៍ថា ក្រោមការដឹកនាំរបស់ សម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និង សម្ដេចបវរធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា បានបន្តការខិតខំប្រឹងប្រែងគ្រប់បែបយ៉ាង ដើម្បីដោះស្រាយនូវរាល់ការលំបាករបស់បងប្អូនអតីតយុទ្ធជនយើងមានដូចជា ការបែងចែកដីធ្លី ការសាងសង់ផ្ទះសម្បែងជូនបងប្អូនអតីតយុទ្ធជន ដែលមានជីវភាពលំបាកខ្វះខាតពិតប្រាកដ និងការផ្ដល់នូវបណ្ណបេឡាជាតិសន្តិសុខសង្គម ជូនបងប្អូនអតីតយុទ្ធជន សម្រាប់ទៅព្យាបាលជំងឺនៅមន្ទីរពេទ្យរដ្ឋ ដោយឥតគិតថ្លៃ។ ហើយនៅពេលដែលអតីតយុទ្ធជនយើងទទួលមរណភាព ក្រុមគ្រួសារសពទទួលបានថវិកាបេឡាមរណសង្គ្រោះចំនួន ៤លានរៀល សម្រាប់សម្រួលដល់ការធ្វើបុណ្យសពឱ្យបានសមរម្យ និងឱ្យទាន់ពេលវេលាផងដែរ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
