នារសៀលថ្ងៃទី២៥ ខែមករា ឆ្នាំ២០២៦ ប្រតិភូមន្ត្រីសង្ឃខេត្តបាត់ដំបង ពុទ្ធិកសមាគមព្រះសង្ឃខ្មែរសហរដ្ឋអាមេរិក អមដំណើរដោយព្រះវិចិត្រវង្សា ហែម គឹមសាន ព្រះគ្រូចៅអធិការវត្តប្រាសាទគោកចក ក្រុងសៀមរាប បាននិមន្តសួរសុខទុក្ខ និងនាំយកអំណោយសប្បុរសធម៌ជូនវីរកងទ័ព ដែលកំពុងសម្រាកព្យាបាលជំងឺនៅមន្ទីរពេទ្យយោធភូមិភាគទី៤ ខេត្តសៀមរាប។
ក្នុងឱកាសនោះ ប្រតិភូមន្ត្រីសង្ឃ បានធ្វើការអរគុណដល់បងប្អូនវីរៈកងទ័ពយើងទាំងអស់ ដែលបានខិតខំប្រឹងប្រែងប្ដូរផ្ដាច់ការពារបូរណភាពទឹកដី និងរក្សាសន្តិសុខជូនជាតិមាតុភូមិ ដែលត្រូវប្រឈមនឹងការលំបាកនូវសព្វគ្រប់បែបយ៉ាង និងឃ្លាតឆ្ងាយពីកូន ប្រពន្ធ គ្រួសារសាច់ញាតិ និងឪពុកម្ដាយ ហាលភ្លៀងហាលខ្យល់ ដើម្បីការពារទឹកដីខ្មែរ និងប្រជារាស្រ្តខ្មែរបានសុខសាន្ត។ ការការពារខ្លួន និងការពារទ្រព្យសម្បត្តិ ទឹកដី ព្រមទាំងអាយុជីវិត គឺយើងត្រូវតែការពារក្នុងករណីមានគេមកបំពាន ឬមកឆក់ប្លន់។
ការការពារទឹកដីនេះ ជាការបំពេញកតញ្ញូដ៏ប្រសើរណាស់ ហើយផលនៃកតញ្ញូនេះនឹងនាំឱ្យកងកម្លាំងយើងប្រកបតែនឹងសុខចម្រើនជានិច្ច។ ប្រតិភូមន្ត្រីសង្ឃក៏បានផ្ដាំផ្ញើដល់បងប្អូនវីរៈកងទ័ពដែលបានកំពុងសម្រាកព្យាបាល ត្រូវយកចិត្តទុកដាក់ស្ដាប់នូវវេជ្ជបញ្ជាគ្រូពេទ្យ ដើម្បីឱ្យបានឆាប់ជាសះស្បើយរបួស និងជំងឺ នឹងបានវិលត្រឡប់ទៅកាន់អង្គភាពខ្លួនវិញ ព្រមទាំងបានបួងសួងដល់វត្ថុស័ក្តសិទ្ធិទាំងអស់នៅលើលោក សូមជួយថែរក្សាកងកម្លាំងប្រដាប់អាវុធទាំងអស់ឱ្យទទួលបានជោគជ័យលើសត្រូវដែលឈ្លានពានទឹកដីរបស់យើង និងដើម្បីថែរក្សាការពារសុខសន្តិភាពជូនជាតិមាតុភូមិ។
ក្នុងឱកាសនោះប្រតិភូមន្ត្រីសង្ឃ ក៏បានប្រទានអំណោយជាថវិកាដល់បងប្អូនវីរៈកងទ័ព ដែលកំពុងសម្រាកព្យាបាល និងអ្នកមើលថែនៅមន្ទីរពេទ្យ ព្រមទាំងបានឧបត្ថម្ភថវិកាដល់លោកគ្រូ អ្នកគ្រូពេទ្យផងដែរ។ ជាមួយគ្នានោះ ប្រតិភូមន្ត្រីសង្ឃក៏បាននិមន្តសួរសុខទុក្ខបងប្អូនភៀសសឹកស្នាក់នៅក្នុងវត្តប្រាសាទគោកចក ព្រមទាំងបានប្រគេនបច្ច័យមួយចំនួនដល់ព្រះគ្រូចៅអធិការ សម្រាប់ចាត់ចែងធ្វើម្ហូបអាហារប្រចាំថ្ងៃថែមទៀតផង៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
