មន្ត្រីជាន់ខ្ពស់ក្រសួងកសិកម្ម បានណែនាំដល់ថ្នាក់ដឹកនាំ មន្រ្តីមន្ទីរកសិកម្មខេត្ត និងបណ្តាដៃគូពាក់ព័ន្ធនានា បន្តជួយណែនាំកសិករក្នុងការរៀបចំដីស្រែឱ្យបានត្រឹមត្រូវតាមបច្ចេកទេស និងពន្យល់ណែនាំគាត់ជ្រើសរើសប្រភេទពូជស្រូវសុទ្ធល្អដែលផ្ដល់ទិន្នផលខ្ពស់ សមស្របនឹងក្សេត្របរិស្ថាន ធន់នឹងការប្រែប្រួលអាកាសធាតុ ឆ្លើយតបនឹងតម្រូវការទីផ្សារ និងមានតម្លៃខ្ពស់ ពិសេសត្រូវផ្តល់ការលើកទឹកចិត្ត និងពង្រឹងសមត្ថភាពសហគមន៍កសិកម្ម ដើម្បីផលិតក្នុងទ្រង់ទ្រាយធំ ដោយអនុវត្តយន្តការផលិតកម្មកសិកម្មតាមកិច្ចសន្យាដោយស្មោះត្រង់រវាងអ្នកផលិត និងអ្នកប្រមូលទិញ។
ថ្លែងបិទអង្គសិក្ខាសាលាបូកសរុបលទ្ធផលការងារកសិកម្ម រុក្ខាប្រមាញ់ និងនេសាទ ខេត្តសៀមរាប ឆ្នាំ២០២៥ និងទិសដៅបន្ត នៅថ្ងៃទី២៦ ខែមករា ឆ្នាំ២០២៦នេះ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម បានជំរុញឱ្យមន្ទីរត្រូវបន្តលើកកម្ពស់ការតាមដានចរន្តសត្វ អនាម័យសត្វ និងភូតគាមអនាម័យ ព្រមទាំងពង្រីក និងពង្រឹងសមត្ថកិច្ចត្រួតពិនិត្យអនាម័យសាច់តាមទីសត្តឃាតដ្ឋាន ការចាក់វ៉ាក់សំាងសត្វ ដើម្បីសុវត្ថិភាព សុខភាពសាធារណៈ។ ពង្រឹងការអភិរក្សធនធានជលផល តាមរយៈការអភិវឌ្ឍវារីវប្បកម្ម ដោយលើកទឹកចិត្តឱ្យចិញ្ចឹមត្រីតាមស្រះ ក្នុងបែរ ក្នុងតង់ និងក្នុងស្រែ តាមស្ថានភាពជាក់ស្ដែង ព្រមទាំងលែងពូជត្រីក្នុងបឹងធម្មជាតិ ដើម្បីបង្កើនផលស្តុកក្នុងបឹងធម្មជាតិសម្រាប់សេចក្ដីត្រូវការរបស់ប្រជាពលរដ្ឋ។
ឯកឧត្តមបន្តថា ចំពោះព្រៃឈើ ត្រូវសហការទប់ស្កាត់ និងបង្ក្រាបបទល្មើសព្រៃឈើ សត្វព្រៃឱ្យមានប្រសិទ្ធភាពខ្ពស់ អន្តរាគមន៍ឱ្យទាន់ពេលវេលានូវភ្លើងឆេះព្រៃ។ ឯកឧត្តម ក៏បានស្នើដល់រដ្ឋបាលខេត្តសៀមរាប មន្ទីរអង្គភាពជុំវិញខេត្ត និងអាជ្ញាធរមូលដ្ឋានពាក់ព័ន្ធ សូមបន្តចូលរួមគាំទ្រការងារផ្សេងៗដល់មន្ទីរកសិកម្ម រុក្ខាប្រមាញ់ និងនេសាទ និងសហការក្នុងដោះស្រាយបញ្ហា ឬសំណូមពរនានាជូនប្រជាកសិករ។
ក្នុងឱកាសនោះដែរ លោក អ៊ឹង គឹមលាង អភិបាលរងខេត្ត ក៏បានជំរុញដល់ថ្នាក់ដឹកនាំ និងមន្ត្រីតាមផ្នែកតាមវិស័យនៃមន្ទីរកសិកម្មខេត្ត បន្តយកចិត្តទកដាក់ពង្រឹងការអនុវត្តច្បាប់ ទប់ស្កាត់ បង្រ្កាបបទល្មើស ការចរាចរសត្វ ព្រៃឈើ និងជលផលគ្រប់ប្រភេទ និងជំរុញការគ្រប់គ្រង និងអភិវឌ្ឍន៍សហគមន៍ព្រៃឈើ ឱ្យមានប្រសិទ្ធភាព ព្រមទាំងបន្តផ្សព្វផ្សាយច្បាប់ និងលិខិតបទដ្ឋានគតិយុត្តពាក់ព័ន្ធនានាដល់អាជ្ញាធរមូលដ្ឋាននិងប្រជាពលរដ្ឋ។
លោកអភិបាលរងខេត្ត ក៏បានស្នើឱ្យមន្ត្រីកសិកម្មគ្រប់លំដាប់ថ្នាក់ ជំរុញឱ្យមានការផ្សព្វផ្សាយ ណែនាំដល់កសិករក្នុងការរៀបចំដីស្រែឱ្យបានត្រឹមត្រូវតាមបច្ចេកទេស ជាពិសេសជំរុញការផ្លាស់ប្តូរទម្លាប់របស់កសិករពីការប្រើប្រាស់ពូជប្រពៃណី មកជ្រើសរើសប្រភេទពូជស្រូវសុទ្ធល្អ និងផ្សព្វផ្សាយឱ្យពួកគាត់ពីរបៀបប្រើប្រាស់ថ្នាំកសិកម្ម ដើម្បីបំផ្លាញសមាសភាពចង្រៃ និងជំងឺឆ្លងសត្វ ដែលត្រូវមានការប្រុងប្រយ័ត្នខ្ពស់បំផុត ពោលគឺត្រូវអនុវត្តតាមបទដ្ឋានបច្ចេកទេស និងគោលការណ៍សុវត្ថិភាពឱ្យបានម៉ឹងម៉ាត់។ បន្ថែមពីនេះ ត្រូវបន្តពង្រឹងការអនុវត្តច្បាប់ ទប់ស្កាត់ បង្រ្កាបបទល្មើស ចរាចរសត្វ ព្រៃឈើ និងជលផលគ្រប់ប្រភេទ និងជំរុញការគ្រប់គ្រង និងអភិវឌ្ឍន៍សហគមន៍ព្រៃឈើ និងសហគមន៍នេសាទ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
