អង្ករចំនួន ២៥តោន គ្រឿងឧបភោគបរិភោគ រួមទាំងសម្ភារប្រើប្រាស់ ដែលជាអំណោយរបស់សប្បុរសជនខេត្តព្រះសីហនុ ត្រូវបានលោក ហែម ដារិទ្ធិ អភិបាលរងខេត្តព្រះសីហនុ និង សហការី បាននាំយកមកប្រគល់ជូនរដ្ឋបាលខេត្តសៀមរាប នារសៀលថ្ងៃទី២៦ ខែមករា ឆ្នាំ២០២៦ ក្រោមវត្តមានលោក សំកុល សុចិត្រា អភិបាលរងខេត្តសៀមរាប។
លោក ហែម ដារិទ្ធិ អភិបាលរងខេត្តព្រះសីហនុ បានឱ្យដឹងថា អំណោយជាគ្រឿងឧបភោគបរិភោគ និងសម្ភារប្រើប្រាស់ ដែលរដ្ឋបាលខេត្តព្រះសីហនុ បានទទួលពីបងប្អូនសប្បុរសជន ដើមី្បនាំមកផ្តល់ជូនរដ្ឋបាលខេត្តសៀមរាប ក្នុងការចាត់ចែងផ្គត់ផ្គង់ដល់បងប្អូនគ្រួសារវីរកងទ័ពជួរមុខ និងបងប្អូនភៀសសឹក ដែលបានកំពុងស្នាក់នៅតាមមណ្ឌលសុវត្ថិភាព ក្នុងភូមិសាស្ត្រខេត្តសៀមរាប។
លោក សំកុល សុចិត្រា អភិបាលរងខេត្ត បានបញ្ជាក់ជូនប្រតិភូផងដែរថា ចាប់ពីការឈ្លានពានរបស់ទាហានថៃមក បងប្អូនភៀសសឹក មកពីខេត្តឧត្តរមានជ័យ ,បន្ទាយមានជ័យ និង ខេត្តព្រះវិហារ មកស្នាក់នៅតាមមណ្ឌលសុវត្ថិភាព ទាំង១៣១កន្លែង ក្នុងភូមិសាស្ត្រខេត្តសៀមរាប។ នៅក្រោយកិច្ចឈប់បាញ់ បងប្អូនភៀសសឹកក៏ បានវិលទៅកាន់លំនៅឋាន ភូមិឃុំស្រុករបស់ខ្លួនវិញ គិតមកត្រឹមថ្ងៃទី២៦ ខែមករា បងប្អូនភៀសសឹកដែលកំពុងស្នាក់នៅតាមមណ្ឌលសុវត្ថិភាព ចំនួន៥៤ទីតាំងតាមបណ្តាក្រុងស្រុក មានចំនួន ៨ ៦៨៩គ្រួសារ មនុស្ស ២៦ ៩៤៧នាក់។
លោកបានឱ្យដឹងថា ចំពោះបងប្អូន ដែលកំពុងស្នាក់នៅតាមមណ្ឌលនោះ ដោយផ្ទះសម្បែងពួកគាត់ ត្រូវបានសត្រូវឈ្លានពានបំផ្លិចបំផ្លាញ និង មួយចំនួនទៀត អាជ្ញាធរមិនទាន់អនុញ្ញាតឱ្យចូលទៅរស់នៅ ដោយបច្ចុប្បន្ននេះ ក្រុមការងារស៊ីម៉ាក់ មិនទាន់បានបោសសម្អាតយុទ្ធភ័ន្តមិនទាន់ផ្ទុះ ដែលនៅសេសសល់ដោយសង្គ្រាម។ ម្យ៉ាងទៀតរាល់អំណោយដែលទទួលបានពីបងប្អូនសប្បុរសជន មួយចំនួន ត្រូវបានបែងចែកជូនទៅសមរភូមិមុខ និង ផ្គត់ផ្គង់ជូនបងប្អូនភៀសសឹក ហើយមួយចំនួនត្រូវបានត្រៀមបម្រុង ទ្រទ្រង់ជីវភាពដល់បងប្អូន ដែលកំពុងស្នាក់នៅតាមមណ្ឌលសុវត្ថិភាពបន្តផងដែរ។
ក្នុងនាមរដ្ឋបាលខេត្តសៀមរាប លោកអភិបាលរងខេត្ត សូមថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្តដ៏ថ្លៃថ្លារបស់ ឯកឧត្តម ម៉ាង ស៉ីណាត អភិបាល នៃគណៈអភិបាលខេត្តព្រះសីហនុ និងសហការី ព្រមទាំងសប្បុរសជនដែលបានចូលរួមឧបត្ថម្ភសម្រាប់ក្រុមគ្រួសារវីរកងទ័ព និងបងប្អូនភៀសសឹកដោយទឹកចិត្តស្មោះសរក្នុងការរួបរួមជាតិខ្មែរជាធ្លុងមួយដោយស្មារតីខ្មែរជួយខ្មែរក្នុងគ្រាលំបាក៕
អត្ថបទ និងរូបភាព៖ លោក អ៊ុន ណារាជ្យ
