អាជ្ញាធរខេត្តសៀមរាប នៅថ្ងៃទី៣០ ខែកញ្ញា ឆ្នាំ២០២៥នេះ បានចាប់ផ្ដើមប្រើប្រាស់គ្រឿងចក្រកាយស្ដារប្រព័ន្ធលូ និងប្រឡាយរំដោះទឹក នៅតាមបណ្ដោយផ្លូវជាតិលេខ៦ ចាប់ពីតំបន់ខាងលិចរង្វង់មូលផ្ការំដួលស្វាយធំ រហូតដល់អតីតទីតាំងភោជនីយដ្ឋានអាប៉ូឡូប្លាហ្សា ដើម្បីបង្កើនល្បឿន និងសមត្ថភាពរំដោះទឹក បញ្ចៀសបញ្ហាជំនន់ទឹកភ្លៀងនៅក្នុងភូមិសាស្ត្រប៉ែកខាងកើតក្រុងសៀមរាប និងស្រុកប្រាសាទបាគង។
ក្នុងឱកាសដឹកនាំក្រុមការងារចុះពិនិត្យទីតាំងផ្ទាល់ នៅព្រឹកថ្ងៃទី៣០ ខែកញ្ញា ឆ្នាំ២០២៥នេះ លោក ឌី រ៉ាដូ អភិបាលរងខេត្ត បានគូសបញ្ជាក់ថា ការបន្ថែមប្រព័ន្ធបង្ហូរទឹកភ្លៀង ឬទឹកដក់ឱ្យហូរចូលទៅក្នុងប្រព័ន្ធលូធំ គឺដើម្បីបង្កើនល្បឿន និងសមត្ថភាពរំដោះទឹក កុំឱ្យជន់លិចទីធ្លាសាធារណៈ ឬហូរចូលផ្ទះប្រជាពលរដ្ឋ។ តាមរយៈការដាក់លូថ្មី ឬពង្រីកលូដែលមានស្រាប់នៅតាមមុខផ្ទះនេះ អាចការពារផ្ទះសម្បែង ទ្រព្យសម្បត្តិ និងហេដ្ឋារចនាសម្ព័ន្ធផ្លូវ មិនឱ្យខូចខាតដោយសារជំនន់។
បើតាម លោក ឈឿន វិចិត្រ អភិបាលរងស្រុកប្រាសាទបាគង បានបញ្ជាក់ថា មូលហេតុនៃការជន់លិចនេះ គឺដោយសារភ្លៀងធ្លាក់ជាប់គ្នាជាច្រើនថ្ងៃ និងទឹកហូរធ្លាក់មកពីឃុំអំពិល បណ្ដាលឱ្យជំនន់ទឹកភ្លៀងហក់ឡើងតាមបណ្ដោយផ្លូវជាតិលេខ៦ ក្នុងភូមិសាស្ត្រមួយចំនួននៃស្រុកប្រាសាទបាគង។ លោកបន្ថែមថា បញ្ហាចម្បងមួយទៀតគឺ លូរំដោះទឹកមានសភាពតូច ដែលធ្វើឱ្យលំហូរទឹកមិនអាចរំដោះទាន់។
លោកអភិបាលរងស្រុក បញ្ជាក់ទៀតថា ក្រោយការស្ដារលូនេះ អាជ្ញាធរខេត្តនឹងបន្តសម្របសម្រួលជាមួយប្រជាពលរដ្ឋក្នុងការ ដាក់លូតាមមុខផ្ទះតាមលទ្ធភាពជាក់ស្ដែង។ ជាមួយគ្នានេះ លោកសូមសំណូមពរដល់ប្រជាពលរដ្ឋឱ្យចូលរួមទុកដាក់សំរាមឱ្យបានត្រឹមត្រូវ ដើម្បីកុំឱ្យមានការកកស្ទះនៅក្នុងលូ ដែលធ្វើឱ្យចរន្តនៃការហូររបស់ទឹកមានការរអាក់រអួល៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
