សម្ដេចព្រះព្រហ្មរតនមុនី ពិន សែម សិរីសុវណ្ណោ ព្រះប្រធានថេរសភាព្រះពុទ្ធសាសនានៃព្រះរាជាណាចក្រកម្ពុជា និងជាសម្តេចព្រះចៅអធិការ វត្តរាជបូណ៌ កាលពីរសៀលថ្ងៃទី១ ខែតុលា ឆ្នាំ២០២៥ បាននិមន្តដឹកនាំព្រះមន្រ្តីសង្ឃ ព្រះគ្រូចៅអធិការវត្តក្នុងក្រុងសៀមរាប និងពុទ្ធបរិស័ទក្នុងខេត្តសៀមរាប ចុះទៅសួរសុខទុក្ខ និងនាំយកសម្ភារប្រើប្រាស់មួយចំនួន ទៅជូនដល់កងទ័ពជួរមុខនៅតាមបន្ទាត់ព្រំដែន ក្នុងខេត្តព្រះវិហារ និងឧត្តរមានជ័យ។
សម្តេចព្រះព្រហ្មរតនមុនី ពិន សែម បានមានព្រះថេរដីកាថ្លែងអំណរគុណយ៉ាងជ្រាលជ្រៅចំពោះកងកម្លាំងជួរមុខទាំងអស់ ដែលបានខិតខំប្រឹងប្រែង ការពារបូរណភាពទឹកដី និងរក្សាសន្តិសុខជូនជាតិមាតុភូមិ។ សម្តេចផ្ទាល់មានព្រះទ័យស្រណោះអាណិតដល់កងកម្លាំង ដែលត្រូវប្រឈមនឹងការលំបាកសព្វបែបយ៉ាង ឆ្ងាយពីកូន ប្រពន្ធ គ្រួសារសាច់ញាតិ និងឪពុកម្ដាយ ហាលភ្លៀងហាលខ្យល់ ដើម្បីឱ្យទឹកដីខ្មែរ និងប្រជារាស្រ្តខ្មែរបានសុខសាន្ត។
សម្តេចបានបន្តថា ការការពារខ្លួន ការពារទ្រព្យសម្បត្តិ ទឹកដី ព្រមទាំងអាយុជីវិត គឺយើងត្រូវតែការពារក្នុងករណីមានគេមកបំពាន ឬមកឆក់ប្លន់ ដែលជាសកម្មភាពមិនខុសឆ្គងឡើយ ទាំងតាម ច្បាប់រដ្ឋ និងច្បាប់សាសនា។ លើសពីនេះ សម្តេចបានបញ្ជាក់ថា ការពារទឹកដីនេះ ជាការបំពេញកតញ្ញូដ៏ប្រសើរបំផុត ហើយផលនៃកតញ្ញូនេះនឹងនាំឱ្យកងកម្លាំងប្រកបតែនឹងសុខចម្រើនជានិច្ច។ ព្រះអង្គបានបួងសួងដល់វត្ថុស័ក្តសិទ្ធិទាំងអស់នៅលើលោក សូមជួយថែរក្សាកងកម្លាំងប្រដាប់អាវុធទាំងអស់ ឱ្យទទួលបានជោគជ័យលើសត្រូវដែលឈ្លានពានយកទឹកដី និងដើម្បីថែរក្សាការពារសុខសន្តិភាព។
សម្តេចព្រះព្រហ្មរតនមុនី ពិន សែម មានព្រះថេរដីកាបញ្ជាក់បន្ថែមថា យើងទាំងអស់គ្នាមានចំណងមិត្តភាពរួមគ្នា ៣យ៉ាង គឺទាំងព្រះសង្ឃ ពុទ្ធបរិស័ទ និងកងកម្លាំងប្រដាប់អាវុធគឺរួមជាតិ, រួមសាសនា និងរួមទុក្ខ។ ដូច្នេះហើយ ព្រះសង្ឃ និងពុទ្ធបរិស័ទ បានមកសួរសុខទុក្ខកងទ័ពជួរមុខ ដែលឈរជើងតាមខ្សែបន្ទាត់ព្រំដែនកម្ពុជា-ថៃ ដែលបានខិតខំប្រឹងប្រែងការពារបូរណភាពទឹកដី។ សម្តេចបានសង្កត់ធ្ងន់ថា យើងត្រូវតែ រួមសុខរួមទុក្ខ ជាមួយគ្នាដើម្បីការពារបូរណភាពទឹកដីរបស់យើង ដោយអ្នកខាងក្រោយត្រូវជួយជ្រោមជ្រែងអ្នកខាងមុខ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
