មន្ត្រីជាន់ខ្ពស់ក្រសួងព័ត៌មាន បានលើកឡើងថា ប្រព័ន្ធបច្ចេកវិទ្យាព័ត៌មានគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋជំនាន់ថ្មី (SARMIS-V2) នឹងជួយបង្កើនល្បឿនលើការងារគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ តាមរយៈការបញ្ចូលទិន្នន័យ ពិនិត្យនិងផ្ទៀងផ្ទាត់ទិន្នន័យ ប្រកបដោយតម្លាភាព គណនេយ្យភាព និងទំនួលខុសត្រូវខ្ពស់។
ថ្លែងបើកសិក្ខាសាលាស្ដីពីការប្រើប្រាស់ប្រព័ន្ធ SARMIS ជំនាន់ថ្មី លើកទី២ នៅខេត្តសៀមរាប នាថ្ងៃទី២ ខែតុលា ឆ្នាំ២០២៥ លោកជំទាវ ទេស ផល្លីន អគ្គនាយិកា នៃអគ្គនាយកដ្ឋានរដ្ឋបាល និងហិរញ្ញវត្ថុក្រសួងព័ត៌មាន មានប្រសាសន៍ថា នីតិវិធីថ្មីនេះ នឹងជួយបង្កើនល្បឿនបន្ថែមមួយកម្រិតទៀតក្នុងការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ។ តាមរយៈការប្រើប្រាស់ប្រព័ន្ធនេះ ដំណើរការនៃការបញ្ចូលទិន្នន័យ ពិនិត្យនិងផ្ទៀងផ្ទាត់ទិន្នន័យ និងការរៀបចំរបាយការណ៍ដែលមានលក្ខណៈស្ដង់ដាររួម នឹងចំណាយពេលនិងធនធានតិចជាងមុន។ កាលពីមុន ដំណើរការនេះត្រូវចំណាយពេលច្រើន និងប្រើប្រាស់បានតែកុំព្យូទ័រដែលបានបញ្ចូលប្រព័ន្ធ SARMIS ចាស់តែប៉ុណ្ណោះ។
លោកជំទាវ ទេស ផល្លីន បានបន្តថា នេះគឺជាលើកទី២ហើយ ដែលក្រសួងព័ត៌មាន បានពង្រីកវិសាលភាពនៃការបណ្ដុះបណ្ដាលលើការប្រើប្រាស់ប្រព័ន្ធ SARMIS-V2 ដល់មន្ទីរព័ត៌មានខេត្តទាំង១៣ ដែលមិនទាន់ទទួលបានការបណ្ដុះបណ្ដាលកាលពីពេលកន្លងមក។ នេះគឺស្របពេលជាមួយនឹងការធ្វើបរិវត្តកម្មឌីជីថលថ្មីៗ ដោយប្រែក្លាយនីតិវិធីអនុវត្តការងារនានាតាមបែបឌីជីថល លុបបំបាត់ការងារដោយដៃលើឯកសារជាក្រដាស មកជាការធ្វើការងារតាមប្រព័ន្ធឌីជីថលទាំងស្រុង។
លោកជំទាវបានបន្ថែមថា ប្រព័ន្ធ SARMIS ជំនាន់ថ្មីនេះ តម្រូវឱ្យក្រសួង និងមន្ទីរដែលជាអាជ្ញាធរកាន់កាប់ទ្រព្យសម្បត្តិរដ្ឋ រៀបចំបញ្ជីសារពើភណ្ឌក្នុងដែនសមត្ថកិច្ចរបស់ខ្លួន តាមទម្រង់ដែលក្រសួងសេដ្ឋកិច្ច និងហិរញ្ញវត្ថុ ជាអាជ្ញាធរគ្រប់គ្រងទ្រព្យសម្បត្តិរដ្ឋផ្ដល់ជូន ប្រកបដោយតម្លាភាព គណនេយ្យភាព និងទំនួលខុសត្រូវខ្ពស់។
លោកជំទាវ សង្ឃឹមថា តាមរយៈសិក្ខាសាលានេះ នឹងក្លាយជាចលករជួយពង្រឹងសមត្ថភាពបន្ថែមដល់អ្នកពាក់ព័ន្ធ យល់ដឹងកាន់តែច្បាស់លើការគ្រប់គ្រង ការប្រើប្រាស់ និងចាត់ចែងលើទ្រព្យសម្បត្តិ។ ទន្ទឹមនឹងនេះ ភាគីពាក់ព័ន្ធត្រូវត្រៀមលក្ខណៈឱ្យបានរួចរាល់ក្នុងការរៀនសូត្របន្ថែម និងចាប់យកការផ្លាស់ប្ដូររបៀបធ្វើការងារថ្មី ឱ្យទាន់សម័យកាល និងកាលៈទេសៈនៃការវិវឌ្ឍន៍សង្គម និងសេដ្ឋកិច្ចឌីជីថល៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
