នៅថ្ងៃទី៣ ខែតុលា ឆ្នាំ២០២៥ ក្រុមការងាររាជរដ្ឋាភិបាលចុះជួយមូលដ្ឋានឃុំត្រពាំងធំ ស្រុកប្រាសាទបាគង ខេត្តសៀមរាប បានរៀបចំកិច្ចប្រជុំបូកសរុបរបាយការណ៍លទ្ធផលការងារ ប្រចាំត្រីមាសទី១ ឆ្នាំ២០២៥ របស់ខ្លួន ដើម្បីធ្វើការពិនិត្យលទ្ធផលការងារអនុវត្តបានកន្លងមក និងដោះស្រាយបញ្ហាដែលនៅសេសសល់ ដឹកនាំកិច្ចប្រជុំដោយ ឯកឧត្តម អ៊ុំ សុជាតិ អនុប្រធានក្រុមការងាររាជរដ្ឋាភិបាលចុះជួយមូលដ្ឋានឃុំត្រពាំងធំ។
លោក ឈឿង ជូ អនុប្រធានអចិន្ត្រៃយ៍ក្រុមការងាររាជរដ្ឋាភិបាលចុះមូលដ្ឋានឃុំ បានឱ្យដឹងថា សម្រាប់ត្រីមាសទី១ ឆ្នាំ២០២៥នេះ ក្រុមការងារសម្រេចបាននូវសមិទ្ធផលមួយចំនួនដូចជា ចូលរួមកសាងសមិទ្ធផលសង្គមនៅក្នុងមូលដ្ឋាន រួមមាន៖ សាងសង់ស្ពានបេតុង នៅភូមិស្វាយជ័យ ដែលចំណាយថវិកាអស់ ៥០ ០០០ ០០០រៀល, សាងសង់ផ្លូវបេតុងអាមេ ២ខ្សែ ប្រវែង៧៤៧ម៉ែត្រ ក្នុងភូមិរកាកំបុត និងភូមិអន្លង់២ ដែលជាគម្រោងមូលនិធិឃុំ ចំណាយថវិកា ៤៣២ ៩០០ ០០០រៀល។
លោកបន្ដថា ជាមួយនឹងលទ្ធផលនេះ ក្រុមការងារក៏បានខិតខំប្រឹងប្រែងយកចិត្ដទុកដាក់ ក្នុងការជំរុញលើកកម្ពស់ការអនុវត្តការងារកំណែទម្រង់ តាមរយៈការធ្វើប្រតិភូកម្មផ្សេងៗ ការជំរុញក្នុងការផ្ដល់សេវាជូនប្រជាពលរដ្ឋ ធ្វើឱ្យលឿន ធ្វើឱ្យបាន ធ្វើឱ្យមានតម្លាភាព។ ជាមួយគ្នានេះ សម្រាប់បញ្ហាប្រឈម និងសំណូមរបស់បងប្អូនប្រជាពលរដ្ឋត្រូវបានឆ្លើយតប និងដោះស្រាយបានទាន់ពេលវេលា។
ថ្លែងក្នុងឱកាសនោះ ឯកឧត្តម អ៊ុំ សុជាតិ អនុប្រធានក្រុមការងារ បានជំរុញ និងណែនាំដល់សមាជិកសមាជិកានៃក្រុមការងារទាំងអស់ រួមគ្នាបន្ដអនុវត្តផែនការសកម្មភាពការងារឱ្យបានកាន់តែប្រសើរឡើងបន្ថែមទៀត ក្នុងន័យអភិវឌ្ឍមូលដ្ឋានរបស់ខ្លួនឲ្យបានឆាប់រហ័ស និងទាន់ពេលវេលា។ ទន្ទឹមនឹងការសម្រេចបាននូវសមិទ្ធផលទាំងអស់នេះ យើងក៏ជួបប្រទះនឹងបញ្ហាប្រឈមមួយចំនួនដូចជា ការផ្ដល់សេវាសាធារណៈជូនប្រជាពលរដ្ឋនៅពុំទាន់មានលក្ខណៈល្អប្រសើរនៅឡើយ ដោយសេវាមួយចំនួននៅមានលក្ខណៈសាំញ៉ាំ មិនទាន់ច្បាស់លាស់, បញ្ហារណ្ដៅចាក់សំរាមមិនទាន់ត្រឹមត្រូវតាមស្ដង់ដា។ បញ្ហាប្រឈមនេះ ក្រុមការងារក៏នឹងកំពុងបន្ដកិច្ចខិតខំប្រឹងប្រែង ព្យាយាមដោះស្រាយជូនប្រជាពលរដ្ឋនៅក្នុងមូលដ្ឋានផងដែរ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
