មន្ត្រីជំនាញក្នុងខេត្តសៀមរាប បានបង្ហាញថា ការដំណើរការកម្មវិធីទូរសព្ទដៃ “មតិយើង” គឺដើម្បីឱ្យប្រជាពលរដ្ឋងាយស្រួលក្នុងការផ្ដល់ព័ត៌មានត្រឡប់ ដាក់ពាក្យបណ្ដឹង និងវាយតម្លៃសេវាសាធារណៈនៅតាមមូលដ្ឋានរបស់ខ្លួនដោយសម្ងាត់ និងមានគោលដៅចូលរួមចំណែកធ្វើឱ្យសេវាសាធារណៈនៅកម្ពុជា កាន់តែមានតម្លាភាព បរិយាប័ន្ន និងគណនេយ្យភាព។
ក្នុងវគ្គផ្សព្វផ្សាយ ស្ដីពីតួនាទី ភារកិច្ច និងសមត្ថកិច្ចរបស់ការិយាល័យប្រជាពលរដ្ឋរាជធានី-ខេត្ត ព្រមទាំងរបៀបប្រើប្រាស់កម្មវិធីទូរស័ព្ទដៃ “មតិយើង” ដល់មន្ត្រីរាជការ និងប្រជាពលរដ្ឋនៅក្នុងស្រុកវ៉ារិន នាថ្ងៃទី៦ ខែតុលា ឆ្នាំ២០២៥ លោក នេត ផល្គុណ ប្រធានការិយាល័យប្រជាពលរដ្ឋខេត្ត បានបញ្ជាក់ថា ការិយាល័យប្រជាពលរដ្ឋជាយន្តការអព្យាក្រឹតដែលបង្កើតឡើងនៅរដ្ឋបាលខេត្ត សម្រាប់ទទួល និងដោះស្រាយបណ្ដឹងក្រៅប្រព័ន្ធតុលាការ។
លោកបញ្ជាក់ថា គោលបំណងសំខាន់នៃការផ្សព្វផ្សាយនេះ គឺការលើកកម្ពស់អភិបាលកិច្ចក្នុងការផ្ដល់សេវា និងការអភិវឌ្ឍសេដ្ឋកិច្ចនៅរដ្ឋបាលថ្នាក់ក្រោមជាតិ តាមរយៈការពង្រឹងតួនាទីក្នុងការទទួល និងសម្រុះសម្រួលដោះស្រាយបណ្ដឹងក្រៅប្រព័ន្ធតុលាការ ដែលពាក់ព័ន្ធនឹងការផ្ដល់សេវាសាធារណៈ និងការគ្រប់គ្រងរដ្ឋបាលនៅថ្នាក់ក្រោមជាតិ។
លោកបានបន្តថា តួនាទី និងភារកិច្ច របស់ការិយាល័យ គឺទទួល និងប្រមូលពាក្យបណ្ដឹងនានាក្នុងដែនសមត្ថកិច្ចរបស់ខ្លួន, ធ្វើសម្រាំង វាយតម្លៃ និងបញ្ជូនពាក្យបណ្ដឹងទៅស្ថាប័នមានសមត្ថកិច្ច, តាមដានការដោះស្រាយ និងជូនព័ត៌មានត្រឡប់ទៅម្ចាស់បណ្ដឹង, ស៊ើបអង្កេតបណ្ដឹង លើកអនុសាសន៍ និងតាមដានការអនុវត្តវិធានការដោះស្រាយបណ្ដឹង៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
