អាជ្ញាធរខេត្តសៀមរាប ដោយមានការសហការជាមួយមន្ទីរអង្គភាពជុំវិញខេត្ត គ្រោងរៀបចំរៀបចំទិវាទេសចរណ៍ពិភពលោក ឆ្នាំ២០២៥ នារសៀលថ្ងៃទី១០ ខែតុលា ចុងសប្ដាហ៍នេះ ក្រោមប្រធានបទ “ទេសចរណ៍ និងបរិវត្តកម្មប្រកបដោយចីរភាព” នៅសាលាខេត្តសៀមរាប។
ក្នុងឱកាសដឹកនាំកិច្ចប្រជុំត្រៀមរៀបចំទិវានេះ នៅថ្ងៃទី៧ ខែតុលា ឆ្នាំ២០២៥ លោក ង៉ូវ សេងកាក់ អភិបាលរងខេត្ត បានបង្ហាញថា ទិវាទេសចរណ៍ពិភពលោក ឆ្នាំ២០២៥ រៀបចំឡើងក្នុងគោលបំណងផ្សព្វផ្សាយនូវវិស័យទេសចរណ៍នៅក្នុងខេត្តសៀមរាប ទៅកាន់ពិភពលោក ភ្ញៀវទេសចរជាតិ និងអន្ដរជាតិ និងវិស័យឯកជនផ្សេងៗទៀត តាមរយៈការធ្វើបទបង្ហាញខ្លី ពីវិស័យទេសចរណ៍ក្នុងខេត្ត និងមានចងបដាពាក្យស្លោកពាក់ព័ន្ធនឹងវិស័យទេសចរណ៍នៅតាមផ្លូវសំខាន់ៗមួយចំនួនក្នុងក្រុងសៀមរាប។
លោកអភិបាលរងខេត្ត បញ្ជាក់ថា សម្រាប់ប្រធានបទនៅឆ្នាំនេះ ពិតជាមានសារៈសំខាន់ និងឆ្លើយតបទៅនឹងនិន្នាការស្ថានការណ៍ទេសចរណ៍សាកលលោក តំបន់ និងកម្ពុជា ដែលរដ្ឋាភិបាលបន្តលើកកម្ពស់វិស័យទេសចរណ៍ ជាពិសេសបន្តការជំរុញអភិវឌ្ឍវិស័យទេសចរណ៍វប្បធម៌ និងធម្មជាតិ ដោយបានបន្ថែមនូវទេសចរណ៍បៃតង ស្អាត និងវៃឆ្លាត៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
