ថ្លែងបើកវគ្គបណ្ដុះបណ្ដាល ស្ដីពីការថែទាំដោយយល់ដឹងពីការប៉ះទង្គិចផ្លូវចិត្ត (Trauma-Informed Care)» ជូនអ្នកពាក់ព័ន្ធក្នុងខេត្តសៀមរាប នាថ្ងៃទី១០ ខែតុលានេះ លោកស្រី ម៉មនី រង្សី អភិបាលរងខេត្ត បានបង្ហាញថា បច្ចុប្បន្នអំពើហិង្សាផ្លូវចិត្ត កំពុងមានការកើនឡើងគួរឱ្យកត់សម្គាល់នៅក្នុងសង្គម ទោះបីជាអំពើហិង្សាផ្លូវកាយមិនមានភាគរយខ្ពស់ដូចមុនក៏ដោយ ដែលបញ្ហាទាំងនេះភាគច្រើនត្រូវបានប្រជាពលរដ្ឋមួយចំនួនមើលរំលង ដែលបញ្ហានេះវានឹងអាចជះឥទ្ធិពលអវិជ្ជមានទៅដល់កូនចៅជំនាន់ក្រោយ។
លោកស្រី ម៉ននី រង្សី មានប្រសាសន៍ថា វគ្គបណ្ដុះបណ្ដាលពិតជាមានសារៈសំខាន់ណាស់ ក្នុងការបង្រៀនមន្ត្រីឱ្យយល់ពីសញ្ញានៃការប៉ះទង្គិចផ្លូវចិត្តតាមរយៈរូបភាពផ្សេងៗគ្នា។ គោលដៅចម្បងនៃវគ្គនេះដែរ គឺបណ្ដុះបណ្ដាលមន្ត្រីទាំងអស់ ក្លាយជាអ្នកដែលអាចគ្រប់គ្រងវិបត្តិផ្លូវចិត្តផ្ទាល់ខ្លួន និងចេះប្រើប្រាស់វិធីសាស្ត្រណែនាំជនរងគ្រោះទៅរកការពិគ្រោះយោបល់ជំនាញ ដែលសមស្របទៅតាមបញ្ហារបស់ពួកគាត់ម្នាក់ៗ។
លោកស្រីអភិបាលរងខេត្ត រំពឹងថា តាមរយៈវគ្គបណ្ដុះបណ្ដាលនេះដែរ នឹងអាចពង្រឹងសមត្ថភាពដល់មន្ត្រីគ្រប់លំដាប់ថ្នាក់ ក្នុងការយល់ដឹងស៊ីជម្រៅអំពីរបួសផ្លូវចិត្តរបស់ជនរងគ្រោះ និងផ្ដល់នូវឧបករណ៍ចាំបាច់នានា សម្រាប់ការគ្រប់គ្រងខ្លួនឯងឱ្យមានប្រសិទ្ធភាពខ្ពស់ ដើម្បីធានាថា មន្ត្រីទាំងអស់អាចបន្តផ្ដល់សេវាប្រកបដោយនិរន្តរភាព គុណភាព និងភាពអាណិតអាសូរ ដោយមិនបាត់បង់សុខភាពផ្លូវចិត្តផ្ទាល់ខ្លួនឡើយ។
លោកស្រីបន្តថា ការផ្ដោតជាសំខាន់លើសុខុមាលភាពផ្ទៃក្នុងនេះ គឺជាគន្លឹះដើម្បីលើកកម្ពស់លទ្ធផលការងារក្នុងការប្រយុទ្ធប្រឆាំងអំពើជួញដូរមនុស្ស និងកិច្ចការពារជនរងគ្រោះនៅក្នុងខេត្តសៀមរាបនាពេលអនាគត៕
អត្ថបទ និងរូបភាព៖ ឡេង ពិសិដ្ឋ
កែសម្រួល៖ លោក អ៊ុន ណារាជ្យ
