ខេត្តសៀមរាប ដែលជាប៉ូលទេសចរណ៍ដ៏សំខាន់របស់កម្ពុជា នឹងត្រូវប្រែក្លាយទៅជាមជ្ឈមណ្ឌលឧត្តមភាពសម្រាប់វិស័យទេសចរណ៍បន្ថែមទៀត ដោយសារតែខេត្តនេះមានសាលាបណ្តុះបណ្តាលវិជ្ជាជីវៈជំនាញទេសចរណ៍ជាច្រើន និងត្រូវបានទទួលស្គាល់ថា មានស្ដង់ដារស្របតាមគោលការណ៍អាស៊ាន។
ក្នុងសិក្ខាសាលាផ្សព្វផ្សាយយន្ដការវាយតម្លៃពីមុនលើសេវាកម្មសណ្ឋាគារ ស្របតាមស្មារតីនៃកិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន (MRA) ដែលធ្វើឡើងនៅខេត្ដសៀមរាប នាថ្ងៃទី៧ ខែតុលានេះ លោកជំទាវ វណ្ណ សេរីរ័ត្ន អនុរដ្ឋលេខាធិការក្រសួងទេសចរណ៍ បានគូសបញ្ជាក់អំពីការគាំទ្រពីប្រទេសសមាជិកអាស៊ាន និងលេខាធិការដ្ឋានអាស៊ាន ចំពោះវឌ្ឍនភាពនៃការអនុវត្តយន្តការ MRA នៅកម្ពុជា។
លោកជំទាវបានមានប្រសាសន៍ថា ដោយមើលឃើញពីវឌ្ឍនភាពនេះ អាស៊ានបានគាំទ្រឱ្យកម្ពុជាធ្វើជាម្ចាស់ផ្ទះរៀបចំសិក្ខាសាលាថ្នាក់តំបន់ស្តីពី “ការកសាងសមត្ថភាពរបស់អ្នកវាយតម្លៃបង្គោលអាស៊ាន លើគោលការណ៍ណែនាំស្តីពីការវាយតម្លៃការសិក្សាពីមុន លើអ្នកជំនាញទេសចរណ៍អាស៊ាន” កាលពីថ្ងៃទី១៥ ដល់១៧ ខែកក្កដា ឆ្នាំ២០២៥ កន្លងទៅ។ តាមរយៈសិក្ខាសាលាថ្នាក់តំបន់នេះ នឹងជួយតម្រង់ទិសបន្ថែម ជំរុញដល់ការទទួលស្គាល់សមត្ថភាពអ្នកជំនាញទេសចរណ៍ ស្របតាមគោលការណ៍ណែនាំស្តីពីការវាយតម្លៃការសិក្សាពីមុន។
លោកជំទាវ បានបញ្ជាក់ថា ខេត្តសៀមរាប មានសាលាបណ្ដុះបណ្ដាលវិស័យទេសចរណ៍ជាច្រើន ដែលត្រូវបានទទួលស្គាល់ថាមានជំនាញវិជ្ជាជីវៈស្របតាមស្តង់ដារសមត្ថភាពអាស៊ាន ហើយនេះជាមូលដ្ឋានដែលខេត្តនេះនឹងក្លាយជា មជ្ឈមណ្ឌលឧត្តមភាព។ លោកជំទាវ បានទទួលស្គាល់ពីការចូលរួមយ៉ាងសកម្មរបស់សាលា និងមជ្ឈមណ្ឌលបណ្តុះបណ្តាលបច្ចេកទេស និងវិជ្ជាជីវៈ ដែលបានបណ្តុះបណ្តាលទាំងអ្នកជំនាញថ្មី និងពង្រឹងសមត្ថភាពអ្នកកំពុងបម្រើការងារ។ តាមយន្តការអាស៊ាន ក្រសួងទេសចរណ៍បានបណ្តុះបណ្តាល និងវាយតម្លៃទទួលស្គាល់គុណវុឌ្ឍិអ្នកជំនាញទេសចរណ៍កម្ពុជាក្នុងសេវាកម្មសណ្ឋាគារចំនួនប្រមាណ ២ ២០០ រូបរួចមកហើយ។
លោកជំទាវ បញ្ជាក់ទៀតថា យន្តការវាយតម្លៃលើការសិក្សាពីមុននេះ នឹងក្លាយជាកាលានុវត្តភាពថ្មី សម្រាប់អ្នកជំនាញកម្ពុជាដែលមានសមត្ថភាព និងបទពិសោធន៍ ប៉ុន្តែពុំទាន់មានការទទួលស្គាល់គុណវុឌ្ឍិច្បាស់លាស់ ឱ្យមានឱកាសទទួលស្គាល់សមត្ថភាព និងគុណវុឌ្ឍិ ស្របតាមស្ដង់ដារសមត្ថភាព និងការទទួលស្គាល់កម្រិតអាស៊ាន ដែលអាចជួយអភិវឌ្ឍវិថីអាជីពការងាររបស់ពួកគេកាន់តែល្អប្រសើរទៅអនាគត។
លោក ឌី រ៉ាដូ អភិបាលរងខេត្តសៀមរាប បានលើកឡើងថា ខេត្តទេសចរណ៍មួយនេះ កំពុងពង្រឹង និងពង្រីកវិសាលភាពនៃការបម្រើសេវាកម្មទេសចរណ៍ របស់ខ្លួនតាមរយៈការកសាងហេដ្ឋារចនាសម្ព័ន្ធរួមមាន ផ្លូវថ្នល់ ស្ពាន ការផ្គត់ផ្គង់អគ្គិសនី ប្រព័ន្ធទឹកស្អាត ភ្លើងបំភ្លឺសាធារណៈ និងការកែលម្អសោភ័ណភាពក្នុងក្រុង ដូចជា ផ្លូវថ្នល់ រុក្ខវិថី និងដងស្ទឹងសៀមរាប។
លោកបន្តថា កិច្ចការទាំងនេះធ្វើឡើងក្នុងគោលបំណងឱ្យសៀមរាបសក្តិសមជា “ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ” ពិសេសការការពារសន្តិសុខ សណ្តាប់ធ្នាប់ សុវត្ថិភាព ជូនភ្ញៀវទេសចរជាតិ-អន្តរជាតិ និងការអភិវឌ្ឍទេសចរណ៍ប្រកបដោយនិរន្តរភាពលើកិច្ចថែរក្សាការពារ និងអភិរក្សធនធានធម្មជាតិ និងសម្បត្តិវប្បធម៌ដ៏សម្បូរបែប ដែលជំរុញឱ្យខេត្តសៀមរាប ក្លាយជាទីផ្សារទេសចរណ៍ដ៏សំខាន់សម្រាប់តំបន់ និងពិភពលោក៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
