កាលពីថ្ងៃទី៧ ខែតុលា ឆ្នាំ២០២៥នេះ រដ្ឋបាលខេត្តសៀមរាប បានរៀបចំកិច្ចប្រជុំសាមញ្ញលើកទី១៧ របស់ក្រុមប្រឹក្សាខេត្ត អាណត្តិទី៤ ដោយបានលើកយកបញ្ហាសំខាន់ៗចំនួន ៣ មកពិភាក្សា រួមមាន បញ្ហាទឹកភ្លៀងលិចផ្លូវ បញ្ហាសណ្ដាប់ធ្នាប់សាធារណៈ និងស្ថានភាពនៃការគ្រប់គ្រងជនភៀសសឹក ដែលបានផ្លាស់ទីលំនៅពីខេត្តឧត្តរមានជ័យ និងព្រះវិហារ។
លោក លី សារី អភិបាលរងខេត្ត បានបញ្ជាក់ថា ចំពោះករណីទឹកជំនន់ដោយសារទឹកភ្លៀង គឺពិតជាកត្តាធម្មជាតិ ដែលបណ្ដាលមកពីការធ្លាក់ភ្លៀងខ្លាំងគ្រប់ទិសទី ធ្វើឱ្យស្រុកមួយចំនួនរងការជន់លិច។ មូលហេតុចម្បង គឺដោយសារទឹកហូរមិនទាន់ និងការរំលោភបំពានដោយប្រជាពលរដ្ឋមួយចំនួនចាក់ដី ឬដាក់លូមិនត្រូវតាមស្តង់ដារបច្ចេកទេស។
លោកអភិបាលរងខេត្ត បានបន្ថែមថា ទន្ទឹមនឹងបញ្ហានេះ រដ្ឋបាលខេត្ត មន្ទីរជំនាញពាក់ព័ន្ធ និងអាជ្ញាធរក្រុង/ស្រុក បាន ចុះពិនិត្យស្ថានភាពមុខទឹក និងធ្វើការកាយរំដោះទឹកជាបន្ទាន់ ដើម្បីឱ្យទឹកស្រកទាន់ពេលវេលា ហើយគណៈកម្មាធិការគ្រប់គ្រងគ្រោះមហន្តរាយ ក៏បានត្រៀមលក្ខណៈបម្រុងសម្រាប់ ការស្ដារឡើងវិញនូវផលប៉ះពាល់ លើដំណាំស្រូវ ហេដ្ឋារចនាសម្ព័ន្ធ សាលារៀន និងវត្តអារាមនានាផងដែរ។ ដោយឡែក ចំពោះការងារសន្តិសុខ និងសណ្ដាប់ធ្នាប់វិញ អាជ្ញាធរក្រុង/ស្រុក បានចុះអប់រំណែនាំជាបន្តបន្ទាប់ រហូតដល់ឈានទៅដល់ការ ដកហូតសម្ភារ យកទៅរក្សាទុកផងដែរ។
ក្នុងឱកាសនោះ លោកក៏បានជម្រាបជូនអង្គប្រជុំអំពីស្ថានភាពនៃការគ្រប់គ្រងជនភៀសសឹក គិតមកដល់បច្ចុប្បន្ន មានបងប្អូនប្រជាពលរដ្ឋសរុប ៨៧២គ្រួសារ ស្មើនឹង ២ ៧០៤នាក់ បានជម្លៀសចេញពីតំបន់សមរភូមិក្នុងខេត្តឧត្តរមានជ័យ និងខេត្តព្រះវិហារ មកកាន់ទីតាំងសុវត្ថិភាព និងលំនៅឋានបណ្ដោះអាសន្ន តាមបណ្ដាក្រុង/ស្រុកទាំង១៣ ក្នុងខេត្តសៀមរាប ដែលបានរៀបចំទីតាំងសុវត្ថិភាពសរុបចំនួន ១៤១ កន្លែង។ ជាមួយគ្នានោះ រដ្ឋបាលខេត្ត ជាមួយនឹងសប្បុរសជន ក៏បាននាំយកគ្រឿងឧបភោគបរិភោគ និងសម្ភារប្រើប្រាស់ ចែកជូនដល់ពួកគាត់ដោយមិនឱ្យមានការខ្វះខាតឡើយ។
ថ្លែងបិទកិច្ចប្រជុំ ឯកឧត្តម តោ គឹមស៊ាន សមាជិកក្រុមប្រឹក្សាខេត្ត បានថ្លែងអំណរគុណយ៉ាងជ្រាលជ្រៅចំពោះគណៈអភិបាលខេត្ត ដែលបានយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋភៀសសឹក តាំងពីដំបូងរហូតមកដល់បច្ចុប្បន្ន និងបានកោតសរសើរចំពោះកិច្ចខិតខំដោះស្រាយបញ្ហាទឹកភ្លៀងជន់លិចបានទាន់ពេលវេលា៕
អត្ថបទ និងរូបភាព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
