នៅរាត្រីថ្ងៃទី៨ ខែតុលា ឆ្នាំ២០២៥ ព្រះសង្ឃ គណៈកម្មការ អាចារ្យវត្ត និងប្រជាពលរដ្ឋចំណុះជើងវត្តអារញ្ញសាគរ ក្នុងក្រុងសៀមរាប បានរួមគ្នាប្រារព្ធពិធីដង្ហែសង្ឃឹកប្រទីបជ្វាលា តាមបណ្ដោយដងស្ទឹងសៀមរាប ដោយមានអ្នកចូលរួមយ៉ាងច្រើនកុះករ ដើម្បីសុំខមាទោសដល់ម្ចាស់ទឹកម្ចាស់ដី ដែលបានអនុញ្ញាតឱ្យប្រើប្រាស់ទឹកដីអស់រយៈពេលមួយឆ្នាំកន្លងមក។
ព្រះវិភត្តិមុនីញាណ ហ៊ាក់ គឹមហ៊ត់ វិសារទោ ព្រះគ្រូចៅអធិការវត្តអារញ្ញសាគរ មានថេរដីកាឱ្យដឹងថា ពិធីដង្ហែសង្ឃឹក និងបណ្ដែតកន្ទោងនេះ គឺជាទំនៀមទម្លាប់របស់អ្នកនៅតំបន់ប៉ែកខាងត្បូងក្រុងសៀមរាប ដែលនិយមធ្វើឱបស្ទបជាមួយនឹងថ្ងៃចេញព្រះវស្សា។ សម្រាប់ឆ្នាំនេះ ការដង្ហែសង្ឃឹកចាប់ផ្ដើមពីវត្តពោធិបន្ទាយជ័យ រហូតទៅដល់ចុងទឹកសាលាឆទានយាយអេង ក្បែរភូមិសាស្ត្រភ្នំក្រោមបឹងទន្លេសាប។
ព្រះតេជគុណ មានថេរដីកាទៀតថា ទំនៀមនេះត្រូវបានរក្សាយ៉ាងខ្ជាប់ខ្ជួនក្នុងគោលបំណងដឹងគុណ ដល់ម្ចាស់ទឹកម្ចាស់ដីចំពោះការប្រើប្រាស់ធនធានអស់រយៈពេលមួយឆ្នាំ ជាសញ្ញាថារដូវភ្លៀងឆ្នាំនេះបានឆ្លងផុតហើយ។ ពិធីនេះក៏ដើម្បីអប់រំក្មេងៗជំនាន់ក្រោយឱ្យបានដឹង និងយល់អំពីវប្បធម៌ប្រពៃណីរបស់ដូនតាខ្មែរ ហើយនាំគ្នាគោរពថែរក្សាកុំឱ្យសាបរលាបបាត់បង់។
គួរឱ្យដឹងថា “សង្ឃឹក” គឺជាឈ្មោះប្រដាប់មួយប្រភេទមានជើង៤ មានដងស្នែង២ សម្រាប់ដាក់គ្រឿងបរិក្ខារ រណ្តាប់ដង្វាយ ឬសំណែនជាច្រើនមុខ ហើយត្រូវបណ្ដែតតាមខ្សែទឹក ឬសែងទៅដាក់លើគោក ដើម្បីឧទ្ទិសដល់ព្រះគង្គា ព្រះធរណី ទេវតា អារុក្ខអារក្ស អ្នកតា ម្ចាស់ទឹកម្ចាស់ដី ដែលថែរក្សាទីស្ថាននានា។
សូមជម្រាបថា ក្នុងពិធីនេះដែរ ព្រះសង្ឃបានប្រារព្ធពិធីសូត្រជ័យន្តោ ចម្រើនព្រះបរិត្ត ដើម្បីផ្សាយកុសល និងសុំពរជ័យពីម្ចាស់ទឹកម្ចាស់ដី ព្រៃព្រឹក្សាផងទាំងឡាយ ឱ្យប្រជាពលរដ្ឋគ្រប់មជ្ឈដ្ឋានជួបតែសេចក្ដីសុខចម្រើន ភាពសុខក្សេមក្សាន្ត ចៀសវាងឧបទ្រុឌចង្រៃ និងទទួលបានផលចំណេញក្នុងការប្រកបរបររកស៊ីគ្រប់ប្រភេទ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
