នៅរសៀលថ្ងៃទី១២ ខែតុលា ឆ្នាំ២០២៥ អង្គកឋិនទានសាមគ្គីមួយ ដែលផ្ដួចផ្ដើមដោយគណៈកម្មការ អាចារ្យ និងប្រជាពុទ្ធបរិស័ទ ដង្ហែទៅប្រគេនព្រះសង្ឃគង់ចាំព្រះវស្សាក្នុងវត្តដំណាក់ ក្រុងសៀមរាប បានទទួលបច្ច័យជាង ៨០ លានរៀល សម្រាប់ប្រើប្រាស់ដើម្បីទ្រទ្រង់ការចំណាយប្រចាំថ្ងៃ ផ្គត់ផ្គង់សម្ភារសិក្សាសម្រាប់ព្រះសង្ឃ និងសាមណេរទាំង ១០៧ អង្គ ដែលកំពុងសិក្សាផ្នែកពុទ្ធិកៈបឋមសិក្សា និងពុទ្ធិកៈវិទ្យាល័យ ព្រមទាំងបន្កសាងសង់ព្រះពុទ្ធរូបអំពីស្ពាន់កម្ពស់ ៩ ម៉ែត្រ ដែលត្រូវបានសម្រេចការសាងសង់បានជាង ៨០ភាគរយហើយ។
ព្រះគ្រូ ឡាច ចន្ថា ព្រះចៅអធិការវត្ត បានសម្ដែងនូវព្រះទ័យសោមនស្សរីករាយ និងសាទរចំពោះសទ្ធាជ្រះថ្លារបស់ប្រជាពុទ្ធបរិស័ទជិតឆ្ងាយ ដែលបានមូលមតិគ្នារៀបចំ និងដង្ហែអង្គកឋិនទាននេះឡើង។ ព្រះអង្គបានបញ្ជាក់ថា នេះគឺជាសទ្ធាដែលបង្ហាញពីការជឿគោរពព្រះពុទ្ធសាសនា និងស្មារតីសាមគ្គីជួយគ្នា ដើម្បីទ្រទ្រង់ព្រះពុទ្ធសាសនាឱ្យបានចម្រើនរុងរឿងនៅយូរអង្វែង ព្រមទាំងជាការជួយទំនុកបម្រុងដល់ព្រះភិក្ខុសង្ឃ ក្រោយពីគង់ចាំព្រះវស្សាអស់កាលត្រីមាសកន្លងមក។
មហាឧបាសិកា ង៉ែត វណ្ណដារ៉ា ពុទ្ធសាសនូបត្ថម្ភក៍វត្តដំណាក់ មានប្រសាសន៍ថា បុណ្យកឋិនទានជាពិធីបុណ្យដ៏សំខាន់តាមពុទ្ធានុញ្ញាត ដែលពុទ្ធបរិស័ទតែងប្រារព្ធជារៀងរាល់ឆ្នាំ ក្នុងគោលបំណងបង្កើនសាមគ្គីភាព និងជួយទំនុកបម្រុងទ្រទ្រង់ព្រះពុទ្ធសាសនា។ លោកស្រីបានគូសបញ្ជាក់ថា កឋិនចីវរ គឺជាចីវរទានពិសេសជាងទានដទៃៗទៀត ដែលជាទាននាំឱ្យភិក្ខុសង្ឃជាអ្នកទទួល និងទាយកទាយិកាអ្នកធ្វើកឋិន ទទួលបានអានិសង្សច្រើនជាអនេក។ លោកស្រីក៏បានបន្ថែមថា ការធ្វើកឋិនទានក៏ជាការញ៉ាំងសទ្ធាដោយលះបង់នូវអំពើអាក្រក់ និងសេចក្ដីកំណាញ់ទាំងឡាយផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
