កាលពីរសៀលថ្ងៃទី១២ ខែតុលា ឆ្នាំ២០២៥ វត្តបុព្វទិសារាម (ហៅវត្តកំពង់ក្ដី) ស្រុកជីក្រែង ខេត្តសៀមរាប បានទទួលអង្គកឋិនទានមហាសាមគ្គី ដើម្បីប្រមូលបច្ច័យទុកផ្គត់ផ្គង់ចង្ហាន់ព្រះសង្ឃ និងមួយចំនួនយកទៅជួសជុលឈាបនដ្ឋានដែលចាស់ទ្រុឌទ្រោម និងបន្តដំណើរការសាងសង់អគារមហាកុដិមួយខ្នង ដែលបានចាប់កសាងតាំងពីឆ្នាំ២០១៩ មានបណ្ដោយ៣៤ម៉ែត្រ ទទឹង១៦ម៉ែត្រ និងកម្ពស់២ជាន់។
ព្រះបវរវិជ្ជា ទេព ភឿន ព្រះគ្រូចៅអធិការវត្ត បានសម្ដែងនូវព្រះទ័យសោមនស្សសាទរ ចំពោះសទ្ធាជ្រះថ្លារបស់ប្រជាពុទ្ធបរិស័ទជិតឆ្ងាយ ដែលបានស្រុះស្រួលគ្នាដង្ហែអង្គកឋិននេះឡើង ដែលជាចលនាសកម្មភាពជួយសង្គម ឈរលើស្មារតីសាមគ្គីជួយគ្នា ដើម្បីទ្រទ្រង់ព្រះពុទ្ធសាសនាឱ្យបានចម្រើនរុងរឿង គង់វង្សនៅយូរអង្វែង និងជារង្វាន់ផ្ដល់កម្លាំងកាយ ចិត្តដល់ព្រះសង្ឃ ជាសាសនទាយាទបន្តអាយុព្រះពុទ្ធសាសនាតទៅ។
ព្រះគ្រូចៅអធិការ មានសង្ឃដីកាថា ពុទ្ធបរិស័ទ ឬទាយកទាយិកាដែលជាអ្នកធ្វើបុណ្យកឋិនទានដោយមានចិត្តសទ្ធាជ្រះថ្លាមានចេតនាបរិសុទ្ធ និងប្រគេនចំពោះសង្ឃរួចហើយ រមែងទទួលបានផលានិសង្សច្រើន ទាំងក្នុងបច្ចុប្បន្នជាតិ និងអនាគតជាតិ មានការទទួលនូវសម្បត្តិក្នុងឋានសួគ៌ទេវលោកជាដើម។ ចំណែកបដិគ្គាហកៈភិក្ខុជាអ្នកទទួលក្រាលគ្រង និង អនុមោទនាកឋិនបានត្រឹមត្រូវតាមព្រះវិន័យដែលព្រះពុទ្ធបានបញ្ញត្តិទុកមក។
ព្រះគ្រូបន្តថា បុណ្យកឋិនទាន ជាទានមួយដែលប្លែកពីទានដទៃៗឯទៀត ប្លែកដោយកាលមានត្រឹមតែ២៩ថ្ងៃ ប្លែកដោយអានិសង្ស អ្នកប្រគេនក៏បានអានិសង្ស និងអ្នកទទួលក្រាលគ្រងអនុមោទនាក៏បានអានិសង្ស។ ប្លែកដោយវត្ថុ គឺវត្ថុសម្រាប់កឋិនមាន៣ សង្ឃាដី ចីវរ ស្បង់ តែប៉ុណ្ណោះ ចំណែកបច្ច័យ និងសម្ភារផ្សេងៗជាបរិវាររបស់កឋិន។ ប្លែកដោយអំពើគឺកឋិនអនុលោមទៅតាមព្រះវិន័យ នៅពេលដែលញាតិញោមដង្ហែអង្គកឋិនមកដល់វត្តហើយ គ្រាន់តែវេរប្រគេនព្រះសង្ឃហើយជាការស្រេច បន្ទាប់មកជាកិច្ចរបស់ព្រះសង្ឃប្រតិបត្តិទៅតាមព្រះវិន័យ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
