ឯកឧត្ដម សេង ថានី អនុរដ្ឋលេខាធិការនៃក្រសួងរៀបចំដែនដី នគររូបនីយកម្ម និងសំណង់ និងជាប្រធានក្រុមការងារប្រតិបត្តិស្រុកអង្គរធំ បានជំរុញដល់ក្រុមការងារប្រតិបត្តិទាំងអស់ កំណត់ឱ្យបាននូវបញ្ហាប្រឈម និងដឹកនាំសម្របសម្រួលក្នុងការរៀបចំផែនការប្រើប្រាស់ដីរបស់ប្រជាពលរដ្ឋនៅតាមភូមិក្នុងតំបន់អង្គរ ដើម្បីធានាឱ្យមានភាពងាយស្រួល របៀបរៀបរយ និងនិរន្តរភាពនៃការប្រើប្រាស់ដីនៅក្នុងមូលដ្ឋាន។
ក្នុងកិច្ចប្រជុំលើកដំបូងរបស់ក្រុមការងារប្រតិបត្តិនៃក្រុមការងារចំពោះកិច្ច នៅថ្ងៃទី១៣ ខែតុលា ឆ្នាំ២០២៥នេះ ឯកឧត្ដម សេង ថានី បានគូសបញ្ជាក់ថា ការប្រើប្រាស់ដីប្រកបដោយនិរន្តរភាព គឺអាចបំពេញបានទៅតាមតម្រូវការរបស់ប្រជាពលរដ្ឋ ការវិនិយោគ ព្រមទាំងការពារបាននូវប្រភពធនធានសម្រាប់ពេលអនាគត។
ឯកឧត្ដម បានបន្តថា ការរៀបចំផែនការប្រើប្រាស់ដីនៅក្នុងឃុំ សង្កាត់ គឺសំដៅដល់ផែនការប្រើប្រាស់ដីទាំងមូល រួមទាំងដីរដ្ឋ និងដីឯកជន ដោយផ្អែកលើការប៉ាន់ប្រមាណសក្ដានុពលដី ធនធានទឹក លទ្ធភាពផ្សេងៗ និងលក្ខខណ្ឌសេដ្ឋកិច្ច-សង្គមកិច្ច ដើម្បីជ្រើសរើសជម្រើសល្អបំផុតក្នុងការប្រើប្រាស់ដី។ ផែនការនេះនឹងជួយពង្រឹងយុទ្ធសាស្ត្រអភិវឌ្ឍន៍ឃុំ សង្កាត់ ក្រោមទម្រង់កម្មវិធីវិនិយោគ និងផែនការអភិវឌ្ឍឃុំ សង្កាត់។
ឯកឧត្ដមបានបញ្ជាក់ថា ក្រុមការងារប្រតិបត្តិស្រុកនឹងចុះធ្វើវេទិកាសាធារណៈនៅតាមភូមិនីមួយៗក្នុងស្រុកអង្គរធំ ដើម្បីស្ដាប់បញ្ហាប្រឈម កំណត់ទិន្នន័យពាក់ព័ន្ធនឹងការប្រើប្រាស់ដីនៅក្នុងមូលដ្ឋានរបស់ប្រជាពលរដ្ឋ ព្រមទាំងស្វែងរកដំណោះស្រាយជូនពួកគាត់ឱ្យបានឆាប់រហ័ស និងទាន់ពេលវេលា៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
